നോവല്‍, കഥ, യാത്രാവിവരണം, കവിത, ജീവചരിത്രം, വിവര്‍ത്തനം, സമ്പാദനം തുടങ്ങി സര്‍ഗാത്മ കൃതികളായി അമ്പതില്‍പരം പുസ്തകങ്ങളും സാമ്പത്തിക ശാസ്ത്ര സംബന്ധിയായി 200ല്‍ പരം കൃതികളും രചിച്ച ഡോ. പ്രഭാകര ശിശില കഴിഞ്ഞ ദിവസം കാസര്‍കോട്ട് എത്തുകയുണ്ടായി. അദ്ദേഹം ഇപ്പോഴും എഴുത്തു മേഖലയില്‍ സജീവമാണ്.
കാസര്‍കോടിനോട് അതിര്‍ത്തി പങ്കിടുന്ന കര്‍ണാടകയിലെ ചെറുനഗരമായ സുള്ള്യയില്‍ എഴുത്തിന്റെ ഒരു ആള്‍ പര്‍വ്വതമുണ്ട്. ഡോ. ബി. പ്രഭാകര ശിശില.
കലാലയ അധ്യാപനമാണ് ജീവിതവൃത്തിയെങ്കിലും സാഹിത്യമെഴുത്തിലാണ് ആയുസ് പുലരുന്നത്. മീന്‍ വെള്ളത്തിലെന്നപോലെയാണ് പ്രഭാകര ശിശില എഴുത്തില്‍ കഴിയുന്നത്.
നോവല്‍, കഥ, യാത്രാവിവരണം, കവിത, ജീവചരിത്രം, വിവര്‍ത്തനം, സമ്പാദനം തുടങ്ങി സര്‍ഗാത്മകൃതികളായി അമ്പതില്‍ പരം പുസ്തകങ്ങളും സാമ്പത്തിക ശാസ്ത്ര സംബന്ധിയായി കന്നഡയിലും ഇംഗ്ലീഷിലുമായി 200ല്‍ പരം കൃതികളും രചിച്ച ശിശില ഇപ്പോഴും എഴുത്തുമേഖലയില്‍ സക്രിയമാണ്.
ക്ഷീണിക്കാത്ത മനീഷയും മഷി വറ്റാത്ത പേനയുമുള്ള ചുരുക്കം ചില എഴുത്തു കാരിലൊരാളാണ് ഡോ.ബി. പ്രഭാകര ശിശില. കേന്ദ്ര-കേരള സാഹിത്യ അക്കാദമികളുടെ അവാര്‍ഡ് ജേതാവും പ്രശസ്ത വിവര്‍ത്തക സാഹിത്യകാരനുമായ കാസര്‍കോട്ടെ കെ.വി. കുമാരന്‍ മാസ്റ്ററിലൂടെ മലയാളികള്‍ക്കും ചിരപരിചിതനായ പ്രഭാകര ശിശില എന്ന കന്നഡ എഴുത്തുകാരന്‍.
ശിശിലയുടെ ഏതാനും കൃതികള്‍ മലയാളത്തിനായി മൊഴിമാറ്റി നല്‍കിയിട്ടുണ്ട് കുമാരന്‍ മാസ്റ്റര്‍. അവയില്‍ ചിലതാണ് ചിന്താഗ്‌നി, മത്സ്യഗന്ധി എന്നീ നോവലുകളും കര്‍ണാടകത്തിലെ കര്‍ഷകപോരാട്ടങ്ങള്‍ എന്ന ചരിത്രപുസ്തകവും.
ചിന്താഗ്‌നി നോവലും ചരിത്രപുസ്തകവും കഴിഞ്ഞ ദിവസം കാസര്‍കോട്ട് ഗ്രന്ഥകാരന്റെയും പരിഭാഷകന്റെയും സാന്നിധ്യത്തില്‍ പ്രകാശനം ചെയ്യുകയുണ്ടായി. ഡോ. ശിവറാമ കാറന്ത്, ഡോ. യു.ആര്‍. അനന്തമൂര്‍ത്തി, കുവെംപു എന്നീ കന്നഡ സാഹിത്യകാരന്മാരുടെ സമശീര്‍ഷനായി ശിശിലയുടെ പേര് ചേര്‍ത്തുവെക്കുന്നുണ്ട്. അത്രയ്ക്കു തലപ്പൊക്കമുണ്ട് വിനയാന്വിതനായ ഈ സാഹിത്യകേസരിക്ക്.
