കൊപ്പല്‍ അബ്ദുല്ലക്ക് കൈവെള്ളയില്‍ നിന്ന് ചെയര്‍മാന്‍ സ്ഥാനം വഴുതിപ്പോയതെങ്ങനെ...
കൊപ്പല്‍ അബ്ദുല്ലയും 1995ലെ തിരഞ്ഞെടുപ്പും;
1995ല്‍ കാസര്‍കോട് നഗരസഭയിലേക്ക് നടന്ന തിരഞ്ഞെടുപ്പില്‍ വിജയിച്ച ഐ.എന്‍.എല്‍.-എല്‍.ഡി.എഫ്. സ്ഥാനാര്‍ത്ഥികളെ ആനയിച്ച് നടന്ന പ്രകടനം
1995ലെ തിരഞ്ഞെടുപ്പില്‍ കാസര്‍കോട് നഗരസഭയില്‍ കൊപ്പല്‍ അബ്ദുല്ലയെ ആണ് ഇന്ത്യന്‍ നാഷണല്‍ ലീഗ് നഗരസഭാ ചെയര്‍മാന്‍ സ്ഥാനത്തേക്ക് നിര്‍ദ്ദേശിച്ചത്. പാര്‍ട്ടിയുടെ മുനിസിപ്പല്‍ കമ്മിറ്റിയും മണ്ഡലം കമ്മിറ്റിയും ഇത് അംഗീകരിക്കുകയും ചെയ്തു. എന്നാല്‍ കൊപ്പല്‍ അബ്ദുല്ല ചെയര്‍മാനായില്ല. ഒരു സീറ്റ് കുറവ് ഉണ്ടായിരുന്ന സി.പി.എമ്മിലെ എസ്.ജെ. പ്രസാദാണ് ആ സ്ഥാനത്ത് അവരോധിതനായത്. ഇതെങ്ങെനെ സംഭവിച്ചു.
1995ലെ തിരഞ്ഞെടുപ്പില്‍ കാസര്‍കോട് നഗരസഭയില്‍ എല്‍.ഡി.എഫിനെക്കാള്‍ ഒരു സീറ്റ് കൂടുതലുണ്ടായിരുന്ന നാഷണല്‍ ലീഗിന് ചെയര്‍മാന്‍ സ്ഥാനം നഷ്ടപ്പെട്ടത് എങ്ങനെ എന്ന ചോദ്യം മൂന്ന് പതിറ്റാണ്ടിന് ശേഷവും വായുവിലലയുന്നുണ്ട്. കൊപ്പല്‍ അബ്ദുല്ലയെയാണ് ഇന്ത്യന്‍ നാഷണല്‍ ലീഗ് നഗരസഭാ ചെയര്‍മാന്‍ സ്ഥാനത്തേക്ക് നിര്‍ദ്ദേശിച്ചത്. പാര്‍ട്ടിയുടെ മുനിസിപ്പല്‍ കമ്മിറ്റിയും മണ്ഡലം കമ്മിറ്റിയും ഇത് അംഗീകരിക്കുകയും ചെയ്തു. എന്നാല്‍ കൊപ്പല്‍ അബ്ദുല്ല ചെയര്‍മാനായില്ല. ഒരു സീറ്റ് കുറവുണ്ടായിരുന്ന സി.പി.എമ്മിലെ എസ്.ജെ. പ്രസാദാണ് ആ സ്ഥാനത്ത് അവരോധിതനായത്. ഇതെങ്ങെനെ സംഭവിച്ചു.
