PETTITION | 'രാജ്യവിരുദ്ധത പ്രചരിപ്പിക്കുന്നു, മതവിദ്വേഷത്തിന് വഴിമരുന്നിടുന്നു'; എമ്പുരാന് സിനിമയ്‌ക്കെതിരെ ഹൈക്കോടതിയില്‍ ഹര്‍ജി
കൊച്ചി: എമ്പുരാന് സിനിമയ്‌ക്കെതിരെയുള്ള വിവാദങ്ങള്‍ അവസാനിക്കുന്നില്ല. എമ്പുരാന് സിനിമയ്‌ക്കെതിരെ ഹൈക്കോടതിയില്‍ ഹര്‍ജിയും എത്തി. തൃശ്ശൂര്‍ സ്വദേശിയായ ബിജെപി പ്രവര്‍ത്തകന്‍ വിവി വിജീഷാണ് ഹര്‍ജി നല്‍കിയത്. സിനിമയുടെ പ്രദര്‍ശനം തടയണമെന്നാണ് ആവശ്യം.
സിനിമ രാജ്യവിരുദ്ധത പ്രചരിപ്പിക്കുന്നുവെന്നും മതവിദ്വേഷത്തിന് വഴിമരുന്നിടന്നുവെന്നുമാണ് ഹര്‍ജിയില്‍ ആരോപിക്കുന്നത്. കേന്ദ്ര പ്രതിരോധ മന്ത്രാലയത്തെയും ദേശീയ അന്വേഷണ ഏജന്‍സിയെയും സിനിമയില്‍ വികലമാക്കി ചിത്രീകരിച്ചു എന്നും ഹര്‍ജിയില്‍ പറയുന്നുണ്ട്.
മോഹന്‍ലാല്‍, പൃഥ്വിരാജ്, ആന്റണി പെരുമ്പാവൂര്‍ എന്നിവരെ കൂടാതെ കേന്ദ്രസര്‍ക്കാരിനെയും എതിര്‍കക്ഷികള്‍ ആക്കിയിട്ടുണ്ട്. സംസ്ഥാന പൊലീസ് എന്‍ഫോഴ് സ് മെന്റ് ഡയറക്ടറേറ്റ് എന്നിവരെയും ഹര്‍ജിയില്‍ എതിര്‍കക്ഷികള്‍ ആക്കിയിട്ടുണ്ട്.
പരാതി നല്‍കിയത് വ്യക്തിപരമായാണെന്നും ബിജെപിയുടെ അറിവോടെ അല്ലെന്നും വിജീഷ് പറഞ്ഞു. ബാംഗ്ലൂരിലാണ് ഇപ്പോള്‍ താന്‍ ഉള്ളത്. മത ദ്രുവീകരണം ഉണ്ടാക്കുകയാണ് സിനിമ ചെയ്യുന്നത്. അതില്‍ മനംനൊന്താണ് ഇത്തരത്തില്‍ ഒരു പരാതിയുമായി ഹൈക്കോടതിയെ സമീപിച്ചത്. ബിജെപി മുന്‍ ജില്ലാ കമ്മിറ്റി അംഗമാണ്. പുതിയ ജില്ലാ കമ്മിറ്റിയെ തിരഞ്ഞെടുത്തിട്ടില്ല. വ്യക്തിപരമായ പരാതിയെന്ന് അഭിഭാഷകനോട് പറഞ്ഞിട്ടുണ്ടെന്നും പരാതിയില്‍ നിന്ന് പിന്നോട്ടില്ലെന്നും വിജീഷ് മാധ്യമങ്ങളോട് പറഞ്ഞു.
സിനിമയിലെ വിമര്‍ശാത്മകമായ 24 ഭാഗങ്ങള്‍ അണിയറക്കാര്‍ കട്ട് ചെയ്തിരുന്നു. വിവാദങ്ങളൊന്നും സിനിമയെ ബാധിച്ചിട്ടില്ലെന്നാണ് ചുരുങ്ങിയ ദിവസങ്ങളില്‍ ഉണ്ടായ കളക്ഷന്‍ സൂചിപ്പിക്കുന്നത്. ലഭ്യമായ ഏറ്റവും പുതിയ കണക്കുകള്‍ പ്രകാരം മലയാളത്തിലെ എക്കാലത്തെയും വലിയ രണ്ടാമത്തെ കളക്ഷന്‍ എന്ന നേട്ടം സ്വന്തമാക്കിയിരിക്കുകയാണ് എമ്പുരാന്.
ടൊവിനോ തോമസ് നായകനായ 2018 എന്ന ചിത്രത്തെ മറികടന്നാണ് എമ്പുരാന്റെ നേട്ടം. 175.4 കോടി ആയിരുന്നു 2018 ന്റെ ലൈഫ് ടൈം ബോക്‌സ് ഓഫീസ് നേട്ടം. എന്നാല്‍ വെറും അഞ്ച് ദിനങ്ങള്‍ കൊണ്ടാണ് എമ്പുരാന് ഇതിനെ മറികടന്നിരിക്കുന്നത്.
ഒപ്പം 200 കോടി ക്ലബ്ബില്‍ ഇടംപിടിക്കുകയും ചെയ്തു. ഔദ്യോഗികമായിത്തന്നെ അണിയറക്കാര്‍ ഇക്കാര്യം അറിയിച്ചിട്ടുമുണ്ട് ഇപ്പോള്‍. മോഹന്‍ലാലിന്റെ ആദ്യ 200 കോടി ക്ലബ്ബ് ചിത്രവുമാണ് ഇത്. മഞ്ഞുമ്മല്‍ ബോയ്‌സ് മാത്രമാണ് മലയാളത്തില്‍ എമ്പുരാന് മുന്നില്‍ കളക്ഷനില്‍ അവശേഷിക്കുന്നത്. 240 കോടിയാണ് മഞ്ഞുമ്മലിന്റെ നേട്ടം.