ഡിജിറ്റല്‍ സാക്ഷരതയുടെ ലോകം
സെപ്തംബര്‍ 8 ലോക സാക്ഷരതാ ദിനം;
കേരളം പൊതുസാക്ഷരതയില്‍ ഇന്ത്യക്ക് മാതൃകയായതുപോലെ, ഡിജിറ്റല്‍ സാക്ഷരതയിലും മുന്നേറുകയാണ്. അക്ഷയകേന്ദ്രങ്ങള്‍, ഇ-ഗവേണന്‍സ് സംവിധാനങ്ങള്‍, പൊതുജനങ്ങള്‍ക്ക് സൗജന്യ ഇന്റര്‍നെറ്റ് എന്നിവ കേരളത്തിന്റെ പ്രത്യേകതകളാണ്.
ഇന്നത്തെ കാലം 'ഡിജിറ്റല്‍ യുഗം' എന്നാണ് വിശേഷിപ്പിക്കപ്പെടുന്നത്. വിവര സാങ്കേതികവിദ്യയുടെ കരുത്തില്‍ മനുഷ്യരുടെ ജീവിതരീതിയും ചിന്താഗതിയും തന്നെ മാറിക്കഴിഞ്ഞു. ഈ പശ്ചാത്തലത്തിലാണ് ഡിജിറ്റല്‍ സാക്ഷരത അത്യാവശ്യമായിത്തീര്‍ന്നിരിക്കുന്നത്. ഡിജിറ്റല്‍ സാക്ഷരത എന്നു പറയുന്നത് കമ്പ്യൂട്ടര്‍, മൊബൈല്‍, ഇന്റര്‍നെറ്റ് തുടങ്ങിയ ഉപകരണങ്ങള്‍ ഉപയോഗിക്കുന്ന കഴിവ് മാത്രമല്ല. മറിച്ച്, വിവരങ്ങള്‍ തേടുകയും അവ വിലയിരുത്തുകയും സുരക്ഷിതമായി പങ്കിടുകയും ചെയ്യുന്ന ഉത്തരവാദിത്തപരമായ ഒരു സമീപനമാണ്.
വിദ്യാഭ്യാസ രംഗത്ത് ഡിജിറ്റല്‍ സാക്ഷരത വലിയ മാറ്റങ്ങളാണ് സൃഷ്ടിച്ചിരിക്കുന്നത്. ഓണ്‍ലൈന്‍ ക്ലാസുകള്‍, ഡിജിറ്റല്‍ ലൈബ്രറികള്‍, ഇ-ബുക്കുകള്‍, വെര്‍ച്വല്‍ പരീക്ഷകള്‍ ഇവയെല്ലാം വിദ്യാര്‍ത്ഥികള്‍ക്ക് അറിവിന്റെ ലോകം കൂടുതല്‍ സൗകര്യപ്രദമാക്കുന്നു.
അധ്യാപകര്‍ക്ക് പോലും ഡിജിറ്റല്‍ സാക്ഷരത അനിവാര്യമാണ്. പാഠ്യവിഷയങ്ങള്‍ ഡിജിറ്റല്‍ രീതിയില്‍ അവതരിപ്പിക്കാനും വിദ്യാര്‍ത്ഥികളുമായി ഓണ്‍ലൈന്‍ ആശയവിനിമയം നടത്താനും പുതിയ പഠനരീതികള്‍ പ്രയോഗിക്കാനും അവര്‍ക്ക് സാങ്കേതിക കഴിവ് വേണം.
തൊഴില്‍ മേഖലയില്‍ ഡിജിറ്റല്‍ സാക്ഷരതയുടെ പ്രാധാന്യം ദിനംപ്രതി വര്‍ധിച്ചുവരുന്നു. സര്‍ക്കാര്‍ ഓഫീസുകളില്‍ മുതല്‍ സ്വകാര്യ സ്ഥാപനങ്ങളില്‍ വരെ, എല്ലാ മേഖലകളും ഇപ്പോള്‍ ഇ-ഓഫീസ് സംവിധാനത്തിലേക്ക് മാറിക്കഴിഞ്ഞു. വീട്ടമ്മമാര്‍ക്കും സാധാരണ തൊഴിലാളികള്‍ക്കും ഡിജിറ്റല്‍ സാക്ഷരത ഏറെ സഹായകരമാണ്. ഓണ്‍ലൈന്‍ ബാങ്കിംഗ്, ഇ-കോമേഴ്‌സ്, ടെലിമെഡിസിന്‍ തുടങ്ങിയ സംവിധാനങ്ങള്‍ അവരുടെ ജീവിതം കൂടുതല്‍ ലളിതമാക്കുന്നു.