നാഷണല്‍ ലീഗ്-സി.പി.എം. കൂട്ടുകെട്ടിന് 11 സീറ്റുകളാണ് നഗരസഭയില്‍ ലഭിച്ചതെങ്കില്‍ ബി.ജെ.പിയും അത്ര തന്നെ സീറ്റുകളില്‍ വിജയിച്ചിട്ടുണ്ട്. മുസ്ലിം ലീഗിന് 10 സീറ്റാണ് നേടാനായത്. ബി.ജെ.പിയെ മറികടന്ന് ചെയര്‍മാന്‍ പദം നേടണമെങ്കില്‍ മുസ്ലിം ലീഗിന്റെ ഒരു വോട്ടെങ്കിലും തങ്ങള്‍ക്ക് കിട്ടണമെന്ന് ഐ.എന്‍.എല്‍ നേതാക്കള്‍ക്ക് അറിയാമായിരുന്നു. ബി.ജെ.പി ഭരണത്തിലേറുന്നതിനെ ഒരു തരത്തിലും മുസ്ലിം ലീഗ് പിന്തുണക്കാന്‍ സാധ്യതയില്ല. നാഷണല്‍ ലീഗ്-സി.പി.എം. കൂട്ടുകെട്ടും ബി.ജെ.പിയും തമ്മില്‍ ചെയര്‍മാന്‍ സ്ഥാനത്തേക്ക് മത്സരിക്കുമ്പോള്‍ മുസ്ലിംലീഗിന്റെ ഒരു വോട്ട് ലഭിക്കണമെങ്കില്‍ അവര്‍ക്ക് കൂടി സുസമ്മതനായ ഒരാളായിരിക്കണം ചെയര്‍മാന്‍ സ്ഥാനത്തേക്ക് മത്സരിക്കേണ്ടത്. നാഷണല്‍ ലീഗില്‍ നിന്ന് ഒരാളെ മത്സരിപ്പിക്കുന്നതിനോട് മുസ്ലിം ലീഗിന് താല്‍പര്യമുണ്ടായിരുന്നില്ല. അത്രമാത്രം ബദ്ധ വൈരികളായിരുന്നു അന്ന് രണ്ട് പാര്‍ട്ടികളും. പ്രത്യേകിച്ച് കൊപ്പല്‍ അബ്ദുല്ലയുടെ കാര്യത്തില്‍. സി.പി.എം. നേതാക്കള്‍ മുസ്ലിം ലീഗ് നേതാക്കളുമായി പലതവണ സംസാരിച്ചപ്പോഴും അവര്‍ ഇതേ നിലപാട് തന്നെയാണ് ആവര്‍ത്തിച്ചത്. എന്നാല്‍ സീറ്റ് കൂടുതലുള്ള തങ്ങള്‍ക്ക് തന്നെ ചെയര്‍മാന്‍ സ്ഥാനം വേണമെന്ന ആവശ്യത്തില്‍ നാഷണല്‍ ലീഗ് നേതാക്കള്‍ ഉറച്ചു നിന്നു. ഇതോടെ കാര്യങ്ങള്‍ അനിശ്ചിതത്വത്തിലായി.
ഒടുവില്‍ അന്തിമ തീരുമാനം എടുക്കാനുള്ള ചര്‍ച്ച നടന്നത് നഗരസഭാ ചെയര്‍മാന്‍ തിരഞ്ഞെടുപ്പിന്റെ തലേന്ന് രാത്രിയാണ്. കൊപ്പല്‍ അബ്ദുല്ലയെ ചെയര്‍മാനാക്കുന്നതിനോട് മുസ്ലിം ലീഗ് എതിര്‍പ്പ് തുടരുകയാണെങ്കില്‍ സി.പി.എമ്മിലെ അഡ്വ. രാമചന്ദ്രനെയോ ഇടത് സ്വതന്ത്രനായി മത്സരിച്ചു ജയിച്ച എസ്.ജെ. പ്രസാദിനെയോ മത്സരിപ്പിക്കാന്‍ സി.പി.എം. നേതാക്കള്‍ കരുനീക്കുന്നുണ്ടായിരുന്നു.