സുളള്യ കുതുകുഞ്ച ഗ്രാമത്തില്‍ 1953 ഡിസംബര്‍ 21ന് ജനിച്ച ശിശില, ധനതത്വശാസ്ത്രത്തില്‍ ബിരുദാനന്തര ബിരുദവും പി.എച്ച്.ഡി.യും നേടി. തുടര്‍ന്ന് കോളേജ് അധ്യാപകനും പ്രൊഫസറുമായി. സുളള്യയിലെ നെഹ്‌റു മെമ്മോറിയല്‍ കോളേജ് പ്രിന്‍സിപ്പലായിരിക്കെയാണ് ഔദ്യോഗിക മേഖലയില്‍ നിന്നു വിരമിച്ചത്. അതോടെ എഴുത്തില്‍ ഒന്നുകൂടി സക്രിയമാവുകയായിരുന്നു.
ഡോ. ബി. പ്രഭാകര ശിശിലയും കെ.വി. കുമാരന്‍ മാസ്റ്ററും
അരികുവല്‍ക്കരിക്കപ്പെട്ടവരുടെയും പാവപ്പെട്ട ജനവിഭാഗങ്ങളുടെയും തൊഴിലാളികളുടെയും ജീവിതം, മാനവ സ്‌നേഹം, നാടിനോടും രാജ്യത്തോടുമുള്ള കൂറ്, ദുഃഖിക്കുന്നവരോടുള്ള ഐക്യദാര്‍ഢ്യം, സാമൂഹിക സൗഹാര്‍ദം, പുരാണ കഥകളുടെ മനുഷ്യപക്ഷം, ചരിത്രം, മനുഷ്യമനസിലെ നിഗൂഢതകള്‍, ആധ്യാത്മികതയുടെ പൊള്ളത്തരങ്ങള്‍ തുറന്നുകാട്ടല്‍ എന്നിവയാണ് പ്രധാനമായും ശിശിലയുടെ സര്‍ഗാത്മക രചനകളുടെ കാതല്‍. മത്സ്യഗന്ധി, പുംസ്ത്രീ, ബൊഗസെ തുമ്പ കനസു, ഗഗ്ഗാര്‍, ഹാദി ഹരെയദ ഹാദി, ഗുജരി അദ്ധിലിച്ചന ജിഹാദിയ, ചിന്താഗ്‌നി എന്നിവയാണ് ശിശിലയുടെ ശ്രദ്ധേയമായ നോവലുകളായി ഗണിക്കുന്നത്. കൊടഗിന ഐതീഹ്യകഥകളു എന്നത് ശ്രദ്ധേയമായ നാടോടിക്കഥകളുടെ സമാഹാരമാണ്.
ദേശ യാവുദാദരേനു എന്നത് യാത്രാവിവരണമാണ്. ഇതിന് ഗൊദുരു സാഹിത്യ അവാര്‍ഡ്, എം. വിശ്വേശ്വരയ്യ പുരസ്‌കാരം എന്നിവ ലഭിച്ചു. കപിലല്ലിയ കഥഗളുവിന് പമ്പാപ്രതിഷ്ഠാന സാഹിത്യശ്രീ അവാര്‍ഡ്, മാനിഷാദയ്ക്ക് അക്ഷരശ്രീ സ്റ്റേറ്റ് അവാര്‍ഡ്, പണ്ഡിത പുട്ട രാജ ഗവായി സ്റ്റേറ്റ് അവാര്‍ഡ്, നദി യെരദര നഡുവേയ്ക്ക് മാസ്തി സ്റ്റേറ്റ് അവാര്‍ഡ്, മത്സ്യഗന്ധിയ്ക്ക് യക്ഷഗാന ബയലാട്ട അക്കാദമി അവാര്‍ഡ് എന്നിവ ലഭിച്ചു.
യക്ഷഗാന കലാകാരനും യക്ഷഗാന പണ്ഡിതനും കൂടിയാണ് ശിശില. നിരന്തരം പഠിക്കുന്ന ഗവേഷകനും. ധനതത്വശാസ്ത്ര വിദഗ്ധനും അധ്യാപകനും കോളേജ് പ്രിന്‍സിപ്പലുമായ ഒരാള്‍ 200ല്‍ പരം സാമ്പത്തിക ശാസ്ത്ര പുസ്തകങ്ങള്‍ പ്രസിദ്ധീകരിച്ചു എന്ന അത്ഭുതം നിലനില്‍ക്കെത്തന്നെ അമ്പതില്‍പ്പരം സര്‍ഗാത്മക കൃതികളും ഒപ്പം പ്രസിദ്ധീകരിച്ചു എന്നത് ശിശിലയുടെ പെരുപ്പം എടുത്തുകാട്ടുന്നു. കന്നഡയില്‍ മാത്രമല്ല ഇംഗ്ലീഷിലും അദ്ദേഹം എഴുതി. ഏഷ്യ, യൂറോപ്പ്, അറേബ്യ തുടങ്ങിയ ഭൂഖണ്ഡങ്ങളിലെ മിക്കവാറും രാജ്യങ്ങളില്‍ യാത്രചെയ്തു.