എന്നാല്‍ ഡിജിറ്റല്‍ ലോകത്തിന്റെ പ്രയോജനങ്ങളോടൊപ്പം ചില വെല്ലുവിളികളും ഉയര്‍ന്നുവരുന്നു. വ്യാജവാര്‍ത്തകള്‍, സൈബര്‍ കുറ്റകൃത്യങ്ങള്‍, ഓണ്‍ലൈന്‍ തട്ടിപ്പുകള്‍, സ്വകാര്യതയുടെ നഷ്ടം ഇവയെല്ലാം സമൂഹത്തിന് ഭീഷണിയാണ്. അതിനാല്‍, ഡിജിറ്റല്‍ സാക്ഷരതയുടെ ഭാഗമായി സൈബര്‍ സുരക്ഷാ ബോധവല്‍ക്കരണം വളരെ പ്രധാനമാണ്. സുരക്ഷിത പാസ്വേഡുകള്‍ ഉപയോഗിക്കുക, സംശയകരമായ ലിങ്കുകള്‍ ഒഴിവാക്കുക, വിശ്വസനീയമായ ഉറവിടങ്ങളില്‍ നിന്ന് മാത്രം വിവരങ്ങള്‍ സ്വീകരിക്കുക തുടങ്ങിയ കാര്യങ്ങള്‍ അഭ്യസിക്കണം.
കേരളം പൊതുസാക്ഷരതയില്‍ ഇന്ത്യക്ക് മാതൃകയായതുപോലെ, ഡിജിറ്റല്‍ സാക്ഷരതയിലും മുന്നേറുകയാണ്. അക്ഷയകേന്ദ്രങ്ങള്‍, ഇ-ഗവേണന്‍സ് സംവിധാനങ്ങള്‍, പൊതുജനങ്ങള്‍ക്ക് സൗജന്യ ഇന്റര്‍നെറ്റ് എന്നിവ കേരളത്തിന്റെ പ്രത്യേകതകളാണ്. ഗ്രാമപ്രദേശങ്ങളില്‍ പോലും ഡിജിറ്റല്‍ സേവനങ്ങള്‍ എത്തിക്കുന്ന പദ്ധതികള്‍ സംസ്ഥാനത്തും കേന്ദ്രത്തും നടപ്പിലാക്കിയിട്ടുണ്ട്. ഇതിലൂടെ ഗ്രാമീണര്‍ക്ക് വിവരസാങ്കേതിക വിദ്യയുടെ ലോകവുമായി ബന്ധപ്പെടാന്‍ സാധിക്കുന്നു.
പുതിയ തലമുറ കുട്ടികള്‍ 'ഡിജിറ്റല്‍ നേറ്റീവ്'സ് ആണെന്ന് പറയപ്പെടുന്നു. എന്നാല്‍ മുതിര്‍ന്നവര്‍ക്കും വയോധികര്‍ക്കും ഡിജിറ്റല്‍ ലോകം പഠിച്ച് ഉപയോഗിക്കാന്‍ അവസരം ലഭിക്കണം. എല്ലാവരും ഉള്‍പ്പെടുന്ന സാക്ഷരതയാണ് സമൂഹത്തിന്റെ വളര്‍ച്ചയ്ക്ക് അടിസ്ഥാനം.
ഡിജിറ്റല്‍ സാക്ഷരത വികസനത്തിനും ജനാധിപത്യത്തിനും ഒരുപോലെ ശക്തിയേകുന്നു. വിവരാവകാശം ഉറപ്പാക്കാനും ജനങ്ങളെ പങ്കാളികളാക്കാനും ഡിജിറ്റല്‍ ലോകം സഹായിക്കുന്നു.
അറിവില്ലാതെ ഡിജിറ്റല്‍ ഉപകരണങ്ങള്‍ ഉപയോഗിക്കുന്നവര്‍ അപകടത്തില്‍പ്പെടാന്‍ സാധ്യത കൂടുതലാണ്. അതിനാല്‍ ഡിജിറ്റല്‍ സാക്ഷരതയെ വിദ്യാഭ്യാസത്തിന്റെ ഭാഗമാക്കി ശക്തമായി വളര്‍ത്തേണ്ടത് കാലത്തിന്റെ ആവശ്യമാണ്. ഡിജിറ്റല്‍ സാക്ഷരതയുടെ ലോകം അനന്തമായ അവസരങ്ങളുടെ ലോകമാണ്.
അറിവോടെയും ഉത്തരവാദിത്തത്തോടെയും സുരക്ഷിതമായും അത് ഉപയോഗിച്ചാല്‍ മാത്രമേ നമ്മുടെ വ്യക്തിജീവിതവും സമൂഹവും യഥാര്‍ത്ഥ പുരോഗതിയിലേക്കുയരുകയുള്ളു.