എന്‍.എ. നെല്ലിക്കുന്നിനൊപ്പം, 2) ഇ. അഹമ്മദ്, ചെര്‍ക്കളം അബ്ദുല്ല എന്നിവര്‍ക്കൊപ്പം
കാസര്‍കോടന്‍ രാഷ്ട്രീയത്തില്‍ കൊപ്പല്‍ അബ്ദുല്ലയെക്കാളും തിളങ്ങിയ പലരും വിയോഗശേഷം വിസ്മൃതിയില്‍ മറഞ്ഞുപോയെങ്കിലും കൊപ്പല്‍ അബ്ദുല്ലയെ കാസര്‍കോട് വര്‍ഷാവര്‍ഷം ഓര്‍ക്കാന്‍ മാത്രം ചില അടയാളപ്പെടുത്തലുകള്‍ അദ്ദേഹം ഈ മണ്ണില്‍ ബാക്കിവെച്ചിട്ടുണ്ട്.
കാസര്‍കോടിന്റെ സര്‍വ്വ മേഖലകളിലും നിറഞ്ഞു നിന്നിരുന്ന കൊപ്പല്‍ അബ്ദുല്ലയുടെ 9-ാം വിയോഗ വാര്‍ഷിക ദിനമായിരുന്നു ഇന്നലെ. കൊപ്പല്‍ സൗഹൃദവേദി കാസര്‍കോട്ട് ഇന്നലെ അനുസ്മരണ ചടങ്ങ് സംഘടിപ്പിക്കുകയുണ്ടായി. കാസര്‍കോടന്‍ രാഷ്ട്രീയത്തില്‍ കൊപ്പല്‍ അബ്ദുല്ലയെക്കാളും തിളങ്ങിയ പലരും വിയോഗശേഷം വിസ്മൃതിയില്‍ മറഞ്ഞുപോയെങ്കിലും കൊപ്പല്‍ അബ്ദുല്ലയെ കാസര്‍കോട് വര്‍ഷാവര്‍ഷം ഓര്‍ക്കാന്‍ മാത്രം ചില അടയാളപ്പെടുത്തലുകള്‍ അദ്ദേഹം ഈ മണ്ണില്‍ ബാക്കി വെച്ചിട്ടുണ്ട്.
രാഷ്ട്രീയത്തില്‍ കൊപ്പല്‍ അബ്ദുല്ല എത്ര മാത്രം വിജയിച്ചിരുന്നുവെന്ന ചോദ്യത്തിന് എളുപ്പം ഉത്തരം പറയുക സാധ്യമല്ല. അദ്ദേഹം കാസര്‍കോടിന്റെ സാംസ്‌കാരിക, സാമൂഹിക, കലാ-കായിക മേഖലകളിലെല്ലാം സജീവമായിരുന്നു. ഒരു കൊപ്പലിസം ഈ മണ്ണില്‍ കാഴ്ചവെക്കാന്‍ അദ്ദേഹത്തിന് കഴിഞ്ഞിരുന്നു. ഒരു ട്രാവല്‍ ഏജന്‍സിയുമായി നഗരം കേന്ദ്രീകരിച്ച് പ്രവര്‍ത്തിക്കുന്നതിനിടയില്‍ കൊപ്പല്‍ അബ്ദുല്ല കൈ വെക്കാത്ത മേഖലകളില്ല. അദ്ദേഹത്തെ അറിയാത്ത ആളുകളില്ല. കൊപ്പലിന്റെ സൗഹൃദ മധുരം അനുഭവിക്കാത്തവരും വളരെക്കുറവ്. എല്ലാ മേഖലകളിലും കൊപ്പല്‍ അബ്ദുല്ലക്ക് സൗഹൃദങ്ങളുണ്ടായിരുന്നു. സിനിമയിലും ഫുട്‌ബോള്‍ രംഗത്തും വ്യാപാര മേഖലയിലും പ്രവര്‍ത്തിച്ചിരുന്ന പല പ്രമുഖരും കൊപ്പല്‍ അബ്ദുല്ലയുടെ ഉറ്റ സുഹൃത്തുക്കളായിരുന്നു.
