മുന്‍കൂറായി തുക കെട്ടിവെച്ചാല്‍ പോളിംഗ് ബൂത്തിലെ ദൃശ്യങ്ങള്‍ ചിത്രീകരിക്കാം; ജില്ലാ കലക്ടര്‍
നിരീക്ഷണ ക്യാമറകള്‍ സ്ഥാപിക്കാത്ത ബൂത്തുകളിലെ ദൃശ്യങ്ങള്‍ ചിത്രീകരിക്കുന്നതിനുള്ള സൗകര്യങ്ങളാണ് പണം അടച്ചാല്‍ ലഭ്യമാക്കുക.;
കാസര്‍കോട്: മുന്‍കൂറായി തുക കെട്ടിവെച്ച് രസീത് ഹാജരാക്കിയാല്‍ പോളിംഗ് ബൂത്തിലെ ദൃശ്യങ്ങള്‍ ചിത്രീകരിക്കുന്നതിനുള്ള സൗകര്യങ്ങള്‍ ഒരുക്കുമെന്ന് കലക്ടര്‍ കെ ഇമ്പശേഖര്‍. തദ്ദേശ തിരഞ്ഞെടുപ്പ് 2025, എസ്.ഐ.ആര്‍ എന്നീ വിഷയങ്ങളില്‍ വിവിധ രാഷ്ട്രീയ പാര്‍ട്ടി പ്രതിനിധികളുമായി ചേമ്പറില്‍ നടന്ന യോഗത്തില്‍ സംസാരിക്കുകയായിരുന്നു കലക്ടര്‍.
ജില്ലയിലെ 119 പ്രശ്‌നബാധിത ബൂത്തുകളില്‍ സംസ്ഥാന തിരഞ്ഞെടുപ്പ് കമ്മീഷന്‍ നിരീക്ഷണ ക്യാമറകള്‍ സ്ഥാപിച്ചിട്ടുണ്ട്. നിരീക്ഷണ ക്യാമറകള്‍ സ്ഥാപിക്കാത്ത ബൂത്തുകളിലെ ദൃശ്യങ്ങള്‍ ചിത്രീകരിക്കുന്നതിനുള്ള സൗകര്യങ്ങളാണ് പണം അടച്ചാല്‍ ലഭ്യമാക്കുക. ഡിസംബര്‍ ഒന്നു മുതല്‍ ഇലക്ട്രോണിക് വോട്ടിംഗ് മെഷീനുകള്‍ അതാത് ബ്ലോക്ക് പഞ്ചായത്തുകളിലെ സ്‌ട്രോങ്ങ് റൂമുകളിലേക്ക് മാറ്റും. തിരഞ്ഞെടുപ്പ് പെരുമാറ്റ ചട്ടങ്ങളും ഹരിത പ്രോട്ടോക്കോളും പാലിക്കുന്നതില്‍ രാഷ്ട്രീയ പാര്‍ട്ടികള്‍ ശ്രദ്ധ പുലര്‍ത്തണമെന്നും കലക്ടര്‍ അഭ്യര്‍ത്ഥിച്ചു.
പ്രത്യേക തീവ്ര വോട്ടര്‍ പട്ടിക പരിഷ്‌കരണവുമായി ബന്ധപ്പെട്ട് ജില്ലയില്‍ ഇനിയും പൂര്‍ത്തീകരിക്കാനുള്ള എന്യൂ മറേഷന്‍ ഫോമുകളുടെ ഡിജിറ്റലൈസേഷന് ബൂത്ത് ലെവല്‍ ഏജന്റുമാരുടെ സഹകരണം ഉണ്ടാകണമെന്നും എസ് ഐ ആറുമായി ബന്ധപ്പെട്ട് പ്രസിദ്ധീകരിക്കാന്‍ ഇരിക്കുന്ന കരട് വോട്ടര്‍ പട്ടികയില്‍ പേരില്ലെങ്കില്‍ പോലും ഫോം സിക്‌സ് പൂരിപ്പിച്ചു നല്‍കിയാല്‍ പുതിയ വോട്ടര്‍ പട്ടികയില്‍ ജനങ്ങള്‍ക്ക് പേര് ചേര്‍ക്കാം എന്നും കലക്ടര്‍ പറഞ്ഞു.
യോഗത്തില്‍ ഇലക്ഷന്‍ ഡെപ്യൂട്ടി കലക്ടര്‍ എന്‍ ഗോപകുമാര്‍ വിവിധ രാഷ്ട്രീയ പാര്‍ട്ടി പ്രതിനിധികളായ പി രമേശ്, ബിജു ഉണ്ണിത്താന്‍, ഉമ്മര്‍ പാടലടുക്ക, സിദ്ദിഖ് ചേരങ്കൈ, മാമുനി വിജയന്‍ എന്നിവര്‍ പങ്കെടുത്തു. തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന് ഉപയോഗിക്കുന്ന ഇലക്ട്രോണിക് വോട്ടിംഗ് മെഷീനുകളുടെ റാന്‍ഡമൈസേഷന്‍ ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടര്‍ നിര്‍വഹിച്ചു.
ആകെ 1760 കണ്‍ട്രോള്‍ യൂണിറ്റുകളും 4920 ബാലറ്റ് യൂണിറ്റുകളും ഇതിലേക്കായി ഉപയോഗിക്കുന്നുണ്ട്. ബന്ധപ്പെട്ട ബ്ലോക്ക് പഞ്ചായത്ത്/ മുനിസിപ്പാലിറ്റി സെക്രട്ടറിമാര്‍ക്ക് അനുവദിച്ചിരിക്കുന്ന മെഷീനുകളുടെ വിതരണം ഡിസംബര്‍ 2, 3 തീയതികളില്‍ നടക്കും.