രണ്ടാമത്തെ തിങ്കളാഴ്ചയും ഞെട്ടിപ്പിച്ച് 'തുടരും': ബോക് സ് ഓഫീസില്‍ സൂപ്പര്‍ കലക്ഷന്‍!

കൊച്ചി: മോഹന്‍ലാല്‍- ശോഭന കൂട്ടുകെട്ടില്‍ വര്‍ഷങ്ങള്‍ക്ക് ശേഷം ബിഗ് സ്‌ക്രീനില്‍ ഒന്നിക്കുന്ന ചിത്രം 'തുടരും' ഏറ്റെടുത്ത് പ്രേക്ഷകര്‍. 2004 ല്‍ മാമ്പഴക്കാലം എന്ന ചിത്രത്തിലായിരുന്നു ഇരുവരും ഒരുമിച്ചത്. അതുകൊണ്ടുതന്നെ ഇരുവരുടേയും കൂട്ടുകെട്ടില്‍ ഒരു ചിത്രം എത്തുന്നു എന്നത് തന്നെയായിരുന്നു തുടരും എന്ന സിനിമയിലെ പ്രേക്ഷകരുടെ പ്രതീക്ഷയും.

മോഹന്‍ലാല്‍ ഷണ്‍മുഖന്‍ എന്ന ടാക്‌സി ഡ്രൈവറായും ശോഭന ലളിത എന്ന വീട്ടമ്മയായും ആണ് ചിത്രത്തില്‍ എത്തിയത്. രണ്ടുപേരെയും പ്രേക്ഷകര്‍ സ്വീകരിച്ച് കഴിഞ്ഞു. ഇരുവരുടേയും പഴയ ചിത്രങ്ങള്‍ കാണുന്ന അതേ ആവേശം തന്നെയാണ് ഈ ചിത്രത്തോടും പ്രേക്ഷകര്‍ കാണിച്ചത്.

കുടുംബപ്രേക്ഷകരെ ഏറെ ആകര്‍ഷിക്കുന്ന ഒരു ചിത്രമാണ് ഇത്. ഏപ്രില്‍ 25 ന് തിയറ്ററുകളില്‍ എത്തിയ ചിത്രം വലിയ പ്രീ റിലീസ് പബ്ലിസിറ്റി ഇല്ലാതെ ആദ്യദിനം മുതല്‍ തന്നെ ജനം ഏറ്റെടുത്തു കഴിഞ്ഞു. ചിത്രത്തിന്റെ ബജറ്റും ലഭിക്കുന്ന കളക്ഷനും വച്ച് നോക്കിയാല്‍ മലയാള സിനിമയില്‍ സമീപകാലത്ത് ഏറ്റവും ജനപ്രീതി നേടിയ ചിത്രമായി മാറുകയാണ് തുടരും. ചിത്രം ഒരു ഫാമിലി ഡ്രാമ ആണെന്നും എന്നാല്‍ ഫീല്‍ ഗുഡ് അല്ലെന്നുമായിരുന്നു റിലീസിന് മുന്‍പ് സംവിധായകന്‍ തരുണ്‍ മൂര്‍ത്തി പറഞ്ഞിരുന്നത്.

ഹൈപ്പ് കൂട്ടാതിരിക്കാനായി ചിത്രത്തിന്റെ ആക്ഷന്‍, ത്രില്ലര്‍ അംശങ്ങള്‍ അണിയറക്കാര്‍ ബോധപൂര്‍വ്വം മറച്ചുവെക്കുകയായിരുന്നു. എന്നാല്‍ ആദ്യ ഷോകള്‍ക്കിപ്പുറം വമ്പന്‍ മൗത്ത് പബ്ലിസിറ്റി നേടിയതോടെ ചിത്രം ബോക്‌സ് ഓഫീസില്‍ മുന്നേറിക്കൊണ്ടിരിക്കുകയാണ്.

രണ്ടാം തിങ്കളാഴ്ചയും മികച്ച ആഭ്യന്തര കളക്ഷനാണ് ചിത്രം ഉറപ്പാക്കിയിരിക്കുന്നത്. രണ്ടാം മണ്‍ഡേ ടെസ്റ്റ് എന്ന് വിളിക്കാവുന്ന വര്‍ക്കിംഗ് ഡേ ആയ മെയ് 5ന് ചിത്രം ആഭ്യന്തര ബോക്‌സോഫീസില്‍ 5.15 കോടി നേടിക്കഴിഞ്ഞു. റിലീസ് ചെയ്ത് 11 ദിവസം കഴിഞ്ഞിട്ടും ചിത്രത്തിന്റെ നെറ്റ് കളക്ഷന്‍ ഇതുവരെ 5 കോടിക്ക് താഴെ പോയിട്ടില്ല എന്നതും മുന്നേറാനുള്ള സൂചനയായി കാണുന്നു.

പല കളക്ഷന്‍ റെക്കോഡുകളും ചിത്രം തകര്‍ത്തേക്കും എന്ന സൂചനകളും പുറത്തുവരുന്നുണ്ട്. ട്രാക്കര്‍മാര്‍ നല്‍കുന്ന ഏറ്റവും പുതിയ വിവരം അനുസരിച്ച് ചിത്രം ആഗോള ബോക്‌സ് ഓഫീസില്‍ നിന്ന് 150 കോടി കടന്നിട്ടുണ്ട്. പുലിമുരുകനെ മറികടന്ന് മലയാളത്തില്‍ 150 കോടിയില്‍ അധികം നേടുന്ന ആറാമത്തെ ചിത്രമായി തുടരും.

ആവേശവും ആടുജീവിതവുമാണ് ഇതിന് മുമ്പ് കളക്ഷനില്‍ മുന്നിട്ടുനില്‍ക്കുന്നത്. ആവേശം 156 കോടിയും ആടുജീവിതം 158.50 കോടിയുമാണ് നേടിയത്. ഇന്നത്തെ കളക്ഷന്‍ കൊണ്ട് തുടരും ഈ രണ്ട് ചിത്രങ്ങളെയും മറികടക്കുമെന്നാണ് പ്രേക്ഷകരുടെ കണക്കു കൂട്ടല്‍.

മോഹന്‍ ലാല്‍, ശോഭന എന്നിവര്‍ക്ക് പുറമെ ബിനു പപ്പു, ഫര്‍ഹാന്‍ ഫാസില്‍, മണിയന്‍പിള്ള രാജു എന്നിവര്‍ക്കൊപ്പം നിരവധി പുതുമുഖങ്ങളും ചിത്രത്തില്‍ അണിനിരക്കുന്നുണ്ട്. ഷാജി കുമാര്‍ ആണ് ഛായാഗ്രഹണം. എഡിറ്റിംഗ് നിഷാദ് യൂസുഫ്, ഷെഫീഖ് വി ബി, സംഗീതം ജേക്‌സ് ബിജോയ്, എക്‌സിക്യൂട്ടീവ് പ്രൊഡ്യൂസര്‍ അവന്തിക രഞ്ജിത്ത്

ശബ്ദ സംവിധാനം വിഷ്ണു ഗോവിന്ദ്, കലാസംവിധാനം ഗോകുല്‍ ദാസ്. കെ ആര്‍ സുനിലിന്റെ കഥയ്ക്ക് തരുണ്‍ മൂര്‍ത്തിയും കെ ആര്‍ സുനിലും ചേര്‍ന്നാണ് തിരക്കഥ ഒരുക്കിയിരിക്കുന്നത്.