ഒടുവില്‍ ആരാധകര്‍ പ്രതീക്ഷിച്ചിരുന്നതും എത്തി; എമ്പുരാനിലെ സ്റ്റീഫന്‍ നെടുമ്പള്ളിയുടെ പോസ്റ്റര്‍ പുറത്തുവിട്ട് അണിയറക്കാര്‍
എമ്പുരാന്റെ റിലീസ് തീയതി പുറത്തുവിട്ടത് മുതല്‍ രാജ്യമെങ്ങുമുള്ള പ്രേക്ഷകര്‍ ചിത്രത്തിനായി കാത്തിരിക്കുകയാണ്. അതിനിടെ എമ്പുരാനിലെ സ്റ്റീഫന്‍ നെടുമ്പള്ളിയുടെ പോസ്റ്റര്‍ ആദ്യമായി പുറത്തുവിട്ടിരിക്കുകയാണ് അണിയറ പ്രവര്‍ത്തകര്‍. ഇതുവരെ അബ്രാം ഖുറേഷിയുടെ പോസ്റ്ററുകളായിരുന്നു പുറത്തുവിട്ടിരുന്നത്. ലൂസിഫറില്‍ പ്രധാന്യം സ്റ്റീഫന്‍ നെടുമ്പള്ളിക്കായിരുന്നു.
തെന്നിന്ത്യന്‍ സിനിമാ പ്രേമികളും ആരാധകരും ഏറെ ആവേശത്തോടെ കാത്തിരിക്കുന്ന, ലൈക്ക പ്രൊഡക്ഷന്‍സ്, ആശീര്‍വാദ് സിനിമാസ്, ശ്രീ ഗോകുലം മൂവീസ് നിര്‍മ്മിച്ച മോഹന്‍ലാല്‍ ചിത്രം എമ്പുരാന്‍ മാര്‍ച്ച് 27നാണ് ആഗോള റിലീസായെത്തുന്നത്. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളില്‍ പാന്‍ ഇന്ത്യന്‍ റിലീസായി എത്തുന്ന ചിത്രം സംവിധാനം ചെയ്തിരിക്കുന്നത് പൃഥ്വിരാജ് സുകുമാരനും, രചന നിര്‍വഹിച്ചിരിക്കുന്നത് മുരളി ഗോപിയുമാണ്.
ഇന്ത്യയ്ക്ക് പുറത്ത് എമ്പുരാന്റെ അഡ്വാന്‍സ് ബുക്കിംഗും പൊടിപൊടിക്കുന്നു. മലയാളത്തിന്റെ ആദ്യത്തെ 1000K ഓസ്‌ട്രേലിയന്‍ ഡോളര്‍ ചിത്രമായിക്കഴിഞ്ഞു പ്രീ സെയിലില്‍ എമ്പുരാന്‍. പ്രീ സെയിലില്‍ ആദ്യത്തെ 200K ഓസ്‌ട്രേലിയന്‍ ഡോളര്‍ മലയാള ചിത്രവുമായി എമ്പുരാന്‍. എമ്പുരാന്‍ ഓസ്‌ട്രേലിയയില്‍ നിന്ന് ഇതുവരെ 1.72 കോടി രൂപയാണ് പ്രീ സെയിലില്‍ നേടിയിട്ടുള്ളത്.
2019 ല്‍ റിലീസ് ചെയ്ത ബ്ലോക്ക് ബസ്റ്റര്‍ ചിത്രം ലൂസിഫറിന്റെ രണ്ടാം ഭാഗമായി എത്തുന്ന എമ്പുരാന്‍ നിര്‍മ്മിച്ചിരിക്കുന്നത്, ലൈക്ക പ്രൊഡക്ഷന്‍സ്, ആശീര്‍വാദ് സിനിമാസ്, ശ്രീ ഗോകുലം മൂവീസ് എന്നിവയുടെ ബാനറില്‍ സുഭാസ്‌കരന്‍, ആന്റണി പെരുമ്പാവൂര്‍, ഗോകുലം ഗോപാലന്‍ എന്നിവര്‍ ചേര്‍ന്നാണ്. മൂന്നു ഭാഗങ്ങളായി കഥ പറയുന്ന ഒരു സിനിമാ സീരിസിന്റെ രണ്ടാം ഭാഗമാണ് എമ്പുരാന്‍.
2025 ജനുവരി 26 ന് ആദ്യ ടീസര്‍ പുറത്ത് വിട്ടുകൊണ്ട് പ്രമോഷന്‍ ജോലികള്‍ ആരംഭിച്ച ചിത്രത്തിന്റെ, കഥാപാത്രങ്ങളെ പരിചയപ്പെടുത്തുന്ന രീതിയും ഏറെ ശ്രദ്ധ നേടി. ഓരോ അഭിനേതാക്കളും തങ്ങളുടെ കഥാപാത്രങ്ങളെ കുറിച്ച് സംസാരിക്കുന്ന വീഡിയോകള്‍ പുറത്തു വിടുന്നത് ഫെബ്രുവരി ഒന്‍പത് മുതല്‍ ആരംഭിച്ച്, അതവസാനിച്ചത് ഫെബ്രുവരി 26 ന് വന്ന മോഹന്‍ലാലിന്റെ കാരക്ടര്‍ പോസ്റ്റര്‍, വീഡിയോ എന്നിവയിലൂടെയാണ്.
മോഹന്‍ലാല്‍ അവതരിപ്പിക്കുന്ന സ്റ്റീഫന്‍ നെടുമ്പള്ളി/ഖുറേഷി അബ്രാം, പൃഥ്വിരാജ് അവതരിപ്പിക്കുന്ന സയ്ദ് മസൂദ് എന്നിവരുടെ കാരക്ടര്‍ പോസ്റ്ററുകളും വീഡിയോകളുമാണ് ഫെബ്രുവരി 26 ന് എത്തിയത്. ഓരോ ദിവസവും രണ്ട് കഥാപാത്രങ്ങളെന്ന കണക്കില്‍, 18 ദിവസം കൊണ്ട് ചിത്രത്തിലെ 36 കഥാപാത്രങ്ങളെയാണ് പ്രേക്ഷകര്‍ക്ക് പരിചയപ്പെടുത്തിയത്.