എസ്.ഐ.ആര്‍ നടപടികളില്‍ സമയപരിധി നീട്ടി കേന്ദ്ര തിരഞ്ഞെടുപ്പ് കമ്മിഷന്‍; കരട് പട്ടിക ഡിസംബര്‍ 16ന്
പുതിയ ഉത്തരവ് പ്രകാരം ഡിസംബര്‍ 11വരെ ഫോം വിതരണം ചെയ്യാം;
തിരുവനന്തപുരം: എസ്.ഐ.ആര്‍ നടപടികളില്‍ സമയപരിധി നീട്ടി കേന്ദ്ര തിരഞ്ഞെടുപ്പ് കമ്മിഷന്‍. ഇതുസംബന്ധിച്ച് കേന്ദ്ര തിരഞ്ഞെടുപ്പ് കമ്മിഷന്‍ സംസ്ഥാനത്തെ തിരഞ്ഞെടുപ്പ് കമ്മിഷണര്‍മാര്‍ക്ക് കത്തയച്ചു. കേരളം അടക്കം 12 സംസ്ഥാനങ്ങളിലെ സമയപരിധിയാണ് നീട്ടിയത്.
പുതിയ ഉത്തരവ് പ്രകാരം ഡിസംബര്‍ 11വരെ ഫോം വിതരണം ചെയ്യാം. ഡിസംബര്‍ 16ന് കരട് പട്ടിക പ്രസിദ്ധീകരിക്കും. അന്തിമ പട്ടിക ഫെബ്രുവരി 14നും പ്രസിദ്ധീകരിക്കും. എസ്.ഐ. ആര്‍ നീട്ടിവെക്കണമെന്നാവശ്യപ്പെട്ടുകൊണ്ടുള്ള ഹര്‍ജികള്‍ സുപ്രീം കോടതിയുടെ പരിഗണനയിലിരിക്കെയാണ് കമ്മീഷന്‍ സ്വമേധയാ നീട്ടിവെച്ചുകൊണ്ടുള്ള സുപ്രധാന ഉത്തരവിറക്കുന്നത്.
കേരളത്തില്‍ തദ്ദേശ തിരഞ്ഞെടുപ്പ് നടക്കുന്നതിനിടെ എസ്.ഐ.ആര്‍ നടപടികള്‍ നീട്ടിവയ്ക്കണമെന്ന് തുടക്കം മുതല്‍ രാഷ്ട്രീയ പാര്‍ട്ടികള്‍ ആവശ്യപ്പെട്ടിരുന്നു. നേരത്തെ ഡിസംബര്‍ നാലിനുള്ളില്‍ ഫോം വിതരണം പൂര്‍ത്തിയാക്കണമെന്നും ഡിസംബര്‍ ഒമ്പതിന് കരട് പട്ടിക പുറത്തിറക്കണമെന്നും അന്തിമ പട്ടിക ഫെബ്രുവരി ഏഴിന് പുറത്തിറക്കണമെന്നുമായിരുന്നു നിര്‍ദേശം.
കരട് പട്ടിക പുറത്തിറക്കാന്‍ ആവശ്യപ്പെട്ട ഡിസംബര്‍ ഒമ്പതിനാണ് സംസ്ഥാനത്ത് ആദ്യഘട്ട തദ്ദേശ തിരഞ്ഞെടുപ്പും നടക്കുന്നത്. സമയം നീട്ടിയതോടെ ഒരാഴ്ച കൂടുതലായി ബിഎല്‍ഒമാര്‍ക്ക് ലഭിക്കും. ബിഎല്‍ഒമാര്‍ക്കും അതുപോലെ ഫോം പൂരിപ്പിച്ചു നല്‍കുന്നതിലടക്കം വോട്ടര്‍മാര്‍ക്കും പുതിയ തീരുമാനം ആശ്വാസമാകും.
