ഫാം ഹൗസില്‍ നിന്നും കറവയന്ത്രവും മോട്ടോര്‍ പമ്പും കവര്‍ച്ച ചെയ്തു; അഞ്ചംഗ സംഘം അറസ്റ്റില്‍

കാഞ്ഞങ്ങാട്: ഫാം ഹൗസില്‍ നിന്നും കറവയന്ത്രവും മോട്ടോര്‍ പമ്പും കവര്‍ച്ച ചെയ്ത സംഭവത്തില്‍ അഞ്ചംഗ സംഘത്തെ ചന്തേര പൊലീസ് അറസ്റ്റ് ചെയ്തു. പിലിക്കോട് കണ്ണങ്കൈയിലെ ഫാം ഹൗസിലാണ് മോഷണം നടന്നത്. തരക്കേരുവിലെ പി പ്രമോദിന്റെ ഉടമസ്ഥതയിലുള്ളതാണ് ഫാം ഹൗസ്.

കോതോളിയിലെ വി.വി. സജീഷ് (36), മടിവയലിലെ വി. നിതിന്‍ (31), കൈതക്കാട്ടെ എം. രാജേഷ് (35), കോതോളിയിലെ സി.എച്ച്. പ്രശാന്ത് (42), പടന്ന ഗണേഷ് മുക്കില്‍ താമസിക്കുന്ന അമ്പലവയല്‍ സ്വദേശി സി.വി. വിജേഷ് (34) എന്നിവരെയാണ് അറസ്റ്റുചെയ്തത്. ഒന്നേകാല്‍ ലക്ഷം രൂപ വിലവരുന്ന സാധനങ്ങളാണ് കവര്‍ന്നത്. ഉടമയുടെ പരാതിയില്‍ പൊലീസ് നടത്തിയ അന്വേഷണത്തില്‍ മോട്ടോര്‍ പമ്പിന്റെയും കറവയന്ത്രങ്ങളുടെയും ചില ഭാഗങ്ങള്‍ ആക്രിക്കടയില്‍ നിന്നും കണ്ടെടുത്തു.

ഇവിടെ നിന്നും ലഭിച്ച സൂചനയുടെ അടിസ്ഥാനത്തില്‍ നടത്തിയ അന്വേഷണത്തിലാണ് പ്രതികള്‍ വലയിലാകുന്നത്. ഹൊസ് ദുര്‍ഗ് ഒന്നാം ക്ലാസ് മജിസ്‌ട്രേറ്റ് കോടതി (ഒന്ന്)യില്‍ ഹാജരാക്കിയ പ്രതികളെ രണ്ടാഴ്ചത്തേക്ക് റിമാന്‍ഡ് ചെയ്തു.