വാഹനപരിശോധനക്കിടെ പൊലീസുകാരന്റെ മുഖത്തടിച്ചു; യുവാവ് അറസ്റ്റില്‍
നീലേശ്വരം സ്റ്റേഷനിലെ സീനിയര്‍ സിവില്‍ പൊലീസ് ഓഫിസര്‍ കെ.പി. അജിത്തിനാണ് മുഖത്തടിയേറ്റത്;
കാഞ്ഞങ്ങാട്: വാഹന പരിശോധനക്കിടെ പൊലീസ് ഉദ്യോഗസ്ഥന്റെ മുഖത്തടിച്ച യുവാവ് അറസ്റ്റില്‍. നീലേശ്വരം സ്റ്റേഷനിലെ സീനിയര്‍ സിവില്‍ പൊലീസ് ഓഫിസര്‍ കെ.പി. അജിത്തിനാണ് (40) മുഖത്തടിയേറ്റത്. സംഭവത്തില്‍ മടിക്കൈ ബങ്കളം സ്വദേശി പി. ബിനീഷ് കുമാറി(34)നെ എസ്.ഐ ജി ജിഷ്ണു അറസ്റ്റ് ചെയ്തു. നീലേശ്വരം തെരുവത്ത് ശ്രീവല്‍സം ഓഡിറ്റോറിയത്തിന് സമീപത്താണ് സംഭവം.
ഡ്രൈവിംഗ് ലൈസന്‍സ് ഇല്ലാതെയും ഹെല്‍മറ്റ് ധരിക്കാതെയും വന്ന സ്‌കൂട്ടര്‍ പൊലീസ് കസ്റ്റഡിയിലെടുക്കാന്‍ ശ്രമിക്കുമ്പോഴാണ് സംഭവം. സ്‌കൂട്ടറിന്റെ താക്കോല്‍ വാങ്ങാനുള്ള ശ്രമത്തിനിടെയാണ് ബിനീഷ് അജിത്തിന്റെ മുഖത്തടിച്ചത്. ഔദ്യോഗിക കൃത്യനിര്‍വഹണം തടഞ്ഞതിനും ലൈസന്‍സും ഹെല്‍മെറ്റും ഇല്ലാതെ വാഹനം ഓടിച്ചതിനും എസ്. ഐ. ജി. ജിഷ്ണുവിന്റെ പരാതിയിലാണ് കേസെടുത്തത്. അക്രമത്തില്‍ പരിക്കേറ്റ അജിത്ത് താലൂക്ക് ആസ്പത്രിയില്‍ ചികില്‍സ തേടി.