ഒന്നാംഘട്ടമായ വിവരശേഖരണം ഡിസംബര്‍ നാലിന് അവസാനിക്കാനിരിക്കേ, പൂരിപ്പിച്ച എന്യൂമറേഷന്‍ ഫോമിന്റെ 15 ശതമാനവും സംസ്ഥാനത്ത് തിരികെ കിട്ടിയിരുന്നില്ല. അഞ്ചുദിവസത്തിനകം ബാക്കി ഫോം തിരിച്ചുവാങ്ങുന്നതും ഡിജിറ്റലൈസ് ചെയ്യുന്നതും അപ്രായോഗികമാണെന്ന് മുഖ്യതിരഞ്ഞെടുപ്പ് ഓഫിസര്‍ വിളിച്ച യോഗത്തില്‍ രാഷ്ട്രീയ പാര്‍ട്ടികള്‍ പറഞ്ഞിരുന്നു.
സമയമില്ലാത്തതിനാല്‍ ഫോം വിതരണവും ഡിജിറ്റലൈസേഷന്‍ നടപടികളുമടക്കം പൂര്‍ത്തിയാക്കാന്‍ കഴിയാതെ ബിഎല്‍ഒമാര്‍ സമ്മര്‍ദത്തിലായിരുന്നു. തദ്ദേശ തിരഞ്ഞെടുപ്പ് നടക്കുന്നതിനാല്‍ കേരളത്തിലെ എസ്.ഐ.ആര്‍ നീട്ടിവെയ്ക്കണമെന്ന് കോണ്‍ഗ്രസും സിപിഎമ്മും അടക്കമുള്ള പാര്‍ട്ടികള്‍ ആവശ്യപ്പെട്ടിരുന്നു. നീട്ടി വെയ്ക്കുന്നതില്‍ എതിര്‍പ്പില്ലെന്ന് ബിജെപിയും നിലപാട് എടുത്തിരുന്നു.
അര്‍ഹരായ പലരും വോട്ടര്‍ പട്ടികയില്‍നിന്ന് പുറത്താകുമെന്ന ആശങ്കപ്രകടിപ്പിച്ച അവര്‍ സമയം നീട്ടണമെന്ന ആവശ്യം ആവര്‍ത്തിച്ചു. 99.5% ഫോമും വിതരണം ചെയ്‌തെന്നും ബാക്കിയുള്ളവയുടെ വിതരണം ഉടന്‍ പൂര്‍ത്തിയാകുമെന്നും ആയിരുന്നു മുഖ്യതിരഞ്ഞെടുപ്പ് ഓഫിസര്‍ രത്തന്‍ യു. കേല്‍ക്കറുടെ മറുപടി. ബാക്കിയുള്ളവയും പൂരിപ്പിച്ച് ഉടന്‍ തിരികെക്കിട്ടും. ശനിയാഴ്ചവരെ ഡിജിറ്റലൈസ് ചെയ്തത് 75.35 ശതമാനമായിരുന്നു.
എസ്.ഐ.ആര്‍ നടപടികളിലെ സമ്മര്‍ദത്തെ തുടര്‍ന്ന് ബിഎല്‍ഒമാര്‍ പല സംസ്ഥാനങ്ങളിലും ജീവനൊടുക്കിയ സംഭവങ്ങളും ഉണ്ടായിരുന്നു. കണ്ണൂരിലും ബിഎല്‍ഒ മരിച്ചിരുന്നു. വിവിധ സംസ്ഥാനങ്ങളില്‍ നിന്നുള്ള വ്യാപക പരാതികളും തിരഞ്ഞെടുപ്പ് കമ്മീഷന്റെ മുമ്പിലെത്തിയിരുന്നു. സുപ്രീം കോടതിയില്‍ കേസ് പരിഗണിക്കുന്ന ഘട്ടത്തിലടക്കം സമയപരിധി നീട്ടിയ കാര്യമായിരിക്കും തിരഞ്ഞെടുപ്പ് കമ്മീഷന്‍ അറിയിക്കുക.