ഹാസ്യ സാമ്രാട്ട് ജഗതി ശ്രീകുമാറുമായുള്ള കൊപ്പല്‍ അബ്ദുല്ലയുടെ ബന്ധം അത്രയേറെ ഗാഢമായിരുന്നു. ജഗതി ശ്രീകുമാറിനെ അദ്ദേഹം കാസര്‍കോട്ട് കൊണ്ടുവന്നിട്ടുമുണ്ട്.
രാഷ്ട്രീയവും കലയും സിനിമാ പ്രണയവും ഫുട്‌ബോളും അടക്കം എല്ലാ മേഖലയെയും ഇത്രമാത്രം സ്പര്‍ശിച്ച മറ്റൊരാള്‍ കാസര്‍കോട്ട് അപൂര്‍വ്വമായിരിക്കും. ഏത് പാര്‍ട്ടിയുമാവട്ടെ, തിരഞ്ഞെടുപ്പുകളില്‍ വിജയിക്കാനുള്ള ഒരു സൂത്രം എപ്പോഴും അദ്ദേഹത്തിന്റെ പക്കലുണ്ടായിരുന്നു. 1979ല്‍ അഖിലേന്ത്യാ ലീഗില്‍ മത്സരിച്ചാണ് കൊപ്പല്‍ അബ്ദുല്ല കാസര്‍കോട് നഗരസഭയിലേക്കുള്ള തന്റെ ആദ്യ വരവ് അറിയിച്ചത്. 1990ല്‍ മുസ്ലിം ലീഗ് സ്ഥാനാര്‍ത്ഥിയായും അദ്ദേഹം വിജയിച്ചു. 1995ല്‍ ഖാദര്‍ ബങ്കരക്കെതിരെ നാഷണല്‍ ലീഗ് ടിക്കറ്റിലാണ് പാര്‍ട്ടിയുടെ സമുന്നത നേതാക്കളിലൊരാളായ കൊപ്പല്‍ അബ്ദുല്ല മത്സരിച്ചത്. അവിടെയും വെന്നിക്കൊടി പറത്തി മൂന്നാമതും നഗരസഭയിലെത്തി.
കൊപ്പല്‍ അബ്ദുല്ലക്ക് കപ്പിനും ചുണ്ടിനുമിടയില്‍ നഗരസഭാ ചെയര്‍മാന്‍ സ്ഥാനം തലനാരിഴക്ക് നഷ്ടപ്പെട്ട തിരഞ്ഞെടുപ്പായിരുന്നു 1995ലേത്. മുസ്ലിം ലീഗും നാഷണല്‍ ലീഗ്-ഇടത് മുന്നണി സഖ്യവും തമ്മില്‍ കടുത്ത പോരാട്ടം നടന്ന കാലം. നഗരസഭയില്‍ അന്ന് ആകെ സീറ്റുകള്‍ 32. ഐ.എന്‍.എല്‍-സി.പി.എം. സഖ്യത്തിന് 11 സീറ്റ്. ബി.ജെ.പിക്കും അത്ര തന്നെ. മുസ്ലിം ലീഗിന് 10 ഉം. ആര് ഭരിക്കും? ഉദ്വേഗവും അനിശ്ചിതത്വവും നിറഞ്ഞു നിന്ന ദിനങ്ങള്‍.
