പൃഥ്വിരാജ് - പാര്‍വതി തിരുവോത്ത് ചിത്രം 'നോബഡി' എറണാകുളത്ത് ആരംഭിച്ചു
ഹക്കിം ഷാജഹാന്‍ ആണ് മറ്റൊരു പ്രധാന കഥാപാത്രത്തെ അവതരിപ്പിക്കുന്നത്.;
പൃഥ്വിരാജിനെ നായകനാക്കി നിസാം ബഷീര്‍ സംവിധാനം ചെയ്യുന്ന പുതിയ ചിത്രം നോബഡിയുടെ ചിത്രീകരണം എറണാകുളത്ത് ആരംഭിച്ചു. വെല്ലിംഗ് ടണ്‍ ഐലന്‍ഡില്‍ നടന്ന പൂജ ചടങ്ങുകള്‍ക്ക് ശേഷം സ്വിച്ചോണും നടന്നു.
പാര്‍വതി തിരുവോത്ത് നായികയാവുന്ന ചിത്രത്തില്‍ ഹക്കിം ഷാജഹാന്‍ ആണ് മറ്റൊരു പ്രധാന കഥാപാത്രത്തെ അവതരിപ്പിക്കുന്നത്.
കൂടാതെ അശോകന്‍, മധുപാല്‍, ലുക് മാന്‍ അവറാന്‍, ഗണപതി, വിനയ് ഫോര്‍ട്ട് തുടങ്ങിയവരും ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നു.
പ്രേക്ഷകപ്രീതി നേടിയ കെട്ട്യോളാണ് എന്റെ മാലാഖ, റോഷാക്ക് എന്നീ ചിത്രങ്ങള്‍ക്ക് ശേഷം നിസാം ബഷീര്‍ സംവിധാനം ചെയ്യുന്ന പുതിയ ചിത്രമാണിത്. റോഷാക്കിന്റെയും രചയിതാവ് ആയിരുന്ന സമീര്‍ അബ്ദുള്‍ ആണ് നോബഡിയുടേയും രചന നിര്‍വഹിക്കുന്നത്.
പൃഥ്വിരാജ് പ്രൊഡക്ഷന്‍സ്, ഇ 4 എക്‌സ്‌പെരിമെന്റ്‌സ് എന്നീ ബാനറുകളില്‍ സുപ്രിയ മേനോന്‍, മുകേഷ് ആര്‍ മെഹ്ത, സി വി സാരഥി എന്നിവരാണ് ചിത്രത്തിന്റെ നിര്‍മ്മാണം. അനിമല്‍ സിനിമയ്ക്ക് പശ്ചാത്തല സംഗീതം ഒരുക്കിയ ഹര്‍ഷ് വര്‍ധന്‍ രാമേശ്വര്‍ ആണ് ചിത്രത്തിന് സംഗീതം പകരുന്നത് എന്നതും പ്രത്യേകതയാണ്.
ദിനേശ് പുരുഷോത്തമന്‍ ആണ് ഛായാഗ്രഹണം. എക്‌സിക്യൂട്ടീവ് പ്രൊഡ്യൂസര്‍ ഹാരിസ് ദേശം, പ്രൊഡക്ഷന്‍ കണ്‍ട്രോളര്‍ റിന്നി ദിവാകര്‍, പ്രൊഡക്ഷന്‍ ഡിസൈന്‍ ഗോകുല്‍ ദാസ്, കോസ്റ്റ്യൂം ഡിസൈന്‍ ധന്യ ബാലകൃഷ്ണന്‍, മേക്കപ്പ് റോണക്‌സ് സേവ്യര്‍, പ്രൊമോഷന്‍സ് പൊഫാക്ഷ്യോ.
നിര്‍മ്മാതാവ് എന്നതിനേക്കാള്‍ അഭിനേതാവ് എന്ന നിലയില്‍ തന്നെ ആവേശം കൊള്ളിക്കുന്ന ചിത്രമാണ് ഇതെന്ന് നേരത്തെ പൃഥ്വിരാജ് പറഞ്ഞിരുന്നു. 'പരിചിതമായ ജോണറിനെ പുതിയ രീതിയില്‍ അവതരിപ്പിക്കാന്‍ ശ്രമിക്കുന്ന സിനിമയാണ് ഇത്'എന്നും പൃഥ്വിരാജ് പറഞ്ഞിരുന്നു.
ചിത്രത്തിന്റെ ജോണറിനെക്കുറിച്ച് സംവിധായകന്റെയും എഴുത്തുകാരന്റെയും വാക്കുകള്‍ ഇങ്ങനെ- 'ഇതില്‍ എല്ലാം ഉണ്ട്. ത്രില്ലര്‍, കുറച്ച് ഫാലിമി ഡ്രാമ, കുറച്ച് ഹെയ്സ്റ്റ്, ആക്ഷന്‍ എല്ലാം ഉണ്ട്. സാമൂഹ്യ രാഷ്ട്രീയ മാനവുമുണ്ട്'- എന്ന് നിസാം ബഷീര്‍ പറഞ്ഞിരുന്നു. 'റോഷാക്കുമായി ഒരു സാമ്യവുമില്ലാത്ത വിഷയമാണെന്നും പ്രധാനമായും സോഷ്യോ പൊളിറ്റിക്കല്‍ ചിത്രമാണെന്നും ഡാര്‍ക് ഹ്യൂമര്‍ കൊണ്ടുവരാന്‍ ശ്രമിച്ചിട്ടുണ്ട്'- എന്നുമാണ് സമീര്‍ അബ്ദുള്‍ പറഞ്ഞത്.