ഒട്ടേറെ സവിശേഷതകളുമായി കിയ ഇന്ത്യയുടെ പുതിയ മോഡല്‍ ക്ലാവിസ് മെയ് 8 ന് ലോഞ്ച് ചെയ്യും
ജനപ്രിയ മോഡലായ കിയ കാരന്‍സിന്റെ പ്രീമിയം പതിപ്പ് ആയാണ് ഇത് അവതരിപ്പിക്കുക.;
ന്യൂഡല്‍ഹി: പ്രമുഖ കാര്‍ നിര്‍മ്മാതാക്കളായ കിയ ഇന്ത്യയുടെ പുതിയ മോഡലായ ക്ലാവിസ് മെയ് 8 ന് ലോഞ്ച് ചെയ്യും. വരാനിരിക്കുന്ന എംപിവിയുടെ ഒരു ലഘുചിത്രം നല്‍കിക്കൊണ്ട് കമ്പനി ആദ്യ ടീസര്‍ പുറത്തിറക്കി. ക്ലാവിസിന്റെ എക്സ്റ്റീരിയര്‍ സ്റ്റൈലിങ്ങിലെ പ്രധാന അപ്‌ഡേറ്റുകള്‍ എടുത്തുകാണിക്കുന്നതാണ് പുതിയ ടീസര്‍.
ജനപ്രിയ മോഡലായ കിയ കാരന്‍സിന്റെ പ്രീമിയം പതിപ്പ് ആയാണ് ഇത് അവതരിപ്പിക്കുക. പ്രീമിയം സ്വഭാവത്തോടെ, ടൊയോട്ട ഇന്നോവ ഹൈക്രോസിനും മാരുതി സുസുക്കി ഇന്‍വിക്ടോയ്ക്കും എതിരായാണ് കിയ ക്ലാവിസ് ലക്ഷ്യമിടുന്നത്.
പുതിയ മോഡല്‍ വരുമ്പോള്‍ കാരന്‍സ് പിന്‍വലിക്കില്ലെന്നും ക്ലാവിസിനൊപ്പം കാരന്‍സിന്റെ വില്‍പ്പനയും നടത്തുമെന്നും കമ്പനി അറിയിച്ചു. കിയയുടെ വരവിന് ശേഷം കാരന്‍സ് ഒരു ഗെയിം ചേഞ്ചറാണ്. ഏപ്രിലില്‍, കൊറിയന്‍ കാര്‍ നിര്‍മ്മാതാവിന്റെ ഇന്ത്യന്‍ വിഭാഗം 15,00,000 യൂണിറ്റുകളുടെ സഞ്ചിത വില്‍പ്പന മറികടന്നു, എംപിവി 2,41,582 യൂണിറ്റുകളില്‍ 16.1% വിഹിതം നേടി.
കാരന്‍സുമായി താരതമ്യം ചെയ്യുമ്പോള്‍ മുന്‍വശം റീഡിസൈന്‍ ചെയ്ത നിലയിലാണ് ക്ലാവിസ്. കിയയുടെ ഏറ്റവും പുതിയ ഡിസൈന്‍ ഭാഷയുമായി പൊരുത്തപ്പെടുന്ന പുതിയ എല്‍ഇഡി ഡേ ടൈം റണ്ണിങ് ലൈറ്റുകളാണ് ഇതില്‍ ക്രമീകരിച്ചിരിക്കുന്നത്. ഇതിന് പൂരകമായി വേറിട്ട സ്റ്റൈലിലുള്ള എല്‍ഇഡി ഹെഡ് ലാമ്പുകളാണ് മറ്റൊരു ആകര്‍ഷണം.
നിലവിലുള്ള കാരന്‍സില്‍ നിന്ന് വ്യത്യസ്തമായി റീപ്രൊഫൈല്‍ ചെയ്ത ഫ്രണ്ട്, റിയര്‍ ബമ്പറുകളും പുതിയ അലോയ് വീല്‍ ഡിസൈനും, പനോരമിക് സണ്‍റൂഫും ഉണ്ട്. ഡിജിറ്റല്‍ ഇന്‍സ്ട്രുമെന്റ് ക്ലസ്റ്ററിന്റെ ദൃശ്യം സുരക്ഷയ്ക്ക് വേണ്ടിയുള്ള ADAS സ്യൂട്ട് കാറില്‍ ഉണ്ടാവുമെന്ന സൂചനയും നല്‍കുന്നു.
ക്ലാവിസ് കാരന്‍സുമായി 1.5 ലിറ്റര്‍ ടര്‍ബോ പെട്രോളും 1.5 ലിറ്റര്‍ ഡീസല്‍ എഞ്ചിനുകളും പങ്കിടുമെന്നും പ്രതീക്ഷിക്കുന്നു. മാനുവല്‍, ഓട്ടോമാറ്റിക് ട്രാന്‍സ്മിഷന്‍ ഓപ്ഷനുകളും ഉണ്ടാകും.
10,59,900 രൂപ മുതല്‍ 19,69,900 രൂപ വരെ (എക്‌സ്-ഷോറൂം) വിലയുള്ള കിയ കാരെന്‍സിനെക്കാള്‍ കിയ ക്ലാവിസിന്റെ വില കൂടുതലായിരിക്കുമെന്നും പ്രതീക്ഷിക്കുന്നു.
ലോഞ്ച് തീയതി അടുക്കുമ്പോള്‍ കാറുമായി ബന്ധപ്പെട്ട കൂടുതല്‍ വിവരങ്ങള്‍ പുറത്തുവരുമെന്നാണ് പ്രതീക്ഷ. നിലവിലുള്ള കാരന്‍സിനൊപ്പം ക്ലാവിസ് വില്‍ക്കുമെങ്കിലും മോഡല്‍ ലൈനപ്പില്‍ കാരന്‍സിന് മുകളിലായിരിക്കും ക്ലാവിസ് സ്ഥാനം പിടിക്കുക. കിയ കാരന്‍സില്‍ നിലവില്‍ ലഭ്യമായ അതേ എന്‍ജിന്‍, ട്രാന്‍സ്മിഷന്‍ ഓപ്ഷനുകള്‍ ക്ലാവിസ് നിലനിര്‍ത്താന്‍ സാധ്യതയുണ്ട്.