ജോജു ജോര്‍ജും ഷാജി കൈലാസും ഒന്നിക്കുന്ന ആക്ഷന്‍ ത്രില്ലര്‍ ചിത്രം 'വരവ്'; മൂന്നാറില്‍ ചിത്രീകരണം ആരംഭിച്ചു
മൂന്നാര്‍, മറയൂര്‍, കാന്തല്ലൂര്‍, തേനി എന്നിവിടങ്ങളിലാണ് ചിത്രീകരണം;
ജോജു ജോര്‍ജിനെ നായകനാക്കി ഷാജി കൈലാസ് സംവിധാനം ചെയ്യുന്ന ആക്ഷന്‍ ത്രില്ലര്‍ ചിത്രം വരവ് എന്ന ചിത്രത്തിന്റെ ചിത്രീകരണം മൂന്നാറില്‍ ആരംഭിച്ചു. സെപ്റ്റംബര്‍ 8 ന് മൂന്നാറിലെ തലയാറില്‍ പരമ്പരാഗത പൂജാ ചടങ്ങുകളോടെയാണ് ചിത്രീകരണം ആരംഭിച്ചത്. മൂന്നാര്‍, മറയൂര്‍, കാന്തല്ലൂര്‍, തേനി എന്നിവിടങ്ങളിലാണ് ചിത്രീകരണം.
വലിയ മുതല്‍മുടക്കിലും വന്‍ താരനിരയുടെ അകമ്പടിയോടെയുമെത്തുന്ന ചിത്രം പൂര്‍ണ്ണമായും ആക്ഷന്‍ ത്രില്ലര്‍ ജോണറിലാണ് അവതരിപ്പിക്കുന്നത്. ജോജു ജോര്‍ജും ഷാജി കൈലാസും ആദ്യമായി ഒന്നിക്കുന്ന ചിത്രം കൂടിയാണ് ഇത്. 'പ്രതികാരം ഒരു വൃത്തികെട്ട ബിസിനസ്സല്ല' എന്ന ടാഗ് ലൈനോടെയാണ് ചിത്രം എത്തുന്നത്. കഠിനാദ്ധ്വാനത്തിലൂടെ ഹൈറേഞ്ചില്‍ ആളും അര്‍ത്ഥവും സമ്പത്തും ആവശ്യത്തിലധികം നേടിയ പോളി എന്ന പോളച്ചന്റെ ജീവിത പോരാട്ടത്തിന്റെ കഥ പറയുകയാണ് വരവ് എന്ന ഈ ചിത്രത്തിലൂടെ.
പോളച്ചന് ഒരു നിര്‍ണ്ണായകഘട്ടത്തില്‍ വീണ്ടും ഒരു വരവിനിറങ്ങേണ്ടി വരുന്നു. ഈ വരവില്‍ കാലം കാത്തുവച്ച ചില പ്രതികാരങ്ങളുടെ വ്യക്തമായ കണക്കു തീര്‍ക്കലുമൊക്കെയുണ്ട്. പോളിയുടെ ഒരൊന്നൊന്നര വരവ് എന്നു തന്നെ ഇതിനെ പറയാം. ഈ വരവാണ് ഇവിടെ ആഘോഷിക്കപ്പെടുന്നത്. പ്രേക്ഷകരെ പോളച്ചന് എന്ന കഥാപാത്രത്തിലേക്ക് എളുപ്പത്തില്‍ ആകര്‍ഷിക്കും വിധത്തിലുള്ള ഒരു ജനകീയ കഥാപാത്രമാക്കിത്തന്നെയാണ് ഷാജി കൈലാസ് അവതരിപ്പിക്കുന്നത്.
ഒരു ദശാബ്ദത്തിലേറെയായി അഭിനയത്തില്‍ നിന്നും വിട്ടുനല്‍ക്കുകയായിരുന്ന തമിഴ് നടി സുകന്യയുടെ മലയാള സിനിമയിലേക്കുള്ള തിരിച്ചുവരവ് കൂടിയാണ് ഈ ചിത്രം. പ്രിയദര്‍ശന്റെ 2014-ല്‍ പുറത്തിറങ്ങിയ ആമയും മുയലും എന്ന ചിത്രത്തിലാണ് സുകന്യ അവസാനമായി അഭിനയിച്ചത്.