അന്ന് രാത്രി ഗസ്റ്റ് ഹൗസില്‍ നടന്ന സി.പി.എം-നാഷണല്‍ ലീഗ് ചര്‍ച്ചയില്‍ കൊപ്പലിനെ ചെയര്‍മാന്‍ സ്ഥാനത്തേക്ക് മത്സരിപ്പിക്കുന്നതിനെ സി.പി.എം നേതാക്കള്‍ എതിര്‍ത്തു. സി.പി.എം നേതാക്കളായ സി.എച്ച്. കുഞ്ഞമ്പു, പി. ബാലന്‍, ഉദയകുമാര്‍ മാസ്റ്റര്‍, നാഷണല്‍ ലീഗ് നേതാക്കളായ പി.എസ്. മാഹിന്‍ ഹാജി, തായല്‍ അബ്ദുല്‍ റഹ്മാന്‍ എന്നിവരാണ് ചര്‍ച്ചക്കിരുന്നത്. നാഷണല്‍ ലീഗിന്റെ അറിയപ്പെടുന്ന നേതാക്കളെ ഒരിടത്തും ചെയര്‍മാന്‍-പ്രസിഡണ്ട് സ്ഥാനത്തേക്ക് പിന്തുണക്കരുതെന്നും സ്വതന്ത്രരെ പിന്തുണച്ച് കഴിയുന്നത്ര ആരോപണം ഒഴിവാക്കണമെന്നും സംസ്ഥാന കമ്മിറ്റിയുടെ നിര്‍ദ്ദേശമുണ്ട് എന്നായിരുന്നു കൊപ്പലിനെ ചെയര്‍മാന്‍ സ്ഥാനാര്‍ത്ഥിയാക്കുന്നതിനുള്ള വിയോജിപ്പിന് കാരണമായി സി.പി.എം നേതാക്കള്‍ പറഞ്ഞത്. എന്നാല്‍ നാഷണല്‍ ലീഗ് നേതാക്കള്‍ കൊപ്പലിനെ മത്സരിപ്പിക്കണമെന്ന ആവശ്യത്തില്‍ ഉറച്ച് നിന്നതോടെ ചര്‍ച്ച എവിടെയുമെത്താതെ പിരിയുകയായിരുന്നു.
മഞ്ചേശ്വരത്ത് പോയിരിക്കുന്ന സി.പി.എം. ജില്ലാ സെക്രട്ടറി കെ. കുഞ്ഞിരാമന്‍ രാത്രി തിരിച്ചെത്തിയാല്‍ ചര്‍ച്ച തുടരാമെന്ന് പറഞ്ഞായിരുന്നു പിരിഞ്ഞത്. രാത്രി 11 മണിയോടെ കെ. കുഞ്ഞിരാമന്‍ മഞ്ചേശ്വരത്ത് നിന്ന് സി.പി.എം. ജില്ലാ കമ്മിറ്റി ഓഫീസിലെത്തി. നാഷണല്‍ ലീഗ് നേതാക്കളായ എന്‍.എ നെല്ലിക്കുന്ന്, സി.എച്ച്. അഹ്മദ് ഹാജി, ഹമീദ് കരിപ്പൊടി, കെ.എം. അബ്ദുറഹ്മാന്‍ എന്നിവര്‍ സി.പി.എം. ഓഫീസിലെത്തി കെ. കുഞ്ഞിരാമനുമായി ചര്‍ച്ച തുടങ്ങി. അഡ്വ. കെ. രാമചന്ദ്രനെ ചെയര്‍മാന്‍ സ്ഥാനത്തേക്ക് മത്സരിപ്പിക്കുന്നതാണ് നല്ലതെന്നും കൊപ്പല്‍ മത്സരിച്ചാല്‍ മുസ്ലിം ലീഗ് അംഗങ്ങള്‍ പിന്തുണക്കില്ലെന്ന് ലീഗ് നേതാക്കള്‍ തന്നെ പറയുന്നുണ്ടെന്നുമായിരുന്നുവത്രെ കെ. കുഞ്ഞിരാമന്‍ പറഞ്ഞത്. എന്നാല്‍ കൊപ്പല്‍ അബ്ദുല്ലയെ ഒഴിവാക്കികൊണ്ടുള്ള ഒരു തീരുമാനത്തിനും നാഷണല്‍ ലീഗ് തയ്യാറായില്ല.
