ഷാര്‍ജ പുസ്തകോത്സവത്തില്‍ ഷാര്‍ജ ഇന്ത്യന്‍ അസോസിയേഷന്‍ സംഘടിപ്പിച്ച സംവാദത്തില്‍ കമാല്‍ വരദൂര്‍ സംസാരിക്കുന്നു
ഷാര്‍ജ പുസ്തകോത്സവത്തില്‍ ഇന്ത്യന്‍ പവലിയനില്‍ നടന്ന ശ്രദ്ധേയമായ സംവാദങ്ങളിലൊന്ന് ലോകകപ്പ് ഫുട്‌ബോളില്‍ ഇന്ത്യ കാഴ്ചക്കാര്‍ മാത്രമായി നിലകൊള്ളേണ്ടി വരുന്നതിനെ കുറിച്ചായിരുന്നു. പ്രമുഖ രാജ്യാന്തര കളിയെഴുത്തുകാരനായ കമാല്‍ വരദൂര്‍ തറപ്പിച്ച് പറയുന്നു; നമ്മുടെ കാലത്ത് ഇന്ത്യ ലോകകപ്പ് ഫുട്‌ബോളില്‍ കളിക്കുന്ന ഒരു കാലം പ്രതീക്ഷിക്കേണ്ട.
ഷാര്‍ജ രാജ്യാന്തര പുസ്തകോത്സവം സമാപിച്ചപ്പോള്‍ വായനാപ്രേമികളില്‍ ഉണ്ടായ വേദന ചെറുതല്ല. ഏതാണ്ട് രണ്ടാഴാച കാലം ഷാര്‍ജയിലെ എക്‌സ്‌പോ സെന്ററില്‍ അരങ്ങേറിയ പുസ്തകോത്സവത്തില്‍ ലോകമെമ്പാടുമുള്ള വിവിധ ഭാഷകളില്‍ നിന്നുള്ള അക്ഷരങ്ങള്‍ പെറുക്കിയെടുക്കാനും പുസ്തകങ്ങള്‍ മലര്‍ക്കെ തുറന്നുവെച്ച് അക്ഷരങ്ങളുടെ മണം നുകരാനും എത്തിയത് ലക്ഷകണക്കിനാളുകളാണ്. ലോകപ്രശസ്തരായ, വിവിധ ഭാഷകളിലുള്ള എഴുത്തുകാരുടെ പുസ്തകങ്ങള്‍ മുതല്‍ പുസ്തക രചനയിലേക്ക് കാലെടുത്തുവെച്ച പുതുമുഖങ്ങളായ എഴുത്തുകാരുടെ പുസ്തകങ്ങള്‍ വരെ ഷാര്‍ജ പുസ്തകോത്സവത്തില്‍ പ്രകാശിതമായി. ഇക്കൂട്ടത്തില്‍ കാസര്‍കോട്ടുകാരായ പലരുടെയും പുസ്തകങ്ങള്‍ ഏഴാം നമ്പര്‍ ഹാളില്‍ റൈറ്റേഴ്‌സ് ഫോറത്തിലെ തിങ്ങിനിറഞ്ഞ വായനാപ്രിയര്‍ക്ക് മുന്നില്‍ പ്രകാശിപ്പിക്കപ്പെട്ടു. കെ.എം. അബ്ബാസിന്റെ പുതിയ പുസ്തകം അഡ്വ. ബി.എഫ് അബ്ദുല്‍ റഹ്മാന്റെ 'മാനവികാദര്‍ശം സമൂഹത്തിലും ഉബൈദ് കവിതകളിലും', കുട്ടിയാനം മുഹമ്മദ് കുഞ്ഞിയുടെ 'ഇങ്ങനെയും ഒരു കാലം', തോട്ടത്തില്‍ മുഹമ്മദലിയുടെ നോവലായ 'വെന്റിലേറ്റര്‍', ഇഖ്ബാല്‍ പള്ളത്തിന്റെ പുസ്തകം തുടങ്ങിയവ ഇക്കൂട്ടത്തില്‍പെടും. ഷാര്‍ജ പുസ്തകോത്സവത്തില്‍ വ്യത്യസ്തമായ വിവിധ വിഷയങ്ങളില്‍ നടന്ന സംവാദവും ചര്‍ച്ചകളും ശ്രദ്ധേയമായിരുന്നു. അക്കൂട്ടത്തില്‍ ഫുട്‌ബോളുമായി ബന്ധപ്പെട്ട ഒരു വിഷയത്തില്‍ ഷാര്‍ജ ഇന്ത്യന്‍ അസോസിയേഷന്‍ അവരുടെ പവലിയനില്‍ സംഘടിപ്പിച്ച സംവാദം നയിക്കാനുള്ള അവസരം