വേനല്‍ ചൂടില്‍ തോടുകളും കുളങ്ങളും വറ്റി; താല്‍ക്കാലിക തടയണകള്‍ നിര്‍മ്മിച്ച് കര്‍ഷക കൂട്ടായ്മകള്‍
പെരഡാല വരധായിനി പുഴയിലെ മടിപ്പുവില്‍ കര്‍ഷക കൂട്ടായമയില്‍ നിര്‍മ്മിച്ച താല്‍ക്കാലിക തടയണ
ബദിയടുക്ക: വേനല്‍ ചൂടിന്റെ കാഠിന്യം വര്‍ധിച്ചതോടെ പുഴകളും തോടുകളും മറ്റു ജലസ്രോതസ്സുകളും വറ്റാന്‍ തുടങ്ങി. വര്‍ഷങ്ങള്‍ക്ക് മുമ്പ് വരെ പരമ്പരാഗതമായി നിര്‍മ്മിച്ചിരുന്ന തടയണകളായിരുന്നു കാര്‍ഷിക വിളകള്‍ക്കുള്ള വെള്ളത്തിനായി കര്‍ഷകര്‍ ആശ്രയിച്ചിരുന്നത്. മുന്‍ കാലങ്ങളില്‍ തടയണ നിര്‍മ്മാണത്തിന് ധനസഹായവും ലഭിച്ചിരുന്നു. എന്നാല്‍ തൊഴിലുറപ്പ് പദ്ധതി നടപ്പിലായതോടെ ജലസംരക്ഷണം ഉറപ്പ് വരുത്തുന്നതിന് വേണ്ടിയുള്ള തടയണ നിര്‍മ്മാണ പ്രവര്‍ത്തനം തൊഴിലുറപ്പ് പദ്ധതിയില്‍ നടപ്പാക്കണമെന്ന ഉത്തരവ് സര്‍ക്കാര്‍ പുറപ്പെടുവിച്ചിരുന്നു. ഇത് ഒരു പരിധി വരെയെങ്കിലും കര്‍ഷകര്‍ക്ക് സഹായകമായിരുന്നു. എന്നാല്‍ തൊഴിലുറപ്പ് നിയമപ്രകാരം തടയണ പ്രവൃത്തി നടപ്പാക്കേണ്ട എന്ന കേന്ദ്ര സര്‍ക്കാര്‍ നിര്‍ദ്ദേശം കര്‍ഷകര്‍ക്ക് വിനയായി. ഇതോടെ തടയണ നിര്‍മ്മാണവും നിലച്ചു. എന്‍മകജെ പഞ്ചായത്തിലൂടെ കടന്നു പോകുന്ന അഡുക്കസ്ഥല പുഴയില്‍ അഡുക്കസ്ഥല, ബാക്കിലപദവ്, കളത്തടുക്ക, എരുഗല്ല്, ബദിയടുക്ക, കുമ്പഡാജെ, ബെള്ളൂര്‍, കാറഡുക്ക, പുത്തിഗെ തുടങ്ങിയ ഭാഗങ്ങളിലെ പുഴകള്‍ക്കും തോടുകള്‍ക്കും കുറുകെ തടയണകള്‍ പണിതിരുന്നു. ഡിസംബര്‍ അവസാനം പണി തീരുന്ന തരത്തിലായിരുന്നു നിര്‍മ്മാണം. ഇതുവഴി പ്രദേശത്തെ കിണര്‍, കുഴല്‍ കിണര്‍, തോട് തുടങ്ങിയ ജലസ്രോതസ്സുകളില്‍ ജലവിതാനം ഉയരുകയും കാലവര്‍ഷം തുടങ്ങുന്നത് വരെ സമീപ പ്രദേശങ്ങളിലെ കാര്‍ഷിക വിളകള്‍ക്ക് ജലസേചനത്തിനുള്ള വെള്ളം ലഭിച്ചിരുന്നു. ഈ പ്രദേശങ്ങളില്‍ ഏറ്റവും കൂടുതല്‍ തെങ്ങ്, കവുങ്ങ്, നെല്ല്, പച്ചക്കറി തുടങ്ങിയവ കൃഷിചെയ്യുന്ന കര്‍ഷകരാണുള്ളത്. കോണ്‍ക്രീറ്റ് തടയണകള്‍ക്ക് മാത്രം സാമ്പത്തിക സഹായം നല്‍കിയാല്‍ മതിയെന്ന കേന്ദ്ര നിര്‍ദ്ദേശം വന്നതോടെയാണ് തല്‍ക്കാലിക തടയണ നിര്‍മ്മാണം നിലക്കാന്‍ കാരണമായത്. അരനൂറ്റാണ്ട് മുമ്പ് വരെ കര്‍ഷകര്‍ കണ്ടെത്തിയ മാര്‍ഗമാണ് തടയണ വഴിയുള്ള ജലസംരക്ഷണം. ഉള്‍ഭാഗത്തെ ചെറുതോടുകള്‍ക്കും തടയണ പണിതിരുന്നു. കാലവര്‍ഷം തുടങ്ങുമ്പോള്‍ പൊളിച്ച് മാറ്റുന്നതാണ് ഇതിന്റെ രീതി. കല്ലും മണ്ണും ഉപയോഗിച്ച് പ്രകൃതിക്കിണങ്ങിയ രീതിയില്‍ നിര്‍മ്മിക്കുന്ന തടയണകളില്‍ ഏറെ വെള്ളം കെട്ടി നില്‍ക്കുന്നത് വേനല്‍കാലത്തെ പതിവ് കാഴ്ചയായിരുന്നു. തൊഴിലുറപ്പ് പദ്ധതി നടപ്പില്‍ വരുന്നതിന് മുമ്പ് പ്രദേശത്തെ കര്‍ഷകര്‍ സംഘം ചേര്‍ന്ന് നിശ്ചിത വിഹിതമെടുത്താണ് ഇത് നിര്‍മ്മിച്ചിരുന്നത്. നാമമാത്രമായ സഹായമാണ് പഞ്ചായത്ത് ചെയ്തിരുന്നത്. ഒരു തടയണക്ക് 50,000 രൂപ വരെയാണ് ചെലവ്. സ്ഥിരം തടയണകളില്‍ നിന്നുമുണ്ടാകുന്ന ചോര്‍ച്ചയും ആയിരം അടി വരെ താഴ്ചയില്‍ കിടക്കുന്ന കുഴല്‍ കിണറുകളിലെ വെള്ളം വര്‍ഷങ്ങള്‍ക്കകം വറ്റുന്നതും താല്‍ക്കാലിക തടയണകളുടെ പ്രധാന്യം ഏറിയതായി പറയുമ്പോഴും പലരും തടയണ നിര്‍മ്മാണത്തില്‍ നിന്നും പിന്തിരിഞ്ഞു. അതേസമയം കാര്‍ഷിക ആവശ്യത്തിനുള്ള ജല ലഭ്യത കണക്കിലെടുത്ത് കര്‍ഷകരില്‍ പലരും പുഴകള്‍ക്കും തോടുകള്‍ക്കും കുറുകെ കര്‍ഷകരുടെ കൂട്ടായ്മയില്‍ തടയണ നിര്‍മ്മാണവുമായി രംഗത്ത് വന്നതോടെ പഴയകാലത്തെ പോലെ പുഴകളും തോടുകളും ജലം കെട്ടി നില്‍ക്കുന്നതോടൊപ്പം സമീപത്തെ കിണറുകളിലും കുളങ്ങളിലും ജലനിരപ്പ് വര്‍ധിച്ചു.