സംവിധായകന്‍ രാജമൗലി ഒരുക്കുന്ന ആക്ഷന്‍ ചിത്രത്തില്‍ പൃഥ്വിരാജ് സുകുമാരനും; മഹേഷ് ബാബുവും പ്രിയങ്കാ ചോപ്രയും നായികാ നായകന്‍മാര്‍
ആക്ഷന്‍ രംഗങ്ങളില്‍ അഭിനയിക്കുന്നത് 3000 പേര്;
സൂപ്പര്‍ ഹിറ്റ് ചിത്രം ആര്‍ആര്‍ആറിന്റെ സംവിധായകന്‍ രാജമൗലി ഒരുക്കുന്ന ആക്ഷന്‍ ചിത്രത്തില്‍ പൃഥ്വിരാജ് സുകുമാരനും നിര്‍ണായക കഥാപാത്രത്തില്‍ അഭിനയിക്കുന്നതായുള്ള റിപ്പോര്‍ട്ടുകള്‍ പുറത്ത്. മഹേഷ് ബാബുവും പ്രിയങ്കാ ചോപ്രയും ആണ് ചിത്രത്തിലെ നായികാ നായകന്‍മാര്‍. ഇതുവരെ പേരിട്ടിട്ടില്ലാത്ത ചിത്രത്തിന് എസ്.എസ്.എം.ബി 29 എന്നാണ് താല്‍ക്കാലികമായി ഇട്ടിരിക്കുന്ന പേര്.
വന്‍ ആക്ഷന്‍ രംഗം രാജമൗലി ചിത്രത്തില്‍ ഉണ്ടാകും എന്നും ഏകദേശം 3000 പേര് ആക്ഷന്‍ രംഗത്തില്‍ പങ്കെടുക്കുമെന്നുമാണ് റിപ്പോര്‍ട്ട്. മെയിലോ ജൂണിലോ ഹൈദരാബാദിലായിരിക്കും ആക്ഷന്‍ രംഗം ചിത്രീകരിക്കുക. മഹേഷ് ബാബുവും പ്രിയങ്കയും പൃഥ്വിരാജും ആക്ഷന്‍ രംഗങ്ങള്‍ക്കായുള്ള തയാറെടുപ്പുകളിലാണെന്നുള്ള റിപ്പോര്‍ട്ടുണ്ടെങ്കിലും ഇക്കാര്യത്തില്‍ ഔദ്യോഗിക സ്ഥിരീകരണം ഉണ്ടായിട്ടില്ല.
ഹൈദരാബാദിലെ അലൂമിനിയം ഫാക്റ്ററിയില്‍ ആണ് സിനിമയുടെ ചിത്രീകരണം രാജമൗലി ആരംഭിച്ചത്. ചിത്രത്തിന്റെ ആദ്യ ഷെഡ്യൂളില്‍ മഹേഷ് ബാബുവും പ്രിയങ്ക ചോപ്രയും പങ്കെടുത്തിരുന്നു. പ്രധാന കഥാപാത്രമായി പൃഥ്വിരാജ് സുകുമാരനും ഇടയ്ക്ക് ജോയിന്‍ ചെയ്തിരുന്നു എന്നാണ് റിപ്പോര്‍ട്ടുകള്‍. മല്ലിക സുകുമാരനും ഇക്കാര്യം ശരിവച്ചിരുന്നു. ഒഡിഷയിലെ വിവിധ ലൊക്കേഷനുകളിലാണ് അടുത്ത ഷെഡ്യൂള്‍ രാജമൗലി പ്ലാന്‍ ചെയ്തിരിക്കുന്നത്.
ട്രെക്കിംഗിന് സാധ്യതയുള്ള വനമേഖലകള്‍ക്കായുള്ള അന്വേഷണത്തിന് ഒടുവിലാണ് രാജമൗലിയും ടീമും ഒഡിഷയിലെ വിവിധ ലൊക്കേഷനുകള്‍ ചിത്രീകരണത്തിനായി തിരഞ്ഞെടുത്തത്. ആഫ്രിക്കന്‍ മഴക്കാടുകളെ അനുസ്മരിപ്പിക്കുന്ന ദിയോമലി, കൊരപുത് ജില്ലയിലെ വിവിധ സ്ഥലങ്ങള്‍ എന്നിവിടങ്ങളിലാണ് രണ്ടാം ഷെഡ്യൂള്‍ നടക്കുക. ഇതെല്ലാം പൂര്‍വ്വഘട്ട മലനിരകളില്‍ പെടുന്ന പ്രദേശങ്ങളാണ്. അതില്‍ ദിയോമലിയാണ് ഒഡിഷയില്‍ ഏറ്റവും ഉയരമുള്ള സ്ഥലം.
ആഫ്രിക്കന്‍ ജംഗിള്‍ അഡ്വഞ്ചര്‍ വിഭാഗത്തില്‍ പെടുന്ന ചിത്രമാണ് ഇതെന്നും വിദേശ മാര്‍ക്കറ്റ് കൂടി ലക്ഷ്യമിട്ടാണ് രാജമൗലി ഈ ചിത്രം ഒരുക്കുന്നതെന്നും റിപ്പോര്‍ട്ടുണ്ട്.