നിവിന്‍ പോളി അവതരിപ്പിക്കുന്ന ആനിമേറ്റഡ് ഹ്രസ്വചിത്രം 'ബ്ലൂസ്' ട്രെയിലര്‍ പുറത്ത്
മഡഗാസ്‌കര്‍ 3, ദി ക്രൂഡ്‌സ്, ട്രോള്‍സ്, വെനം തുടങ്ങിയ ആഗോള ഹിറ്റുകളില്‍ പ്രവര്‍ത്തിച്ച രാജേഷ് പി. കെ ആണ് ചിത്രം സംവിധാനം ചെയ്യുന്നത്;
നിവിന്‍ പോളി അവതരിപ്പിക്കുന്ന ആനിമേറ്റഡ് ഹ്രസ്വചിത്രം ബ്ലൂസിന്റെ ട്രെയിലര്‍ പുറത്ത്. ലോകമെമ്പാടുമുള്ള ചലച്ചിത്രമേളകളില്‍ ഇതിനോടകം തന്നെ വലിയ ശ്രദ്ധയും പ്രശംസയും നേടിയ 'ബ്ലൂസ്' എന്ന അതിശയകരമായ ആനിമേറ്റഡ് ഹ്രസ്വചിത്രം അവതരിപ്പിക്കുന്നതിനായി കണ്ണൂര്‍ ആസ്ഥാനമായുള്ള റെഡ് ഗോഡ് സ്റ്റുഡിയോയുമായി ഔദ്യോഗികമായി കൈകോര്‍ത്ത് നടന്‍ നിവിന്‍ പോളി. അതിന്റെ ഭാഗമായി ചിത്രത്തിന്റെ ട്രെയ്ലര്‍ ബുധനാഴ്ച പുറത്തു വിട്ടു. കേരളത്തിന്റെ ഹൃദയത്തില്‍ നിന്ന് ഈ കലാസൃഷ്ടിയെ ആഗോള പ്രേക്ഷകരിലേക്ക് എത്തിക്കുകയാണ് ഈ സഹകരണം കൊണ്ട് ലക്ഷ്യമിടുന്നത്.
നിശബ്ദ ചിത്രമാണെങ്കിലും ഇത് നല്‍കുന്ന സന്ദേശം വളരെ വലുതും നമ്മുടെ പരിസ്ഥിതിക്കായി നിലകൊള്ളുന്നതിനുള്ള തന്റെ വ്യക്തിപരമായ പ്രതിബദ്ധതയുമായി തികച്ചും യോജിക്കുന്നതുമാണെന്ന് നിവിന്‍ പോളി അഭിപ്രായപ്പെട്ടു. അതിയായ സമര്‍പ്പണത്തോടും ഗുണനിലവാരത്തോടും കൂടി ഒരുക്കിയ ഇതുപോലുള്ള ഒരു കഥ ലോകത്തിന് മുന്നില്‍ എത്തിക്കേണ്ടത് അത്യാവശ്യമാണെന്നും താരം അഭിപ്രായപ്പെട്ടു. ലോകം മുഴുവന്‍ കാണേണ്ട കേരളത്തില്‍ നിന്നുള്ള ഒരു കലാരൂപമാണിതെന്നും അതിന്റെ ശബ്ദം ലോകത്തിനു മുന്നില്‍ പങ്കിടാന്‍ സഹായിക്കുന്നതില്‍ താന്‍ അഭിമാനിക്കുന്നു എന്നും നിവിന്‍ പറഞ്ഞു.
മഡഗാസ്‌കര്‍ 3, ദി ക്രൂഡ്‌സ്, ട്രോള്‍സ്, വെനം തുടങ്ങിയ ആഗോള ഹിറ്റുകളില്‍ പ്രവര്‍ത്തിച്ച രാജേഷ് പി. കെ ആണ് ചിത്രം സംവിധാനം ചെയ്യുന്നത്. സുഷിന്‍ ശ്യാം ആണ് ഈ ചിത്രത്തിന് പശ്ചാത്തല സംഗീതം ഒരുക്കിയത്. മഞ്ഞുമ്മല്‍ ബോയ്‌സ് ഫെയിം ഷിജിന്‍ മെല്‍വിന്‍ ഹട്ടന്റെ സൗണ്ട് ഡിസൈന്‍, ജീത്ത് പറമ്പേന്ദവിഡയുടെ അതിശയകരമായ ആനിമേഷന്‍ സംവിധാനം എന്നിവയും ചിത്രത്തിന്റെ ഹൈലൈറ്റാണ്. ഒരു യഥാര്‍ഥ സിനിമാറ്റിക് അനുഭവത്തിനായി രൂപകല്‍പ്പന ചെയ്ത 'ബ്ലൂസ്', ഡോള്‍ബി അറ്റ്‌മോസില്‍ ആണ് മിക്‌സ് ചെയ്തിരിക്കുന്നത്. ബിഗ് സ്‌ക്രീനുകള്‍ക്കായി ഒരുക്കിയ അതിശയകരമായ ഈ കാഴ്ച നിര്‍മ്മിച്ചിരിക്കുന്നത് ഷിബിന്‍ കെ വി, ജാസര്‍ പി വി എന്നിവര്‍ ചേര്‍ന്നാണ്.