എനിക്കുണ്ടായി. ചന്ദ്രികാദിനപത്രത്തിന്റെ എഡിറ്ററും പ്രമുഖ രാജ്യാന്തര കായിക റിപ്പോര്‍ട്ടറുമായ കമാല്‍ വരദൂരായിരുന്നു മുഖ്യാതിഥി. സംവാദത്തില്‍ അധ്യക്ഷത വഹിച്ചത് ഷാര്‍ജ ഇന്ത്യന്‍ അസോസിയേഷന്‍ പ്രസിഡണ്ട് നിസാര്‍ തളങ്കരയും. ലോകകപ്പ് ഫുട്‌ബോളില്‍ ഇന്ത്യ യോഗ്യത നേടാതെ കാഴ്ചക്കാര്‍ മാത്രമായി ഇരിക്കേണ്ടിവരുന്ന ദയനീയമായ സാഹചര്യത്തെ കുറിച്ച് 'പന്തും പേനയും' എന്ന വിഷയത്തിലായിരുന്നു സംവാദം. സംവാദത്തില്‍ നിന്നുള്ള പ്രസക്ത ഭാഗങ്ങള്‍ ചുവടെ:
? ഫുട്‌ബോള്‍ ഇന്ത്യക്കാര്‍ക്ക് അടങ്ങാത്ത ആവേശമാണ്. ഫുട്‌ബോള്‍ എവിടെയുണ്ടോ അവിടേക്ക് ഭാരതീയര്‍, പ്രത്യേകിച്ച് മലയാളികള്‍ ഓടിയെത്തുന്നു. ഏറ്റവുമൊടുവില്‍ ഖത്തര്‍ ലോകകപ്പ് ഫുട്‌ബോള്‍ വിജയിപ്പിക്കുന്നതിലും മലയാളികളുടെ പങ്ക് ചെറുതായിരുന്നില്ല. പക്ഷെ, ഇന്ത്യന്‍ ജേഴ്‌സി അണിഞ്ഞ് ഒരു ടീം ലോകകപ്പില്‍ കളിക്കുന്നത് കാണാനുള്ള ഭാഗ്യം നമുക്കില്ല. ഇന്ത്യ ലോകകപ്പില്‍ കളിക്കുന്ന, ഭാരതീയര്‍ ഗ്യാലറിയിലിരുന്ന് ഇന്ത്യന്‍ പതാക വീശി ആവേശം കൊള്ളുന്ന ഒരു കാലം എപ്പോഴായിരിക്കും.
കമാല്‍ വരദൂര്‍: നമ്മള്‍ എപ്പോഴും നല്ല കാഴ്ചക്കാരാണ്, എല്ലായിടത്തും. ഇന്ത്യ ഒരിക്കല്‍ ലോകകപ്പ് ഫുട്‌ബോളിന് യോഗ്യത നേടിയിരുന്നു. ലാറ്റിന്‍ അമേരിക്കയിലെ ഉറുഗ്വയിലാണ് അന്ന് ലോകകപ്പ് ഫുട്‌ബോള്‍ നടന്നത്. ഇന്ത്യയില്‍ നിന്നടക്കം മത്സരം കാണാന്‍ ആളുകള്‍ ഉറുഗ്വയിലേക്ക് പോയിരുന്നു. ഏറ്റവും ഒടുവില്‍ ഖത്തറില്‍ നടന്ന ലോകകപ്പ് ഫുട്‌ബോള്‍ മത്സരം കാണാന്‍ ചെന്നവരില്‍ ഒന്നാമത് സൗദ്യക്കാരായിരുന്നുവെങ്കില്‍ രണ്ടാമത് ഇന്ത്യക്കാരാണ്. അന്നും ഇന്നും നമുക്ക് ഫുട്‌ബോള്‍ അത്രമാത്രം ആവേശമാണ്. പക്ഷെ, മത്സരിക്കാന്‍ യോഗ്യത നേടിയിട്ടും പല കാരണങ്ങള്‍ കൊണ്ടും ലോകകപ്പ് ഫുട്‌ബോള്‍ മത്സരത്തില്‍ പങ്കെടുക്കാന്‍ ഇന്ത്യന്‍ ടീം ചെന്നില്ല. ഒരു കാരണമായി പറയുന്ന രസകരമായ കാര്യം, അന്ന് ഇന്ത്യന്‍ ഫുട്‌ബോള്‍ താരങ്ങള്‍ക്ക് ബൂട്ട് ധരിച്ച് കളിക്കാന്‍ അറിയില്ലായിരുന്നു എന്നാണ്. നഗ്നപാദരായാണ് ഇന്ത്യന്‍ താരങ്ങള്‍ കളിച്ച് ശീലിച്ചിരുന്നത്. എന്നാല്‍ ലോകകപ്പ് ഫുട്‌ബോളില്‍ കളിക്കണമെങ്കില്‍ ബൂട്ട് ധരിക്കണമെന്നത് നിര്‍ബന്ധമായിരുന്നു. അതിനാല്‍ ഇന്ത്യന്‍ ടീം മത്സരത്തിന് പോയില്ല. മറ്റു ചില കാരണങ്ങളും പറയുന്നുണ്ട്. ഇനി ഞാന്‍ ചോദ്യത്തിനുള്ള മറുപടിയിലേക്ക് വരാം. ഇന്ത്യ ലോകകപ്പ് ഫുട്‌ബോളില്‍ കളിക്കാന്‍ യോഗ്യത നേടുന്ന കാലം എന്നായിരിക്കുമെന്നാണ് ഷാഫിയുടെ ചോദ്യം. ലോക ഫുട്‌ബോളിനെ നിരീക്ഷിക്കുന്ന ഒരാളെന്ന നിലയിലും കളിയെഴുത്തുകാരന്‍ എന്ന നിലയിലും ഒരു കാര്യം ഞാന്‍ തറപ്പിച്ചു പറയുന്നു; ഇന്ത്യ എപ്പോഴാണ് ലോകകപ്പ് ഫുട്‌ബോളിന് ആതിഥേയത്വം വഹിക്കുന്നത്, അന്ന് ആതിഥേയരെന്ന ആനുകൂല്യത്തില്‍ മാത്രമായിരിക്കും ഇന്ത്യന്‍ ടീമിന് ലോകകപ്പ് ഫുട്‌ബോളില്‍ കളിക്കാനാവുക.
? നമ്മുടെ തലമുറയുടെ ജീവിതകാലത്ത് ഇന്ത്യ ലോകകപ്പ് ഫുട്‌ബോളില്‍ കളിക്കുന്നത് കാണാനുള്ള ഭാഗ്യമുണ്ടാവില്ലെന്ന് അത്രയ്ക്കങ്ങ് തറപ്പിച്ചുപറയാനാകുമോ
കമാല്‍ വരദൂര്‍: ഇന്ത്യ ലോകകപ്പ് ഫുട്‌ബോളില്‍ മത്സരിക്കുന്നത് കാണാന്‍ അതിയായ ആഗ്രഹമുള്ള ഒരാളാണ് ഞാന്‍. പക്ഷെ, എന്റെ ബാക്കിയുള്ള ജീവിതകാലയളവില്‍ അതിനുള്ള ഭാഗ്യം ഉണ്ടാവുമെന്ന് എനിക്ക് തോന്നുന്നില്ല. അങ്ങനെ പല കാര്യങ്ങളിലും ഭാഗ്യം ഇല്ലാതെ പോയവരാണ് നമ്മള്‍. ഒടുവിലത്തെ ഒളിമ്പിക്‌സില്‍ ഇന്ത്യന്‍ ജാവലിന്‍ ത്രോ താരം നീരജ് ചോപ്ര സ്വര്‍ണ്ണമണിയുന്നതും ഇന്ത്യയുടെ ദേശീയഗാനം ഉയര്‍ന്നുകേള്‍ക്കുന്നതും കാണാന്‍ കാത്തിരുന്നവരാണ് നമ്മള്‍. നീരജ് സ്വര്‍ണ്ണം നേടുമെന്ന് നമ്മള്‍ എല്ലാവരും ഉറപ്പിച്ചിരുന്നു. ഒളിമ്പിക്‌സ് വേദിയില്‍ ഫൈനല്‍ മത്സരം കാണാന്‍ ആകാംക്ഷയോടെയാണ് ഞങ്ങള്‍ കാത്തിരുന്നത്. പക്ഷെ ഒട്ടും പ്രതീക്ഷിക്കാതെ പാകിസ്ഥാന്‍ താരം ഹര്‍ഷദ് നദീം സ്വര്‍ണ്ണം നേടുന്നതാണ് കണ്ടത്. ഇന്ത്യയുടെ ദേശീയഗാനം മുഴങ്ങുന്നത് കേള്‍ക്കാന്‍ കാത്തിരുന്ന നമുക്ക് പാകിസ്ഥാന്റെ ദേശീയഗാനം കേള്‍ക്കേണ്ടിവന്നു. ഇപ്പോഴും ഞാന്‍ ആവര്‍ത്തിച്ച് പറയുകയാണ് നമ്മുടെ ജീവിതകാലത്ത് ഇന്ത്യ ആതിഥേയരായി അല്ലാതെ ലോകകപ്പ് ഫുട്‌ബോളില്‍ കളിക്കുന്ന ഒരു സാഹചര്യവും ഇന്നത്തെ അവസ്ഥയില്‍ ഇല്ല.