എങ്കില്‍ തല്‍കാലം കാസര്‍കോടിന്റെ കാര്യം മാറ്റിവെച്ച് ചെങ്കള, ദേലംപാടി പഞ്ചായത്ത് പ്രസിഡണ്ട് സ്ഥാനത്തെ കുറിച്ച് ചര്‍ച്ച ചെയ്യാമെന്നായി. ദേലംപാടിയിലും ചെങ്കളയിലും ആരെയാണ് പ്രസിഡണ്ട് സ്ഥാനത്തേക്ക് മത്സരിപ്പിക്കേണ്ടത് എന്നതിനെചൊല്ലി തര്‍ക്കമുണ്ടായിരുന്നു. ചെങ്കളയില്‍ നാഷണല്‍ ലീഗിന്റെ പി.ബി. അഹമ്മദ് പ്രസിഡണ്ടാവണമെന്ന് നാഷണല്‍ ലീഗ് നേതാക്കള്‍ ആവശ്യപ്പെട്ടു. അഹ്മ്മദിനെ പ്രസിഡണ്ട് സ്ഥാനത്തേക് മത്സരിപ്പിക്കുന്നതില്‍ സി.പി.എം. സെക്രട്ടറി ആദ്യം കടുത്ത എതിര്‍പ്പ് പ്രകടിപ്പിച്ചുവെങ്കിലും ഒടുവില്‍ നാഷണല്‍ ലീഗ് നേതാക്കളുടെ നിര്‍ബന്ധത്തിന് വഴങ്ങി ചെങ്കള പഞ്ചായത്ത് പ്രസിഡണ്ട് സ്ഥാനത്തേക്ക് പി.ബി. അഹ്മ്മദിനെ മത്സരിപ്പിക്കാന്‍ സി.പി.എം. തയ്യാറായി. ചെങ്കളയില്‍ നാഷണല്‍ ലീഗിന് നാലും എല്‍.ഡി.എഫിന് നാലും സീറ്റുകളാണ് ഉണ്ടായിരുന്നത്.
ചെങ്കളയിലെ പ്രശ്‌നം തീര്‍ന്നപ്പോള്‍ ദേലംപാടി പഞ്ചായത്ത് പ്രസിഡണ്ട് സ്ഥാനത്തേക്ക് ആരെ മത്സരിപ്പിക്കണമെന്നതിനെ ക്കുറിച്ചായി ചര്‍ച്ച. ദേലംപാടി പഞ്ചായത്തില്‍ എല്‍.ഡി.എഫിന് നാലും നാഷണല്‍ ലീഗിന് രണ്ടും അംഗങ്ങളാണുള്ളത്.
ദേലംപാടി പഞ്ചായത്ത് പ്രസിഡണ്ട് സ്ഥാനവും നാഷണല്‍ ലീഗിന് നല്‍കാന്‍ സി.പി.എം. സമ്മതിച്ചു. കാസര്‍കോട് നഗരസഭ ചെയര്‍മാന്‍ പദവി തങ്ങളുടെ പക്കലെത്തിക്കാനുള്ള സി.പി.എമ്മിന്റെ തന്ത്രമായിരുന്നു ഈ ദാനമെന്ന് നാഷണല്‍ ലീഗ് നേതാക്കള്‍ ചിന്തിച്ചുകാണാനിടയില്ല.