സംവിധായകന്‍ രാജേഷ് പി. കെയുടെ ജീവിത യാത്രയില്‍ നിന്നാണ് ചിത്രത്തിന്റെ ജനനം. സംവിധായകന്‍ രാജേഷ് പി.കെ.യുടെ സ്വന്തം നാടായ പയ്യന്നൂരിലെ ഒരു കാവിനടുത്തുള്ള ഒരു വൃക്ഷത്തിന്റെ ബാല്യകാല ഓര്‍മ്മയില്‍ നിന്നുള്ള പ്രചോദനമാണ് ഈ ചിത്രത്തിന്റെ സൃഷ്ടിക്ക് പിന്നില്‍. ജോലിക്കായി അദ്ദേഹം ബെംഗളൂരുവിലേക്ക് താമസം മാറിയപ്പോള്‍, ദ്രുതഗതിയിലുള്ള മാറ്റങ്ങള്‍ക്കിടയില്‍ തന്റെ ബാല്യകാല ഭയം യാഥാര്‍ത്ഥ്യമാകുന്നതായി അദ്ദേഹം കണ്ടു.
വന നശീകരണത്തെക്കുറിച്ചുള്ള ഭയം അദ്ദേഹത്തെ തന്റെ ഹൃദയം നിലനില്‍ക്കുന്ന കേരളത്തിലേക്ക് തിരികെ കൊണ്ടുവരാനും പ്രധാനപ്പെട്ട ഒരു കഥ പറയാന്‍ തന്റെ കഴിവുകള്‍ ഉപയോഗിക്കാനും പ്രേരിപ്പിച്ചു. പൂര്‍ണ്ണമായും കണ്ണൂരിലെ തന്റെ ജന്മനാട്ടില്‍ നിന്ന് അദ്ദേഹം സൃഷ്ടിച്ച ആ കഥയാണ് 'ബ്ലൂസ്'.
ഫിലിം ഫെസ്റ്റിവലുകളില്‍ എത്തിയത് മുതല്‍ ചിത്രം അന്താരാഷ്ട്ര പ്രശംസയും നേടി. മികച്ച 3ഡി ഷോര്‍ട്ട് ഫിലിം- ആനിമേഷന്‍ ഫിലിം ഫെസ്റ്റിവല്‍, ഇറ്റലി, മികച്ച ആനിമേഷന്‍ ഷോര്‍ട്ട് ഫിലിം - ഇന്‍ഡി ഷോര്‍ട്ട് ഫെസ്റ്റ്, ലോസ് ഏഞ്ചല്‍സ്, യുഎസ്എ, രണ്ടാം റണ്ണര്‍ അപ്പ് - ബെംഗളൂരു ഇന്റര്‍നാഷണല്‍ ഷോര്‍ട്ട് ഫിലിം ഫെസ്റ്റിവല്‍, ഇന്ത്യ, ജൂറി സെലക്ഷന്‍ - ലോണ്‍ലി വുള്‍ഫ് ഇന്റര്‍നാഷണല്‍ ഫിലിം ഫെസ്റ്റിവല്‍, ലണ്ടന്‍, യുകെ എന്നിവിടങ്ങളിലൊക്കെ ചിത്രം പുരസ്‌കാരങ്ങള്‍ വാരിക്കൂട്ടി.
പ്രശസ്തമായ കാറ്റലീന ഫിലിം ഫെസ്റ്റിവല്‍ (യുഎസ്എ), പോര്‍ട്ട് ലാന്‍ഡ് ഫെസ്റ്റിവല്‍ ഓഫ് സിനിമ, ആനിമേഷന്‍ & ടെക്‌നോളജി എന്നിവയിലും ഈ ചിത്രം നാമനിര്‍ദ്ദേശം ചെയ്യപ്പെട്ടിട്ടുണ്ട്. വെനീസിയ ഷോര്‍ട്‌സ് (ഇറ്റലി), മിയാമി ഷോര്‍ട്ട് ഫിലിം ഫെസ്റ്റിവല്‍ 24-ാം പതിപ്പ് (യുഎസ്എ) എന്നിവയില്‍ സെമി ഫൈനലിസ്റ്റായി തിരഞ്ഞെടുക്കപ്പെട്ടു.
സിറ്റ്ജസ്-ഇന്റര്‍നാഷണല്‍ ഫന്റാസ്റ്റിക് ഫിലിം ഫെസ്റ്റിവല്‍ ഓഫ് കാറ്റലോണിയ (സ്‌പെയിന്‍), സ്പാര്‍ക്ക് ആനിമേഷന്‍ (കാനഡ), 41-ാമത് ബോസ്റ്റണ്‍ ഫിലിം ഫെസ്റ്റിവല്‍ (യുഎസ്), എസ്‌തെറ്റിക്ക ഷോര്‍ട്ട് ഫിലിം ഫെസ്റ്റിവല്‍ (യുകെ) തുടങ്ങിയ പ്രധാന ഫെസ്റ്റിവലുകളിലും പ്രീമിയര്‍ ഇവന്റിലേക്ക് ചിത്രം തിരഞ്ഞെടുക്കപ്പെട്ടിട്ടുണ്ട്. നിവിന്‍ പോളി അവതരിപ്പിച്ച ഈ ചിത്രത്തിന്റെ പുതിയ ട്രെയിലര്‍ ഇപ്പോള്‍ റെഡ് ഗോഡ് സ്റ്റുഡിയോയുടെ യൂട്യൂബ് ചാനലില്‍ ലഭ്യമാണ്.