ശിശിലയുടെ ഇതുവരെയുള്ള കൃതികളില്‍ എന്തുകൊണ്ടും വേറിട്ടു നില്‍ക്കുന്ന ഒന്നാണ് ചരിത്രഗ്രന്ഥമായ കര്‍ണാടകത്തിലെ കര്‍ഷക പോരാട്ടങ്ങള്‍. ഇതില്‍ മികച്ചൊരു ചരിത്രാന്വേഷകനെയും ഗവേഷകനെയും കാണാം. 1800 കളില്‍ കുടകിലും കാസര്‍കോട് ഉള്‍പ്പെടെയുള്ള സൗത്ത് കാനറയിലും കര്‍ണാടകയുടെ മറ്റു ഭാഗങ്ങളിലും പൊട്ടിപ്പുറപ്പെട്ട ഒറ്റയ്ക്കും തെറ്റയ്ക്കുമുണ്ടായ കര്‍ഷക പോരാട്ടങ്ങളുടെ രേഖീയവും അല്ലാത്തതുമായ ചരിത്രം ചികഞ്ഞെടുത്ത് അനാവരണം ചെയ്ത പ്രഭാകര ശിശില, തന്റെ നാടിന്റെ സമാനതയില്ലാത്ത മഹാചരിത്രം ലോകത്തെ അറിയിക്കുക എന്ന ദൗത്യമാണ് സ്വയം ഏറ്റെടുത്തത്.
പുസ്തക പ്രകാശന ചടങ്ങില്‍ ഡോ. പ്രഭാകര ശിശിലയെ ഡോ. സി. ബാലന്‍ ആദരിക്കുന്നു
പുസ്തകത്തിന്റെ ആമുഖത്തില്‍ ശിശില രേഖപ്പെടുത്തുന്നു: 'കുടക്-കര്‍ണാടക ജില്ലകളിലെ കര്‍ഷകര്‍ 1837 ല്‍ ഈസ്റ്റിന്ത്യാ കമ്പനിക്കെതിരെ പലരീതിയിലും കലാപമുയര്‍ത്തി. ഇതിനെ കുടക്-കെനറാ കര്‍ഷക കലാപം, കുടക്-സുളള്യ സാമ്പത്തിക പോരാട്ടം, കല്യാണപ്പന്റെ കൊള്ള തുടങ്ങിയ പേരുകളില്‍ വിളിക്കപ്പെട്ടു. ഇതിന്റെ മുന്‍പന്തിയിലുണ്ടായിരുന്നവര്‍ കൃഷിക്കാരും കര്‍ഷകത്തൊഴിലാളികളുമായിരുന്നു. ശൈവസന്യാസിമാരും സമരത്തില്‍ അണിചേര്‍ന്നു.
ടിപ്പുവിന്റെ മരണത്തോടെ(1799) ദക്ഷിണേന്ത്യയില്‍ തങ്ങളെ പ്രതിരോധിക്കാന്‍ ആരുമില്ലെന്ന തോന്നല്‍ ബ്രിട്ടീഷുകാര്‍ക്കുണ്ടായി. അതിനെ 1800ല്‍ ബിന്ദറിലെ ദോണ്ടിയാ ബാഘ് എന്ന ധീരന്‍ അയ്യായിരം കുതിരപ്പടയുമായി ചെന്ന് അമര്‍ത്തി. 1902 ല്‍ ഐശൂറിലെ വെങ്കിടാദ്രി പോരാട്ടം തുടര്‍ന്നു. ശിന്തഗിയില്‍ 1824ല്‍ ദിവാകര ദീക്ഷിത, റാവുജി റാസ്തിയ, ബാളപ്പ ദേശവാതെ, തുക്കളി ശെട്ടിയപ്പ എന്നിവരും 1829ല്‍ സങ്കോളി റായണ്ണയും വെള്ളക്കാരെ നേരിട്ടു. 1811ലും 1831ലും കര്‍ഷകര്‍ നികുതി നിഷേധ സമരം നടത്തി. 1837ല്‍ അമര സുളള്യയെ കേന്ദ്രമാക്കി കര്‍ഷകരും തൊഴിലാളികളും പൊരുതി. കുടകിലെ കര്‍ഷക പോരാട്ടത്തിന്റെ അലയടികള്‍ കാസര്‍കോട്ടുമുണ്ടായി. കല്യാണപ്പന്റെയും വീരണ്ണ ബണ്ടന്റെയും മറ്റും നേതൃത്വത്തില്‍ കര്‍ഷകര്‍ കാസര്‍കോട്ടേക്ക് മാര്‍ച്ച് നടത്തി ബ്രിട്ടീഷ് ഖജനാവ് കൊള്ളയടിച്ചു. തുടര്‍ന്ന് കുമ്പളയിലേയ്ക്ക് നീങ്ങി. സമരക്കാരെ ബ്രിട്ടീഷ് സേവകരായ നാടു വാഴികളും നാട്ടുപ്രഭുക്കളും ഒറ്റുകൊടുക്കുകയും പരാജയപ്പെടുത്തുകയും ചെയ്ത ചിത്രമാണ് പിന്നീടുകാണുന്നത്.
