പുട്ട് എല്ലാവരും ഉണ്ടാക്കാറുണ്ട്. പലതരത്തിലുള്ള പുട്ടുകള്‍ ഉണ്ട്. ഓട്‌സ്, റവ, അരി, ഗോതമ്പ്, തുളസി എന്നുവേണ്ട പലതരത്തിലുള്ള പുട്ടും ഉണ്ടാക്കാറുണ്ട്. എളുപ്പത്തില്‍ പുട്ട് ഉണ്ടാക്കാം എന്നതുകൊണ്ടുതന്നെ പലരും പ്രഭാത ഭക്ഷണത്തിന് പുട്ട് തിരഞ്ഞെടുക്കാറുണ്ട്. ചേരുവകളും കുറച്ച് മതി. പുട്ടിന് കടലയും ചിക്കനും ബീഫും പഴവും, പപ്പടവുമൊക്കെ ബെസ്റ്റ് കോമ്പിനേഷനാണ്. പുട്ട് നല്ല മയത്തോടെ ആയാല്‍ എല്ലാവരും രുചിയോടെ കഴിക്കും.
അത്തരത്തില്‍ ഗോതമ്പ് പുട്ട് എങ്ങനെ മയത്തോടെ ഉണ്ടാക്കാം എന്ന് നോക്കാം.
ചേരുവകള്‍
ഗോതമ്പ് - 1 കപ്പ്
നാളികേരം ചിരകിയത് - 1 കപ്പ്
വെള്ളം- ആവശ്യത്തിന്
ഉപ്പ്- ആവശ്യത്തിന്
തയാറാക്കുന്ന വിധം
ഗോതമ്പ് നന്നായി കഴുകി വെള്ളം ഊറ്റി കളഞ്ഞ് എടുക്കുക. ശേഷം പുട്ട് കുറ്റിയില്‍ ഗോതമ്പ് നിറച്ച് 2 മിനിറ്റ് ആവി കയറ്റി എടുക്കാം.(പുട്ട് ഉണ്ടാക്കുന്ന രീതിയില്‍ തന്നെ) ആവി കയറ്റിയശേഷം ഗോതമ്പ് കുറ്റിയില്‍ നിന്നും കുത്തി എടുത്തു നിരത്തി വയ്ക്കുക. പെട്ടെന്ന് ചൂടാറാന്‍ വേണ്ടിയാണ് ഇങ്ങനെ ചെയ്യുന്നത്.
ചൂടാറിയ ഗോതമ്പ്, മിക്‌സിയുടെ പൊടിക്കുന്ന ജാറില്‍ ഇട്ട് തരുതരുപ്പായി പൊടിച്ചെടുക്കുക. പൊടിച്ച ഗോതമ്പ് ഒരു ബൗളില്‍ ഇടുക. ഇനി ഗോതമ്പിലേക്ക് കുറച്ച് തേങ്ങാ ചിരകിയതും ഉപ്പും ചേര്‍ത്ത് യോജിപ്പിക്കുക. കുറച്ച് വെള്ളവും തളിച്ച് കുഴച്ച് പുട്ടുപൊടിയുടെ പരുവത്തിലാക്കാം. പുട്ടുകുറ്റിയില്‍ ചില്ലിട്ട ശേഷം പൊടിയും നാളികേരം ചിരകിയതും മാറി മാറി ഇടുക, ആവിയില്‍ വേവിച്ചെടുക്കാം. നല്ല സോഫ്റ്റ് ഗോതമ്പു പുട്ട് തയാര്‍.