ഐ.എന്‍.എല്‍-സി.പി.എം സഖ്യം നേടിയ 11 സീറ്റുകളില്‍ 6 ഉം ഐ.എന്‍.എല്ലിന്റെതായിരുന്നു. സി.പി.എമ്മിന്റെ അഞ്ചും. ഒരു സ്വതന്ത്രന്റെ പിന്തുണ കിട്ടിയാല്‍ ഭരിക്കാമെന്ന മോഹം ഐ.എന്‍.എല്‍ നേതാക്കള്‍ക്കുണ്ടായിരുന്നു. കൊപ്പല്‍ അബ്ദുല്ല ചെയര്‍മാനാകുമെന്ന് പരക്കെ വാര്‍ത്ത പരന്നു. ഇതിനിടയില്‍ ഐ.എന്‍.എല്ലില്‍ നിന്ന് ഇടത് സ്വതന്ത്രരെ അടര്‍ത്തിയെടുത്ത് ഭരണം തുടരാന്‍ മുസ്ലിം ലീഗ് നടത്തിയ ശ്രമങ്ങളെല്ലാ വൃഥാവിലായി. ഇടത് മുന്നണിയാണെങ്കില്‍ തങ്ങളുടെ പിന്തുണയോടെ സ്വതന്ത്രനായി മത്സരിച്ച് ജയിച്ച അഡ്വ. എസ്.ജെ. പ്രസാദിനെ ചെയര്‍മാനാക്കാനുള്ള ശ്രമത്തിലാണ്. അഡ്വ. കെ. രാമചന്ദ്രനെയും അവര്‍ ആലോചിച്ചിരുന്നു. എന്നാല്‍ പ്രസാദിനെ മുന്നില്‍ നിര്‍ത്തിയാല്‍ മുസ്ലിം ലീഗില്‍ നിന്നുള്ള എതിര്‍പ്പ് കുറയുമെന്ന കണക്കുകൂട്ടലായിരുന്നു സി.പി.എമ്മിന്. ഐ.എന്‍.എല്‍ ആണെങ്കില്‍ കൊപ്പല്‍ അബ്ദുല്ലയെ അല്ലാതെ മറ്റാരെയും തങ്ങള്‍ അംഗീകരിക്കില്ലെന്ന നിലപാടിലും. പക്ഷെ കൊപ്പലിനെ ചെയര്‍മാനാക്കാനുള്ള നീക്കം ഒരു തരത്തിലും ലീഗ് വകവെച്ചുകൊടുക്കില്ല. മുസ്ലിം ലീഗ് പാളയത്തില്‍ നിന്ന് ഒരു സ്വതന്ത്രനെ തങ്ങളുടെ പക്ഷത്തേക്ക് കൊണ്ടുവരാനുള്ള ശ്രമങ്ങള്‍ ഐ.എന്‍.എല്‍ പലതരത്തിലും പയറ്റി നോക്കി. തായലങ്ങാടിയില്‍ ലീഗ് സ്വതന്ത്രനായി മത്സരിച്ചു ജയിച്ച എന്‍.കെ. മുഹമ്മദ് കുഞ്ഞിയുടെ നേര്‍ക്കായിരുന്നു അവരുടെ കണ്ണുകള്‍. പക്ഷെ ആ പൂതി വിട്ടേക്കു എന്ന നിലപാടിലായിരുന്നു എന്‍.കെ. മുഹമ്മദ് കുഞ്ഞി.
1995ല്‍ കാസര്‍കോട് നഗരസഭാ തിരഞ്ഞെടു പ്പില്‍ വിജയിച്ച കൊപ്പല്‍ അബ്ദുല്ലയെ പ്രവര്‍ത്തകര്‍ തോളിലേറ്റുന്നു
സെപ്റ്റംബര്‍ 23നാണ് വോട്ടെടുപ്പ് നടന്നത്. 27ന് വോട്ടെണ്ണിയിട്ടും ചെയര്‍മാന്‍ സ്ഥാനം സംബന്ധിച്ച അനിശ്ചിതത്വം ദിവസങ്ങളോളം നീണ്ടു. എസ്.ജെ. പ്രസാദും ഒരു സ്വതന്ത്രനും തങ്ങളോടൊപ്പം ചേരുകയാണെങ്കില്‍ വിജയിപ്പിക്കാമെന്നും ലീഗിന്റെ ഭാഗത്ത് നിന്ന് ഒരു നിര്‍ദ്ദേശമുണ്ടായി. ഒടുവില്‍ ഒക്‌ടോബര്‍ 4ന് ചെയര്‍മാന്‍, വൈസ് ചെയര്‍മാന്‍ തിരഞ്ഞെടുപ്പ് നടന്നു. ഇടതുമുന്നണി സ്വതന്ത്രനായി വിജയിച്ച എസ്.ജെ. പ്രസാദും ബി.ജെ.