മുരളി ഗോപി, അര്‍ജുന്‍ അശോകന്‍, ബാബുരാജ്, വിന്‍സി അലോഷ്യസ്, സാനിയ ഇയ്യപ്പന്‍, അശ്വിന്‍ കുമാര്‍, അഭിമന്യു ഷമ്മി തിലകന്‍, ബിജു പപ്പന്‍, ബോബി കുര്യന്‍, അസീസ് നെടുമങ്ങാട്, ശ്രീജിത്ത് രവി, ദീപക് പറമ്പോല്‍, കോട്ടയം രമേശ്, ബാലാജി ശര്‍മ്മ, ചാലി പാലാ, രാധികാ രാധാകൃഷ്ണന്‍ എന്നിവരും പ്രധാന വേഷങ്ങളിലെത്തുന്നു.
ചിന്താമണി കൊലക്കേസ്, റെഡ് ചില്ലീസ്, ദ്രോണ 2010 എന്നീ ചിത്രങ്ങളിലൂടെ പ്രശസ്തനായ എകെ സാജനാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ഓള്‍ഗ പ്രൊഡക്ഷന്‍സിന്റെ ബാനറില്‍ നൈസി റെജിയാണ് വരവ് നിര്‍മ്മിച്ചിരിക്കുന്നത്. ജോമി ജോസഫാണ് സഹനിര്‍മ്മാതാവ്.
ചിത്രത്തിന്റെ സാങ്കേതിക സംഘത്തില്‍ ഛായാഗ്രാഹകന്‍ സുജിത് വാസുദേവ്, എഡിറ്റര്‍ ഷമീര്‍ മുഹമ്മദ്, സംഗീത സംവിധായകന്‍ സാം സി എസ്, കലാ സംവിധായകന്‍ സാബു റാം എന്നിവര്‍ ഉള്‍പ്പെടുന്നു. അര ഡസനോളം വരുന്ന ഇതിലെ ആക്ഷന്‍ രംഗങ്ങള്‍ ദക്ഷിണേന്ത്യയിലെ ഏറ്റം മികച്ച ആക്ഷന്‍ കോറിയോഗ്രാഫേഴ്‌സ് ആയ കലൈ കിംഗ് സ്റ്റണ്‍, ഫീനിക്‌സ് പ്രഭു, സ്റ്റണ്ട് സില്‍വ, കനല്‍ കണ്ണന്‍ എന്നിവര്‍ ഒരുക്കുന്നു.
അതേസമയം, ജോജുവിന്റേതായി നിരവധി സിനിമകള്‍ അണിയറയില്‍ ഒരുങ്ങുന്നുണ്ട്. അതില്‍ ജീത്തു ജോസഫിന്റെ 'വലതു വശത്തെ കള്ളന്‍' എന്ന ചിത്രവും ഉണ്ട്. ഉര്‍വശിയും ബിജു മേനോനും ആഷയും പ്രധാന കഥാപാത്രങ്ങളെ അവതരിപ്പിക്കുന്നുണ്ട്. തന്റെ ആദ്യ സംവിധാന സംരംഭമായ പാനിയുടെ രണ്ടാം ഭാഗമായ ഡീലക്‌സ് സംവിധാനം ചെയ്യാനുള്ള ഒരുക്കവും നടത്തിവരുന്നുണ്ട്.
ഷാജി കൈലാസ് അവസാനമായി സംവിധാനം ചെയ്തത് 2024-ല്‍ ഭാവന നായികയായി അഭിനയിച്ച ഹൊറര്‍ ചിത്രമായ ഹണ്ടാണ്.
ഛായാഗ്രഹണം എസ് ശരവണന്‍, എഡിറ്റിംഗ് ഷമീര്‍ മുഹമ്മദ്, കലാസംവിധാനം സാബു റാം, മേക്കപ്പ് സജി കാട്ടാക്കട, കോസ്റ്റ്യൂം ഡിസൈന്‍ സമീറ സനീഷ്, സ്റ്റില്‍സ് ഹരി തിരുമല, ചീഫ് അസോസിയേറ്റ് ഡയറക്ടര്‍ സ്യമന്തക് പ്രദീപ്, പ്രൊഡക്ഷന്‍ മാനേജേഴ്‌സ് ശിവന്‍ പൂജപ്പുര, അനില്‍ അന്‍ഷാദ്, പ്രൊഡക്ഷന്‍ എക്‌സിക്യൂട്ടീവ് പ്രതാപന്‍ കല്ലിയൂര്‍, പ്രൊഡക്ഷന്‍ കണ്‍ട്രോളര്‍ വിനോദ് മംഗലത്ത്. മൂന്നാര്‍, മറയൂര്‍, കാന്തല്ലൂര്‍, തേനി, ഇടുക്കി എന്നിവിടങ്ങളിലായി സിനിമയുടെ ചിത്രീകരണം പൂര്‍ത്തിയാകും. പിആര്‍ഒ വാഴൂര്‍ ജോസ്.