സമരക്കാരെ ബ്രിട്ടീഷ് സൈനികര്‍ വെടിവെച്ചും കഴുത്തുവെട്ടിയും തൂക്കിയും കൊന്നു. ബന്ധനസ്ഥരാക്കി ദ്വീപുകളിലേക്കും മറ്റും നാടുകത്തപ്പെട്ടവരും ഏറെ.
സമരക്കാര്‍ക്കുള്ള ശിക്ഷാവിധിയെക്കുറിച്ച് പുസ്തകത്തിലൊരിടത്ത് പറയുന്നത് നോക്കൂ: 'കര്‍ഷക കലാപകാരി ലക്ഷ്മണപ്പ ബങ്കരസയെ 1837 മെയ് 21ന് ബന്ധനസ്ഥനാക്കി. മംഗലാപുരത്തെത്തിച്ച അയാളെ അവിടെ ഒരാലില്‍ കെട്ടിയിട്ടു. പിന്നീട് കൈകാലുകള്‍ ബന്ധിച്ചു. കഴുത്തില്‍ കുരുക്കിട്ടു. ആല്‍മരത്തിന്റെ കൊമ്പിലൂടെ കിണറില്‍ നിന്ന് വെള്ളം കോരുന്ന മട്ടില്‍ മേലോട്ടും താഴോട്ടും വലിച്ചു. മൃതദേഹം ആലിന്‍ കൊമ്പില്‍ തൂക്കിയിട്ടു. കാക്കയ്ക്കും കഴുകനും കൊത്തിത്തിന്നാനായി ഉപേക്ഷിച്ചു.
മെയ് 30ന് ഉപ്പിനങ്കഡി മഞ്ചയ്യനേയും 1837 ഒക്ടോബര്‍ 31 ന് പുട്ടപ്പ ബസവനെയും ഇതേരീതിയില്‍ പൈശാകിമായി കൊന്നു. നാട്ടുകാര്‍ പേടിച്ചരണ്ടു. ഇതു കണ്ട് ബ്രിട്ടീഷ് പട്ടാളം പാട്ടുപാടി നൃത്തം ചവുട്ടി.
ഹുലി കഡദ നഞ്ചയ്യ, സ്വാമി അപരംപാരന്‍, പുട്ട ബസവ, കല്യാണ സ്വാമി, കെദംപാടി രാമ ഗൗഡ, ഗുഡ്ഡെമനെ അപ്പയ്യ, വീരണ്ണ ബണ്ട, ലക്ഷ്മപ്പ ബങ്കാറസ, ഊക്കണ്ണ ബണ്ട, കുഞ്ചടുപ്പ റാമ, കങ്കനൂറു ചെന്നയ്യ തുടങ്ങി 100ല്‍ പരം ധീര രക്തസാക്ഷികളായ കര്‍ഷക പോരാളികളെ പുസ്തകം പരിചയപ്പെടുത്തുന്നു.
88 താളുകളില്‍ 10 അധ്യായങ്ങളിലായി ക്രമീകരിച്ച കര്‍ഷക പോരാട്ടചരിത്രം ഗംഭീരമായൊരു പുസ്തകമാണെന്ന് പ്രകാശന വേളയില്‍ ചരിത്രകാരന്‍ ഡോ. സി. ബാലന്‍ അഭിപ്രായപ്പെടുകയുണ്ടായി.
താനൊരു ചരിത്ര വിദ്യാര്‍ത്ഥി മാത്രമാണെന്നും പഠിച്ചു ബോധ്യപ്പെട്ട കാര്യങ്ങള്‍ റഫറന്‍സ് വെച്ച് എഴുതിയതാണെന്നുമായിരുന്നു ശിശിലയുടെ വിനയാന്വിതമായ മറുപടി.