റെയില്‍വെയില്‍ ജോലി വാഗ്ദാനം ചെയ്ത് തട്ടിപ്പ്; പലര്‍ക്കും നഷ്ടമായത് ലക്ഷങ്ങള്‍

കാസര്‍കോട്: റെയില്‍വെയില്‍ ജോലി വാഗ്ദാനം ചെയ്ത് കാസര്‍കോട് സ്വദേശികളടക്കം 16 പേരില്‍ നിന്ന് പണം തട്ടിയതായി പരാതി. കാസര്‍കോട്, കോഴിക്കോട്, മലപ്പുറം, പാലക്കാട്, കൊല്ലം ജില്ലകളില്‍ നിന്നുള്ളവരാണ് തട്ടിപ്പിനിരയായത്. 70 ലക്ഷത്തോളം രൂപ തട്ടിയതായാണ് വിവരം. ഈ മാസം 21ന് ഇവര്‍ക്ക് നിയമന ഉത്തരവ് നല്‍കുമെന്ന് വാഗ്ദാനം ചെയ്ത് പലരില്‍ നിന്നായി 3 മുതല്‍ 6 ലക്ഷം രൂപ വരെ വാങ്ങി വഞ്ചിച്ചുവെന്നാണ് പരാതി.

തട്ടിപ്പ് സംഘത്തിന്റെ ഏജന്റുമാരായി 20 പേര്‍ കേരളത്തില്‍ പ്രവര്‍ത്തിക്കുന്നുണ്ടെന്നാണ് പൊലീസിന് ലഭിച്ച വിവരം. ഇതുമായി ബന്ധപ്പെട്ട് കഴിഞ്ഞ ദിവസം മലപ്പുറത്തും കോഴിക്കോട്ടും ചിലയിടങ്ങളില്‍ സ്പെഷ്യല്‍ ബ്രാഞ്ച് പരിശോധന നടത്തിയിരുന്നു. കൂടുതല്‍ അന്വേഷണം നടന്നുവരികയാണ്.