തദ്ദേശ തിരഞ്ഞെടുപ്പ്; കേരള കര്‍ണാടക അതിര്‍ത്തി പരിശോധന ശക്തമാക്കും; കൂടിക്കാഴ്ച നടത്തി കേരള പൊലീസും കര്‍ണാടക പൊലീസും
ഇരു സംസ്ഥാനങ്ങളെയും ബന്ധിപ്പിക്കുന്ന റോഡുകളിലും ചെറു പാതകളിലും ശക്തമായ പരിശോധന നടത്താനും പിടികിട്ടാ പുള്ളികളെ പിടികൂടുന്നതിനും ധാരണയായി;
കാസര്‍കോട്: തദ്ദേശസ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന്റെ മുന്നൊരുക്കങ്ങളുടെയും കേരള കര്‍ണാടക സംസ്ഥാന അതിര്‍ത്തിയിലെ സുരക്ഷാ പരിശോധന ശക്തമാക്കുന്നതിനുള്ള ക്രമീകരണങ്ങള്‍ ഏര്‍പ്പെടുത്തുന്നതിന്റെയും ഭാഗമായി മംഗലാപുരം സിറ്റി പൊലീസും കാസര്‍കോട് ജില്ലാ പൊലീസും കൂടിക്കാഴ്ച നടത്തി. മംഗലാപുരം സിറ്റി പൊലീസ് കമ്മീഷണറുടെ കാര്യാലയത്തില്‍ വെച്ചായിരുന്നു കൂടിക്കാഴ്ച.
മംഗലാപുരം സിറ്റി പൊലീസ് കമ്മിഷണര്‍ സുധീര്‍ കുമാര്‍ റെഡ്ഡി സി എച്ച് ഐപിഎസ്, കണ്ണൂര്‍ റേഞ്ച് ഡിഐജി യതീഷ് ചന്ദ്ര ജി എച്ച് ഐപിഎസ്, കാസര്‍കോട് ജില്ലാ പൊലീസ് മേധാവി ബിവി വിജയ ഭരത് റെഡ്ഡി ഐപിഎസ്, മംഗലാപുരം സിറ്റി ഡെപ്യൂട്ടി കമ്മിഷണര്‍ മിഥുന്‍ എച്ച് എന്‍ ഐപിഎസ്, കാസര്‍കോട് എഎസ്പി ഡോ. നന്ദഗോപന്‍ എം ഐപിഎസ് എന്നിവരാണ് കൂടിക്കാഴ്ചയില്‍ പങ്കെടുത്തത്.
ഇരു സംസ്ഥാനങ്ങളെയും ബന്ധിപ്പിക്കുന്ന റോഡുകളിലും ചെറു പാതകളിലും ശക്തമായ പരിശോധന ഇരു സംസ്ഥാന പൊലീസും ചേര്‍ന്ന് നടത്താനും വിവിധ കേസുകളിലെ പിടികിട്ടാ പുള്ളികളെ പിടികൂടുന്നതിന് വിവരങ്ങള്‍ പരസ്പരം കൈമാറാനും യോഗത്തില്‍ തീരുമാനമായി.