സര്‍ക്കാര്‍ പതിച്ചു നല്‍കിയ ഭൂമിയില്‍ നിന്ന് ചന്ദനമരം മുറിച്ചു കടത്താന്‍ ശ്രമം; റവന്യു, വനം വകുപ്പ് അധികൃതര്‍ പരിശോധന നടത്തി
ഭൂമി പതിച്ചു കിട്ടിയ വ്യക്തിയാണ് ചന്ദനമരം മുറിച്ച് കടത്താന്‍ ശ്രമിച്ചതെന്ന് തെളിഞ്ഞാല്‍ പട്ടയം റദ്ദാക്കുന്നത് അടക്കമുള്ള നിയമ നടപടികള്‍ സ്വീകരിക്കും;
കാഞ്ഞങ്ങാട്: പനത്തടി വില്ലേജില്‍ ചാമുണ്ഡിക്കുന്നില്‍ സര്‍ക്കാര്‍ പതിച്ചു നല്‍കിയ ഭൂമിയില്‍ നിന്ന് ചന്ദനമരം മുറിച്ചു കടത്താന്‍ ശ്രമം എന്ന് പരാതി. വിവരമറിഞ്ഞ് റവന്യു, ഫോറസ്റ്റ് അധികൃതര്‍ സ്ഥലത്തെത്തി മുറിച്ചിട്ട ചന്ദനമുട്ടികള്‍ പരിശോധന നടത്തി. ചന്ദനമരം മുറിച്ചിട്ടത് ആരാണെന്ന കാര്യത്തില്‍ വ്യക്തത വന്നിട്ടില്ല. തുടര്‍ നടപടിക്കായി രാജപുരം പൊലീസില്‍ പരാതി നല്‍കുമെന്ന് പനത്തടി വില്ലേജ് അധികൃതര്‍ പറഞ്ഞു.
ഭൂമി പതിച്ചു കിട്ടിയ വ്യക്തിയാണ് ചന്ദനമരം മുറിച്ച് കടത്താന്‍ ശ്രമിച്ചതെന്ന് തെളിഞ്ഞാല്‍ പട്ടയം റദ്ദാക്കുന്നത് ഉള്‍പ്പെടെയുള്ള നിയമ നടപടികള്‍ സ്വീകരിക്കുമെന്നാണ് അധികൃതര്‍ നല്‍കുന്ന സൂചന. ചാമുണ്ഡിക്കുന്ന് ഗവ.ഹൈസ്‌കൂളിന് സമീപം 50 ഏക്കര്‍ വനഭൂമിയാണ് വിവിധ പട്ടയങ്ങളിലായി പതിച്ച് നല്‍കിയിട്ടുള്ളത്. ആദ്യഘട്ട പരിശോധനയില്‍ മുറിച്ച ചന്ദനമരത്തിന്റെ കുറ്റി കണ്ടെത്താനായിട്ടില്ല.