പിയിലെ അഡ്വ. കെ. സുന്ദര്‍റാവുവും മുസ്ലിം ലീഗിലെ ടി.ഇ. അബ്ദുല്ലയും ചെയര്‍മാന്‍ സ്ഥാനാര്‍ത്ഥികളായി രംഗത്തുവന്നു. എസ്.ജെ. പ്രസാദ് 21 വോട്ടുകള്‍ നേടി വിജയിച്ചു. രണ്ട് റൗണ്ടുകളായാണ് മത്സരം നടന്നത്. 10 അംഗങ്ങളുള്ള മുസ്ലിം ലീഗിലെ ടി.ഇ. അബ്ദുല്ല ആദ്യ റൗണ്ടില്‍ പുറത്തായി. എസ്.ജെ. പ്രസാദും അഡ്വ. കെ. സുന്ദര്‍ റാവുവും 11 വീതം വോട്ട് നേടി രണ്ടാം റൗണ്ട് മത്സരത്തിലേക്ക് കടന്നു. രണ്ടാം റൗണ്ടില്‍ മുസ്ലിം ലീഗ് തങ്ങളുടെ 10 വോട്ടുകളും എസ്.ജെ പ്രസാദിന് നല്‍കുകയായിരുന്നു. ബി.ജെ.പി. അധികാരത്തില്‍ വരുന്നത് തടയാന്‍ മുസ്ലിം ലീഗ് കൈകൊണ്ട ധീരമായ തീരുമാനം. കൊപ്പല്‍ അബ്ദുല്ലയാണ് എസ്.ജെ. പ്രസാദിന്റെ പേര് നിര്‍ദ്ദേശിച്ചത്. അഡ്വ. കെ. രാമചന്ദ്രന്‍ പിന്താങ്ങുകയായിരുന്നു. അന്നുതന്നെ നടന്ന വൈസ് ചെയര്‍മാന്‍ തിരഞ്ഞെടുപ്പില്‍ ഒരത്ഭുതം സംഭവിച്ചു.
ബി.ജെ.പിയിലെ അഡ്വ. കെ. സുന്ദര്‍ റാവു വൈസ് ചെയര്‍മാനായി തിരഞ്ഞെടുക്കപ്പെട്ടു. ആദ്യ റൗണ്ട് വോട്ടെടുപ്പില്‍ ഐ.എന്‍.എല്‍-ഇടതുമുന്നണി കൂട്ടുകെട്ടില്‍ നിന്ന് ഒരു വോട്ട് മുസ്ലിം ലീഗ് സ്ഥാനാര്‍ത്ഥിക്ക് ലഭിക്കുകയായിരുന്നു. ഇതില്‍ പ്രതിഷേധിച്ച് ഐ.എന്‍.എല്‍-സി.പി.എം. അംഗങ്ങള്‍ രണ്ടാം റൗണ്ട് വോട്ടെടുപ്പില്‍ നിന്ന് വിട്ടു നിന്നതിനാലാണ് ഒരു വോട്ടിന് ബി.ജെ.പിയിലെ സുന്ദര്‍ റാവു വിജയിച്ചത്. മുസ്ലിം ലീഗിലെ കെ.എം. അബ്ദുല്‍ ഹമീദും ഐ.എന്‍.എല്ലിലെ ടി.എം. സുലൈമാന് എന്ന സാല്‍ക്കോ സലീമുമായിരന്നു മറ്റു സ്ഥാനാര്‍ത്ഥികള്‍. ആദ്യ റൗണ്ടില്‍ അബ്ദുല്‍ ഹമീദിനും സുന്ദര്‍ റാവുവിനും 11 വീതം വോട്ടുകള്‍ ലഭിച്ചു. സുലൈമാന് 10ഉം. ഐ.എന്‍.എല്‍-ഇടതുമുന്നണി സഖ്യത്തിലെ ഒരു വോട്ട് മുസ്ലിം ലീഗ് സ്ഥാനാര്‍ത്ഥിക്ക മറിച്ച് വീണത് ചെറിയ സംഘര്‍ഷമൊന്നുമല്ല സ്ഥലത്ത് ഉണ്ടാക്കിയത്. ഇടത്-ഐ.എന്‍.എല്‍ സഖ്യം രണ്ടാ റൗണ്ടില്‍ നിന്ന് മാറി നിന്നതോടെ ബി.ജെ.പി സ്ഥാനാര്‍ത്ഥിക്ക് 11 ഉം മുസ്ലിം ലീഗ് സ്ഥാനാര്‍ത്ഥിക്ക് 10 ഉം വോട്ടുകള്‍ ലഭിക്കുകയായിരുന്നു. കൊപ്പല്‍ അബ്ദുല്ലക്ക് കപ്പിനും ചുണ്ടിനുമിടയില്‍ നഗരസഭാ ചെയര്‍മാന്‍ സ്ഥാനം നഷ്ടപ്പെട്ടതെങ്ങനെ? -അക്കാര്യം നാളത്തെ പത്രത്തില്‍.