? എന്തുകൊണ്ടാണ് ഇങ്ങനെയൊരു അവസ്ഥ. ക്രിക്കറ്റിലാണെങ്കില്‍ നമ്മള്‍ ലോക രാജ്യങ്ങള്‍ക്കിടയില്‍ ഒന്നാം സ്ഥാനത്തുണ്ട്. ഫുട്‌ബോളില്‍ എന്തുകൊണ്ട് ഈ ഗതി വന്നു.
കമാല്‍ വരദൂര്‍: ഫുട്‌ബോളിന്റെ നേതൃനിരയില്‍ പ്രവര്‍ത്തിക്കുന്നവരുടെ പോരായ്മയാണ് കാരണം. ആര് കളിക്കണം, ആരെ കളിപ്പിക്കണം എന്നൊക്കെ ഇവിടെ തീരുമാനിക്കുന്നത് കോച്ചുമാരല്ല, ജോത്സ്യന്മാരാണ്. അവര് പറയുന്നവരെയാണ് കളിക്കാനിറക്കുന്നത്. താഴെ തട്ടില്‍ നിന്ന് മികച്ച രീതിയില്‍ കളിച്ചുവളരുന്നവരെ പ്രോത്സാഹിപ്പിക്കാനോ ഉയര്‍ത്തികൊണ്ടുവരാനോ ശ്രമങ്ങളുണ്ടാവുന്നില്ല. ക്രിക്കറ്റ് പോലെ ഫുട്‌ബോള്‍ താരങ്ങള്‍ക്ക് സൗകര്യങ്ങള്‍ ഒരുക്കി കൊടുക്കുന്നില്ല. ഒരു ക്രിക്കറ്റ് താരത്തിന് അപകടം പറ്റിയാല്‍ ആദ്യം പോവുന്നത് ബംഗളൂരുവിലെ നാഷണല്‍ ക്രിക്കറ്റ് അക്കാദമിയിലേക്കാണ്. അവിടെ അവരെ ചികിത്സിക്കാനുള്ള സൗകര്യങ്ങളൊക്കെയുണ്ട്. എന്നാല്‍ ഒരു ഫുട്‌ബോള്‍ താരത്തിന് ഈ സൗകര്യങ്ങളില്ല. ഭാരിച്ച ചികിത്സാചെലവുകള്‍ സ്വയം വഹിക്കേണ്ടിവരുന്ന ഫുട്‌ബോള്‍ താരങ്ങള്‍ ജീവിക്കാന്‍പോലും പാടുപെടുന്നുണ്ടെന്ന് എത്രപേര്‍ക്കറിയാം.
? ഇന്ത്യന്‍ താരങ്ങള്‍ സ്‌കില്‍ ഡവലെപ്‌മെന്റിന് ശ്രമിക്കാത്തത് കൊണ്ടല്ലേ പിന്നോട്ട് തള്ളപ്പെട്ടുപോവുന്നത്.