ദേലംപാടിയിലെയും ചെങ്കളയിലെയും തര്‍ക്കം വല്ലാതങ്ങ് വഴങ്ങി സി.പി.എം. പരിഹരിച്ചതോടെ കാസര്‍കോട് നഗരസഭാ ചെയര്‍മാന്‍ സ്ഥാനത്തേക്ക് ആര് മത്സരിക്കണമെന്നായി വീണ്ടും ചര്‍ച്ച. കൊപ്പല്‍ അബ്ദുല്ല മത്സരിച്ചാല്‍ മുസ്ലിം ലീഗ് ക്രോസ് വോട്ട് ചെയ്യാനുള്ള സാധ്യത തള്ളിക്കളയാനാവില്ലെന്നും അങ്ങനെ സംഭവിച്ചാല്‍ ബി.ജെ.പി അംഗം ചെയര്‍മാനാകുമെന്നും ഇതുതടയാന്‍ സ്വതന്ത്രനായ എസ്.ജെ. പ്രസാദിനെ മത്സരിപ്പിക്കാമെന്നും സി.പി.എം. നേതാക്കള്‍ പറഞ്ഞപ്പോള്‍, ചെങ്കളയും ദേലംപാടിയും കിട്ടിയ സന്തോഷത്തില്‍ അതെങ്കിലും മതിയെന്ന തരത്തില്‍ നാഷണല്‍ ലീഗ് നേതാക്കള്‍ പിടിവിടുകയും എസ്.ജെ. പ്രസാദിനെ മത്സരിപ്പിക്കാന്‍ സമ്മതിക്കുകയുമായിരുന്നു. അതോടെ കൊപ്പല്‍ അബ്ദുല്ലക്ക് കപ്പിനും ചുണ്ടിനുമിടയില്‍ കാസര്‍കോട് നഗരസഭാ ചെയര്‍മാന്‍ പദവി നഷ്ടമായി. എങ്കിലും രണ്ട് പഞ്ചായത്ത് പ്രസിഡണ്ട് പദവികള്‍ തങ്ങള്‍ക്ക് ലഭിച്ചുവല്ലോ എന്ന് ആശ്വസിക്കാനുള്ള വകയും നാഷണല്‍ ലീഗിനുണ്ടായി.
വൈസ് ചെയര്‍മാന്‍ സ്ഥാനത്തേക്ക് ആര് മത്സരിക്കണമെന്നതിനെ ചൊല്ലിയും തര്‍ക്കമുണ്ടായിരുന്നു. നാഷണല്‍ ലീഗ് നേതാക്കള്‍ മുക്രി സുലൈമാന്റെ പേരാണ് നിര്‍ദ്ദേശിച്ചത്. എന്നാല്‍ സുലൈമാന്‍ മത്സരിച്ചാല്‍ മുസ്ലിം ലീഗ് വോട്ട് ലഭിക്കാനിടയില്ലെന്ന വാദമായിരുന്നു സി.പി.എം. നേതാക്കള്‍ക്ക്. ഒടുവില്‍ സാല്‍ക്കോ സലീം എന്ന ടി.എം. സുലൈമാനെ മത്സരിപ്പിക്കാന്‍ തീരുമാനിച്ച് ചര്‍ച്ച പിരിയുകയായിരുന്നു. പക്ഷെ സലീമിന് വിജയിക്കാനായില്ല. ഐ.എന്‍.എല്‍-സി.പി.എം സഖ്യത്തില്‍ നിന്ന് ഒരു വോട്ട് മുസ്ലിം ലീഗിന് മറിച്ച് വീണതോടെ സാല്‍കോ സലീം പരാജയപ്പെടുകയായിരുന്നു.
തുടര്‍ന്ന് വൈസ് ചെയര്‍മാന്‍ സ്ഥാനത്തേക്ക് മുസ്ലിം ലീഗിലെ കെ.എം. അബ്ദുല്‍ ഹമീദ് ഹാജിയും ബി.ജെ.പിയിലെ അഡ്വ. കെ. സുന്ദര്‍ റാവുവും തമ്മില്‍ മത്സരിച്ചു. ഇടത്-ഐ.എന്‍.എല്‍ കൂട്ടുകെട്ട് വോട്ടെടുപ്പില്‍ നിന്ന് വിട്ടു നിന്നതോടെ സുന്ദര്‍ റാവു വിജയിച്ച് വൈസ് ചെയര്‍മാനായി.
ടി.ഇ. അബ്ദുല്ലയുടെ നേതൃത്വത്തില്‍ വിജയിച്ച മുസ്ലിംലീഗ് നഗരസഭാ കൗണ്‍സിലര്‍മാരെ ആനയിച്ച് നടന്ന പ്രകടനം
ചെയര്‍മാന്‍ തിരഞ്ഞെടുപ്പിന്റെ തലേന്ന് അര്‍ധരാത്രി വരെ നീണ്ട ചര്‍ച്ചക്ക് ശേഷം ഓഫീസില്‍ നിന്ന് ഇറങ്ങിവരുന്ന എസ്.ജെ. പ്രസാദ്, കൊപ്പല്‍ അബ്ദുല്ല, ടി.എ. ഖാലിദ് അടക്കമുള്ളവര്‍