കുമ്പള ടൗണില്‍ നടപ്പിലാക്കുന്ന പരീക്ഷണാടിസ്ഥാനത്തിലുള്ള ട്രാഫിക്ക് പരിഷ്‌കരണം ഒക്ടോബര്‍ ആറ് മുതല്‍
ട്രാഫിക് പരീഷ്‌കരണത്തില്‍ എല്ലാവരുടെയും പരിപൂര്‍ണ്ണ സഹകരണം അഭ്യര്‍ത്ഥിച്ച് കുമ്പള ഗ്രാമ പഞ്ചായത്ത് പ്രസിഡണ്ട് യുപി താഹിറ യുസുഫ്;
കുമ്പള: ടൗണില്‍ നില നില്‍ക്കുന്ന ഗതാഗത കുരുക്കിന് പരിഹാരമെന്ന നിലയ്ക്ക് പുതിയ സംവിധാനങ്ങളോടെ ട്രാഫിക് പരിഷ്‌കരണം നടപ്പിലാകുന്നതിന്റെ മുന്നോടിയായി ഒക്ടോബര്‍ ആറ് മുതല്‍ 16 വരെ പരീക്ഷണാടിസ്ഥാനത്തിലും തുടര്‍ന്ന് സ്ഥിരമായുമുള്ള ട്രാഫിക് പരിഷ്‌കരണം നടപ്പിലാക്കും. പരിഷ്‌കരണവുമായി ബന്ധപ്പെട്ട് ബസ്-ഓട്ടോ റിക്ഷ- ടാക്സി-ഗുഡ്‌സ് തൊഴിലാളി യൂണിയന്‍ പ്രതിനിധികള്‍, വ്യാപാരി വ്യവസായി, ഹോട്ടല്‍ റെസ്റ്റോറന്റ് യൂണിയന്‍ പ്രതിനിധികള്‍, രാഷ്ട്രീയ പാര്‍ട്ടി പ്രതിനിധികള്‍, ജനപ്രതിനിധികള്‍ എന്നിവരുടെ യോഗത്തില്‍ വന്ന നിര്‍ദ്ദേശങ്ങളും ട്രാഫിക് റഗുലേറ്ററി കമ്മിറ്റി തീരുമാനപ്രകാരവുമാണ് ട്രാഫിക് പരിഷ്‌കരണം കുമ്പള ടൗണില്‍ നടപ്പിലാകുന്നത്.
ഓട്ടോ സ്റ്റാന്റിനായി നിശ്ചയിച്ചിട്ടുള്ള സ്ഥലങ്ങള്‍ : പ്രകാശ് മെഡിക്കല്‍ മുതല്‍ ഒബര്‍ള കോപ്ലക്സിനടുത്തുള്ള ട്രാന്‍സ്‌ഫോര്‍മാര്‍ വരെ, കുമ്പള പൊലീസ് സ്റ്റേഷന്‍ റോഡിന്റെ ഇടത് വശത്തോട് ചേര്‍ന്ന് മത്സ്യ മാര്‍ക്കറ്റ് റോഡ് മുതല്‍ താഴോട്ട്, ജില്ലാ സഹകരണാസ്പത്രിക്ക് സമീപം നിലവില്‍ പാര്‍ക്കിംഗിനായി ഉപയോഗിക്കുന്ന സ്ഥലം, ഡോക്ടേര്‍സ് ഹോസ്പിറ്റലിന് സമീപം നിലവില്‍ പാര്‍ക്കിംഗിനായി ഉപയോഗിക്കുന്ന സ്ഥലം, കമ്മ്യൂണിറ്റി ഹെല്‍ത്ത് സെന്ററിന് സമീപം നിലവില്‍ പാര്‍ക്കിംഗിനായി ഉപയോഗിക്കുന്ന സ്ഥലം.
ടാക്സി കാറും ജീപ്പും പാര്‍ക്ക് ചെയ്യാന്‍ നിശ്ചയിച്ചിട്ടുള്ള സ്ഥലം: സൈഗം കോപ്ലക്സിന് മുന്‍വശം.
ചെറിയ ഗുഡ്‌സ് വാഹനങ്ങള്‍ പാര്‍ക്ക് ചെയ്യാന്‍ നിശ്ചയിച്ചിട്ടുള്ള സ്ഥലം: ഒബര്‍ള കോപ്ലക്സിലെ കൊട്ടൂടല്‍ ഹാര്‍വേര്‍സ് ഷോപ്പിന് മുന്‍ വശം.