കമാല്‍ വരദൂര്‍: സ്‌കില്‍ ഡവലെപ്‌മെന്റ് രണ്ട് തരത്തിലുണ്ട്. ഒന്ന് ജന്മനാ ഉണ്ടാവുന്നതും. മറ്റൊന്ന് സ്വയം പരിശ്രമത്തിലൂടെ ഉണ്ടാക്കിയെടുക്കുന്നതും. അതിന്റെ രണ്ട് ഉദാഹരണങ്ങളാണ് ലയണല്‍ മെസ്സിയും ക്രിസ്റ്റ്യാനോ റൊണാള്‍ഡോയും. മലയാളത്തില്‍ മോഹന്‍ലാലും മമ്മൂട്ടിയും പോലെ. എല്ലാവര്‍ക്കും ജന്മനാ സിദ്ധി ഉണ്ടാവണമെന്നില്ല. ജന്മനാ സിദ്ധിയുള്ളവരെ കൊണ്ട് മാത്രം ഒന്നും ചെയ്യിപ്പിക്കാനും പറ്റില്ല. പലരെയും കഠിനമായ പരിശ്രമത്തിലൂടെ അവരിലെ സിദ്ധി വളര്‍ത്തിയെടുക്കണം. അതിനുള്ള ശ്രമങ്ങളുണ്ടാവണം. ആഫ്രിക്കക്കാരെ കുറിച്ചുള്ള പൊതുവെയുള്ള ധാരണ വലിയ വയറും ചെറിയ തലയുമുള്ളവരാണ് എന്നാണ്. എന്നാല്‍ നിരന്തരമായ പരിശീലനത്തിലൂടെ അവരുടെ കഴിവ് വര്‍ധിപ്പിച്ചെടുക്കുന്നു. മിഡില്‍ ഡിസ്റ്റന്‍സ് ഓട്ടമത്സരങ്ങളില്‍ ആഫ്രിക്കക്കാര്‍ മുന്നേറുന്നത് അവരുടെ കഴിവ് വളര്‍ത്തികൊണ്ടുവരുന്നതിനാലാണ്.
? പല രാജ്യാന്തര മത്സരങ്ങളിലും വംശീയമായ രീതിയിലുള്ള അപമാനങ്ങള്‍ കാണാം. ഇത് ഇന്ത്യന്‍ ഫുട്‌ബോളിലേക്കും കടന്നുവരുന്നുണ്ടോ.
കമാല്‍ വരദൂര്‍: നൂറ് ശതമാനവും ഉണ്ട്. പല തരത്തില്‍ അത് കാണുന്നു. ഇറ്റലിയും ഇംഗ്ലണ്ടും തമ്മിലുള്ള ഒരു മത്സരത്തില്‍ ആഫ്രിക്കന്‍ വംശജരായ മൂന്ന് താരങ്ങളുടെ പെനാള്‍ട്ടി കിക്ക് പാഴായി പോയതിന്റെ പേരില്‍ ഉണ്ടായ വംശീയ ഹത്യ എത്രമാത്രം ഭീകരമാണ്. ഫുട്‌ബോള്‍ ഭ്രാന്തന്മാര്‍ പരക്കെ ആക്രമണം അഴിച്ചുവിട്ടു. ഇന്ത്യയിലും ഈ തരത്തില്‍ അല്ലെങ്കിലും മറ്റൊരു തരത്തില്‍ ഇത്തരം വിദ്വേഷം കാണാം. കേരളത്തിന്റെ കളിക്കാരന്‍ വളര്‍ന്നുവരണമെങ്കില്‍ കോച്ച് അല്ലെങ്കില്‍ സെലക്ടര്‍ മലയാളി ആയിരിക്കണം. പ്രാദേശികമായ ചിന്ത ഇന്ത്യന്‍ കായികമേഖലയെ നശിപ്പിച്ച് കൊണ്ടിരിക്കുകയാണ്. നമ്മുടെ സഞ്ജു സാംസണ്‍ന്റെ കാര്യം തന്നെ എടുത്ത് നോക്കൂ. കിടിലന്‍ ഓപ്പണറാണ്. സെഞ്ച്വറികള്‍ വാരിക്കൂട്ടിയിട്ടും അവഗണന നാം നിരന്തരം കണ്ടതല്ലേ.
സംവാദത്തില്‍ ടി.എ. ഷാഫി, കമാല്‍ വരദൂര്‍, നിസാര്‍ തളങ്കര എന്നിവര്‍