ചെങ്കല്ല് വില വര്‍ദ്ധന; അന്യം നിന്ന ജൈവവേലി വീണ്ടും സ്ഥാനം പിടിക്കുന്നു
വന്യ മൃഗങ്ങളില്‍ നിന്നും നാല്‍കാലികളില്‍ നിന്നും കാര്‍ഷിക വിളകളെ സംരക്ഷിക്കുന്നതിന് മലയോര മേഖലകളിലെ കര്‍ഷകര്‍ പരമ്പരാഗതമായി ആശ്രയിച്ചിരുന്നത് ജൈവ വേലിയെയായിരുന്നു;
ബദിയടുക്ക: ചെങ്കല്ല് വില വര്‍ദ്ധനയെ തുടര്‍ന്ന് അന്യം നിന്ന ജൈവ വേലി വീണ്ടും മലയോര മേഖലകളില്‍ സ്ഥാനം പിടിക്കുന്നു. പതിറ്റാണ്ടുകള്‍ക്ക് മുന്‍പ് വരെ വന്യ മൃഗങ്ങളില്‍ നിന്നും നാല്‍കാലികളില്‍ നിന്നും കാര്‍ഷിക വിളകളെ സംരക്ഷിക്കുന്നതിന് മലയോര മേഖലകളിലെ കര്‍ഷകര്‍ പരമ്പരാഗതമായി ആശ്രയിച്ചിരുന്നത് ജൈവ വേലിയെയായിരുന്നു. എന്നാല്‍ പിന്നീട് കര്‍ഷകര്‍ ജൈവ വേലിയെന്ന ആശയത്തില്‍ നിന്ന് പിന്‍വലിയുകയും പലരും മുള്ളുവേലിയേയും കല്ല് കൊണ്ടുള്ള സുരക്ഷാ വേലിയേയും ആശ്രയിക്കുവാന്‍ തുടങ്ങി.
പരമ്പരഗതമായി ഉപയോഗിച്ചു വന്ന ജൈവവേലി നിര്‍മ്മാണത്തിന് വിദഗ്ദരായ തൊഴിലാളികളെ ലഭിക്കാത്തതാണ് പ്രധാന കാരണമെന്ന് പറയുമ്പോഴും ചെങ്കല്ലുകള്‍ക്ക് വില വര്‍ദ്ധിച്ചതോടെയാണ് പലരും ജൈവവേലിയെ ആശ്രയിക്കാന്‍ തുടങ്ങിയത്. അതേ സമയം മഹാത്മ ദേശീയ ഗ്രാമീണ തൊഴിലുറപ്പ് പദ്ധതിയുടെ കീഴില്‍ കാര്‍ഷിക മേഖലയ്ക്ക് ഊന്നല്‍ നല്‍കി ജൈവവേലി നിര്‍മ്മിക്കാമെന്ന ഉത്തരവ് വന്നതോടെ കര്‍ഷകരും മറ്റ് അര്‍ഹതപ്പെട്ടവരും ജൈവവേലിയെ ആശ്രയിക്കുവാന്‍ തുടങ്ങി.
ചെങ്കല്ല് കൊണ്ട് ചുറ്റുമതില്‍ നിര്‍മ്മിക്കുമ്പോള്‍ കല്ല്, സിമന്റ്, മണല്‍ ഇവയുടെ അനിയന്ത്രിതമായി ഉയരുന്ന വിലക്കയറ്റവും, തൊഴിലാളികളുടെ ലഭ്യത കുറവും, ലഭിച്ചാല്‍ തന്നെ താങ്ങാനാവാത്ത കൂലി നല്‍കേണ്ടി വരുന്നതുമാണ് പലരേയും ജൈവവേലിയിലേക്ക് പിന്തിരിയാന്‍ പ്രേരിപ്പിച്ചത്. ഏറ്റവും സുലഭമായി നാട്ടിന്‍ പുറങ്ങളില്‍ നിന്നും ലഭിക്കുന്ന 'ശീമക്കോന്ന' യുടെയും മറ്റു കാട്ടു മരങ്ങളുടേയും ശിഖരങ്ങള്‍ വെട്ടിയെടുത്ത് മണ്ണില്‍ കുഴിച്ചിട്ട് കാട്ടു വള്ളികള്‍കൊണ്ട് വലിഞ്ഞു കെട്ടിയാണ് ജൈവ വേലിയുടെ നിര്‍മ്മാണ രീതി.
ചിലവ് കുറവായതിനാല്‍ മലയോര മേഖലയായ ബദിയടുക്ക, കുംബഡാജെ, ബെള്ളൂര്‍, എന്‍മകജെ തുടങ്ങി വിവിധ പ്രദേശങ്ങളിലെ കര്‍ഷകര്‍ വന്യമൃഗങ്ങളില്‍ നിന്ന് കാര്‍ഷിക വിളകളെ സംരക്ഷിക്കുന്നതിന് ജൈവവേലിയെയാണ് ആശ്രയിക്കുന്നത്.