ബസുകള്‍ക്കുള്ള പാര്‍ക്കിങ് സ്ഥലം : ടൗണിലെ നിലവിലെ കെ.എസ്.ടി.പി ബസ് ഷെല്‍ട്ടര്‍ വേ-1 ആരിക്കാടി ബംബ്രാണ, ബായിക്കട്ടെ, കളത്തൂര്‍ ഭാഗത്തേക്ക് പോകുന്ന ബസുകള്‍.
മഹേഷ് ഇലക്ട്രോണിക്സ് മുന്‍വശം വേ-2 ബന്തിയോട്, ഉപ്പള തലപ്പാടി ഭാഗത്തേക്ക് പോകുന്ന ബസുകള്‍.
സുലഭ ഷോപ്പിന് മുന്‍വശം വേ-3 മംഗളൂരു ഭാഗത്തേക്ക് പോകുന്ന ബസുകള്‍(കെ.എസ്.ആര്‍.ടി.സി).
കാനറാ ബാങ്കിന് മുന്‍വശം വേ-4 കാസര്‍കോട് ഭാഗത്തേക്ക് പോകുന്ന ബസുകള്‍.
ജീവന്‍ രേഖ മെഡിക്കലിന് മുന്‍വശം വേ-5 കാസര്‍കോട് ഭാഗത്തേക്ക് പോകുന്ന ബസുകള്‍(കെ.എസ്.ആര്‍.ടി.സി).കെ .എസ്.ടി.പി പുതുതായി നിര്‍മ്മിച്ച ബസ് ഷെല്‍ട്ടര്‍.
വേ-6 പേരാല്‍ കണ്ണൂര്‍, പെര്‍ള, ബദിയടുക്ക, മുള്ളേരിയ സുള്ള്യ ഭാഗത്തേക്ക് പോകുന്ന ബസുകള്‍.
സ്വകാര്യ വാഹനങ്ങള്‍ക്കുള്ള പാര്‍ക്കിങ് സ്ഥലം: പൊലീസ് സ്റ്റേഷന്‍ റോഡിന്റെ വലത് വശം, സ്‌കൂള്‍ റോഡ്, ഓള്‍ഡ് എക്സ്ചേഞ്ച് റോഡ്, ടേക്ക് എ ബ്രേക്ക് പരിസരം.
മറ്റു തീരുമാനങ്ങള്‍: കുമ്പള ടൗണിലെ ഓട്ടോ റിക്ഷ തൊഴിലാളികളുടെ വിവരങ്ങള്‍ ശേഖരിക്കാനും രജിസ്‌ട്രേഷന്റെ ഭാഗമായി ഓട്ടോ റിക്ഷ തൊഴിലാളികള്‍ക്ക് ഐഡി കാര്‍ഡ് നല്‍കാനും പാര്‍ക്കിങ് സ്ഥലങ്ങളിലെല്ലാം ബോര്‍ഡുകള്‍ സ്ഥാപിക്കാനും, മാര്‍ക്കിങ് നടത്താനും തീരുമാനിച്ചു.
ഓട്ടോ റിക്ഷകളും മറ്റു വാഹനങ്ങളും വ്യാപാര സ്ഥാപനങ്ങള്‍ക്ക് ബുദ്ധിമുട്ടുണ്ടാകുന്ന രീതിയിലും പാര്‍ക്കിംഗിനായി നിശ്ചയിച്ചിട്ടില്ലാത്ത മറ്റു സ്ഥലങ്ങളിലും വഴികളിലും നിര്‍ത്തിയിടുന്നത് പൂര്‍ണ്ണമായും നിരോധിച്ചു. ഒക്ടോബര്‍ ആറ് മുതല്‍ കുമ്പള ടൗണില്‍ നടപ്പിലാക്കുന്ന ട്രാഫിക് പരീഷ്‌കരണത്തില്‍ എല്ലാവരുടെയും പരിപൂര്‍ണ്ണ സഹകരണം ഉണ്ടാവണമെന്ന് കുമ്പള ഗ്രാമ പഞ്ചായത്ത് പ്രസിഡണ്ട് യുപി താഹിറ യുസുഫ്, സെക്രട്ടറി ഇന്‍ചാര്‍ജ്ജ് ഷൈജു, കുമ്പള സര്‍ക്കിള്‍ ഇന്‍സ്പെക്ടര്‍ ജിജീഷ് പി.കെ എന്നിവര്‍ അഭ്യര്‍ത്ഥിച്ചു.