കാസര്‍കോട് ജില്ലയിലെ വനാതിര്‍ത്തിയോട് ചേര്‍ന്നുള്ള പ്രദേശങ്ങളില്‍ മാത്രം ഇറങ്ങിയിരുന്ന വന്യമൃഗങ്ങള്‍ ഇപ്പോള്‍ നഗരങ്ങളും ഗ്രാമങ്ങളും കയ്യടക്കുകയാണ്. ദിവസങ്ങള്‍ കഴിയുന്തോറും രൂക്ഷമാവുകയാണ് ജില്ലയിലെ വന്യമൃഗശല്യം. ഒരു കാലത്ത് ആനയും കാട്ടുപന്നിയും മാത്രമാണ് ശല്യമായിരുന്നതെങ്കില്‍ ഇന്ന് പുലിയും കുരങ്ങും അടക്കമുള്ള മൃഗങ്ങള്‍ കൃഷിക്കും ജനങ്ങളുടെ ജീവനും ഭീഷണിയാണ്. വനാതിര്‍ത്തി പഞ്ചായത്തുകളില്‍ മാത്രം ഒതുങ്ങിയിരുന്ന വന്യമൃഗഭീഷണി പുലിയുടെ വരവോടെ ജില്ലയിലാകെ വ്യാപിച്ചിരിക്കുന്നു. ഈയിടെ ജില്ല സന്ദര്‍ശിച്ച വനംമന്ത്രി എ.കെ ശശീന്ദ്രന്‍ വന്യമൃഗശല്യത്തിന് പരിഹാരമുണ്ടാക്കുമെന്ന് ഉറപ്പ് നല്‍കിയെങ്കിലും ഒന്നും നടന്നില്ല.നാട്ടിലിറങ്ങുന്ന പന്നികളെ കൊല്ലാന്‍ ചട്ടമുണ്ട്. പക്ഷേ ആര് കൊല്ലുമെന്നതാണ് ചോദ്യം. കൊല്ലാനുള്ള അനുമതി നല്‍കാനുള്ള അധികാരം തദ്ദേശ സ്ഥാപനങ്ങള്‍ക്കാണെന്നാണ് വനംവകുപ്പ് പറയുന്നത്. പക്ഷേ തങ്ങള്‍ക്ക് ഷൂട്ടര്‍മാരില്ലെന്ന് തദ്ദേശ സ്ഥാപനങ്ങളും. ഉത്തരവുണ്ടെന്നതല്ലാതെ പന്നിശല്യം തടയാന്‍ ഒരു ശ്രമവുമില്ല. നാട്ടിലിറങ്ങി കുഴികളിലോ കിണറുകളിലോ വീഴുന്ന പന്നികളെപ്പോലും വനംവകുപ്പ് രക്ഷിച്ചെടുത്ത് തുറന്നുവിടുന്ന രീതിയും കാസര്‍കോടുണ്ട്. പന്നികള്‍ കുത്തിപ്പരിക്കേല്‍പിച്ച ഒട്ടേറെ പേര്‍ ജില്ലയിലുണ്ട്. പന്നികള്‍ ഇടിച്ച് സ്‌കൂട്ടര്‍ മറിഞ്ഞു മരിച്ച സംഭവങ്ങളും. പന്നിശല്യം കാരണം ജില്ലയില്‍ നെല്‍ക്കൃഷിയും മൂന്നില്‍ രണ്ടായി കുറഞ്ഞു. മച്ചിങ്ങയും ഇളനീരും തുരന്ന് തിന്ന് മലയണ്ണാന്‍ വിഹരിക്കുമ്പോള്‍ മയിലുകള്‍ നെല്ലും പച്ചക്കറിയും നശിപ്പിക്കുന്നു. ഇതിനെല്ലാം പുറമെയാണ് ജനജീവിതത്തിന് കടുത്ത ഭീഷണിയായി പുലികളുടെ സൈ്വരവിഹാരം.
2023 സെപ്തംബര്‍ 20ന് രാത്രി 9 മണിയോടെ മുളിയാര്‍ പഞ്ചായത്തിലെ ഇരിയണ്ണിയിലാണ് ജില്ലയില്‍ ആദ്യമായി പുലിയെ കണ്ടതായി നാട്ടുകാര്‍ വ്യക്തതയോടെ പറഞ്ഞത്. പുലി കൊന്നിട്ട മുള്ളന്‍ പന്നിയുടെ ജഡവും ഇവിടെ കണ്ടിരുന്നു. എന്നാല്‍ കാട്ടുപൂച്ചയാണെന്നായിരുന്നു വനംവകുപ്പ് ഉദ്യോഗസ്ഥര്‍ മറുപടി നല്‍കിയത്. അതിനു ശേഷം മുളിയാര്‍, കാറഡുക്ക പഞ്ചായത്തുകളിലെ പല വീടുകളില്‍ നിന്നും വളര്‍ത്തുനായ്ക്കളെ പിടികൂടുന്നത് വീട്ടുകാര്‍ കണ്ടിട്ടും വനംവകുപ്പ് പഴയ നിലപാടില്‍ ഉറച്ചുനിന്നു. മുളിയാര്‍ ചീരങ്കോട്ട് നിന്ന് പശുവിനെയും കൊന്നു. ഒടുവില്‍ കഴിഞ്ഞ ആഗസ്ത് 9ന് ദേലംപാടി പഞ്ചായത്തിലെ മല്ലംപാറയില്‍ പുലി കെണിയില്‍ കുടുങ്ങി ചത്തതിനുശേഷമാണ് പുലിയുണ്ടെന്ന് അധികൃതര്‍ സമ്മതിക്കുന്നത്. അപ്പോഴേക്കും കാര്യങ്ങള്‍ കൈവിട്ടിരുന്നു. കൊളത്തൂരില്‍ പുലി കുടുങ്ങിയിട്ട് അധികനാളായില്ല. ഒന്നോ രണ്ടോ പുലിയുണ്ടായിരുന്നിടത്ത് എണ്ണം പെരുകി. ഇപ്പോള്‍ കാഞ്ഞങ്ങാട് നഗരത്തിന്റെ തൊട്ടടുത്തുള്ള മാവുങ്കാലിലും പെരിയയിലും വരെ പുലിയെത്തി. പകല്‍ സമയങ്ങളില്‍ പോലും പലസ്ഥലങ്ങളിലും കാണാന്‍ തുടങ്ങി. ക്യാമറകളും ഉപകരണങ്ങളും വാങ്ങി പണം പൊടിക്കുന്നതല്ലാതെ പ്രശ്‌നം ശാശ്വതമായി പരിഹരിക്കപ്പെടുന്നില്ല. വനംവകുപ്പ് അധികൃതര്‍ ഉണര്‍ന്ന് പ്രവര്‍ത്തിക്കുക തന്നെ വേണം.