EMPURAAN | സൂപ്പര്‍ ഹിറ്റ് ചിത്രം എമ്പുരാന് മലേഷ്യയിലേക്കും; ഏപ്രില്‍ 9 ന് ചിത്രം തിയറ്ററുകളില്‍ എത്തിക്കുമെന്ന് അണിയറക്കാര്‍
കൊച്ചി: കഴിഞ്ഞദിവസമാണ് മോഹന്‍ ലാല്‍- പൃഥ്വിരാജ് ചിത്രം എമ്പുരാന് റിലീസ് ചെയ്തത്. ചിത്രം റിലീസ് ചെയ്ത് രണ്ട് ദിവസം പൂര്‍ത്തിയാക്കും മുന്‍പ് തന്നെ ആഗോള ബോക്‌സ് ഓഫീസില്‍ നിന്ന് 100 കോടി ക്ലബ്ബില്‍ ഇടംപിടിച്ചിരുന്നു. ഇപ്പോള്‍ ചിത്രത്തിന്റെ ലൈഫ് ടൈം ഗ്രോസ് എത്ര വരുമെന്നത് അറിയാനുള്ള കാത്തിരിപ്പിലാണ് മലയാള സിനിമാ വ്യവസായം.
മലയാള സിനിമയുടെ ചരിത്രത്തില്‍ തന്നെ ഏറ്റവും വലിയ പ്രീ റിലീസ് ഹൈപ്പുമായി തിയറ്ററുകളിലെത്തിയ എമ്പുരാന്റെ ഓപണിംഗ് കളക്ഷന്‍ 65 കോടിക്ക് മുകളിലാണ്. ഇതില്‍ 5 മില്യണ്‍ ഡോളറിന് മുകളില്‍ വിദേശത്ത് നിന്ന് മാത്രം സ്വന്തമാക്കി. ഇന്ത്യയില്‍ നിന്ന് 25 കോടിക്ക് മുകളിലും നേടി. ഒരു മലയാള സിനിമയ്ക്ക് ലഭിക്കുന്ന ഏറ്റവും മികച്ച വിദേശ റിലീസും എമ്പുരാന് തന്നെ ആയിരുന്നു.
അതിനിടെയാണ് എമ്പുരാനെ സംബന്ധിക്കുന്ന പുതിയ ഒരു വാര്‍ത്തയും അണിയറക്കാര്‍ പുറത്തുവിട്ടിരിക്കുന്നത്. മറ്റൊരു വിദേശ മാര്‍ക്കറ്റിലേക്ക് ചിത്രം റിലീസിന് ഒരുങ്ങുകയാണെന്നാണ് അണിയറക്കാര്‍ അറിയിച്ചത്. അത് മറ്റെവിടേക്കുമല്ല, മലേഷ്യയിലേക്ക് തന്നെ. ഏപ്രില്‍ 2 ന് ചിത്രം റിലീസ് ചെയ്യുമെന്നാണ് ആദ്യം പ്രഖ്യാപിച്ചിരുന്നതെങ്കിലും ഏപ്രില്‍ 9 ലേക്ക് റിലീസ് തീയതി പ്രഖ്യാപിച്ചിരിക്കുകയാണ് വിതരണക്കാര്‍.
അപ്രതീക്ഷിത സാഹചര്യങ്ങളാല്‍ ഈദ് ഹോളിഡേ സീസണ്‍ മാറുകയായിരുന്നുവെന്നും ഏപ്രില്‍ 9 ന് ചിത്രം തിയറ്ററുകളില്‍ എത്തിക്കുമെന്നുമാണ് വിതരണക്കാര്‍ അറിയിച്ചത്. മലയാളത്തിലും തമിഴിലുമായി വൈഡ് റിലീസ് ആണ് മലേഷ്യയില്‍ പ്ലാന്‍ ചെയ്തിരിക്കുന്നത്.
അതേസമയം ലൂസിഫറിന്റെ സീക്വല്‍ ആയി എത്തിയിരിക്കുന്ന ചിത്രം മോഹന്‍ലാല്‍ കഥാപാത്രം സ്റ്റീഫന്‍ നെടുമ്പള്ളിയുടെ രണ്ടാം മുഖമായ അബ്രാം ഖുറേഷിയ്‌ക്കൊപ്പമാണ് കൂടുതല്‍ സഞ്ചരിക്കുന്നത്. പൃഥ്വിരാജ് കഥാപാത്രം സയിദ് മസൂദിനും ചിത്രത്തില്‍ ഏറെ പ്രധാന്യമുണ്ട്. ചിത്രം കണ്ടിറങ്ങിയ പ്രേക്ഷകരെല്ലാം സൂപ്പര്‍ ഹിറ്റ് ആണെന്ന അഭിപ്രായക്കാരാണ്. ചിത്രത്തിലെ എല്ലാ കഥാപാത്രങ്ങളും തങ്ങളുടെ ഭാഗം വ്യക്തമായി അവതരിപ്പിച്ചിട്ടുണ്ടെന്നും ഇവര്‍ പറയുന്നു.