ഹൊററും ആക്ഷനും ക്രൈമും ഒത്തിണങ്ങിയ ഷാജി കൈലാസ് - ഭാവന ചിത്രം 'ഹണ്ട്' ഒടിടിയിലേക്ക്
മെഡിക്കല്‍ ക്യാമ്പസ് പശ്ചാത്തലമാക്കി ഒരുക്കിയ ഹൊറര്‍ ത്രില്ലര്‍ ആണിത്.;
ഹൊററും ആക്ഷനും ക്രൈമും ഒത്തിണങ്ങിയ ഷാജി കൈലാസ് - ഭാവന ചിത്രം ഹണ്ട് ഒടിടിയിലേക്ക്. കഴിഞ്ഞ വര്‍ഷം ഓഗസ്റ്റ് 23 ന് ഭാവനയെ കേന്ദ്ര കഥാപാത്രമാക്കി ഷാജി കൈലാസ് സംവിധാനം ചെയ്ത ചിത്രമാണ് ഹണ്ട്. മനോരമ മാക്‌സിലൂടെയാണ് ചിത്രം സ്ട്രീമിംഗിന് ഒരുങ്ങുന്നത്. റിലീസ് തീയതി പ്രഖ്യാപിച്ചിട്ടില്ല. ഹൊററും ആക്ഷനും ക്രൈമും എല്ലാം കൂട്ടിച്ചേര്‍ത്ത് ഒരു ക്ലീന്‍ എന്റര്‍ടൈനറായിട്ടാണ് ചിത്രത്തിന്റെ അവതരണം. പാലക്കാട് ആയിരുന്നു സിനിമയുടെ പ്രധാന ലൊക്കേഷന്‍.
മെഡിക്കല്‍ ക്യാമ്പസ് പശ്ചാത്തലമാക്കി ഒരുക്കിയ ഹൊറര്‍ ത്രില്ലര്‍ ആണിത്. മലയാളത്തിലെ ഏറ്റവും പുതിയ തലമുറക്കാരായ ഒരു കൂട്ടം ചെറുപ്പക്കാരുടെ നിര തന്നെ ചിത്രത്തില്‍ അണിനിരക്കുന്നുണ്ട്. രാഹുല്‍ മാധവ്, ഡെയ്ന്‍ ഡേവിഡ്, അജ്മല്‍ അമീര്‍, അനു മോഹന്‍, ചന്തുനാഥ് തുടങ്ങിയവര്‍ ചിത്രത്തില്‍ മെഡിക്കല്‍ വിദ്യാര്‍ത്ഥികളായി എത്തുന്നു.
അതിഥി രവി, രണ്‍ജി പണിക്കര്‍ എന്നിവര്‍ ഈ ചിത്രത്തിലെ മറ്റു രണ്ട് മുഖ്യ കഥാപാത്രങ്ങളെ അവതരിപ്പിക്കുന്നു. നന്ദു വിജയകുമാര്‍, ബിജു പപ്പന്‍, കോട്ടയം നസീര്‍, ജി സുരേഷ് കുമാര്‍, കൊല്ലം തുളസി, സുധി പാലക്കാട്, ദിവ്യ നായര്‍, സോനു എന്നിവരും പ്രധാന വേഷങ്ങളിലുണ്ട്.
ഡോ. കീര്‍ത്തി എന്ന കഥാപാത്രത്തെയാണ് ഭാവന അവതരിപ്പിക്കുന്നത്. ഹൗസ് സര്‍ജന്‍സി കഴിഞ്ഞ് സര്‍വ്വീസില്‍ പ്രവേശിക്കുന്നവരില്‍ സീനിയറാണ് ഡോ. കീര്‍ത്തി. അവരുടെ മുന്നിലെത്തുന്ന ഒരു കൊലപാതക കേസ് ആണ് ചിത്രത്തിന്റെ പ്രമേയം.
തിരക്കഥ നിഖില്‍ ആനന്ദ്, ഗാനങ്ങള്‍ സന്തോഷ് വര്‍മ്മ, ഹരിനരായണന്‍, സംഗീതം കൈലാസ് മേനോന്‍, ഛായാഗ്രഹണം ജാക്‌സണ്‍ ജോണ്‍സണ്‍, എഡിറ്റിംഗ് എ ആര്‍ അഖില്‍, കലാസംവിധാനം ബോബന്‍, കോസ്റ്റ്യൂം ഡിസൈന്‍ ലിജി പ്രേമന്‍, ചീഫ് അസോസിയേറ്റ് ഡയറക്ടര്‍ മനു സുധാകര്‍. ജയലഷ്മി ഫിലിംസിന്റെ ബാനറില്‍ കെ രാധാകൃഷ്ണന്‍ ആണ് നിര്‍മ്മാണം.