യുഎസിന്റെ ആപ്പ് സ്റ്റോറുകളില്‍ തിരിച്ചെത്തി ടിക് ടോക്
വാഷിംഗ്ടണ്‍: യുഎസിന്റെ ആപ്പ് സ്റ്റോറുകളില്‍ തിരിച്ചെത്തി ടിക് ടോക്. ചൈനീസ് സോഷ്യല്‍ മീഡിയ പ്ലാറ്റ് ഫോമായ ടിക് ടോകിന്റെ നിരോധനം പ്രസിഡന്റ് ഡോണാള്‍ഡ് ട്രംപ് വൈകിപ്പിച്ചതാണ് ഇതിന് കാരണം. ഷോര്‍ട് വീഡിയോ ആപ്പ് ആയ ടിക് ടോക് ആപ്പിളിന്റെ ആപ്പ് സ്റ്റോറിലും ഗൂഗിളിന്റെ പ്ലേ സ്റ്റോറിലും ലഭ്യമായി തുടങ്ങിയതായി ബന്ധപ്പെട്ട വൃത്തങ്ങളെ ഉദ്ധരിച്ച് റോയിട്ടേഴ്സ് റിപ്പോര്‍ട്ട് ചെയ്തു.
അമേരിക്കയില്‍ 2024ല്‍ ഏറ്റവും കൂടുതല്‍ ഡൗണ്‍ലോഡ് ചെയ്യപ്പെട്ട രണ്ടാമത്തെ ആപ്പാണ് ടിക് ടോക്. ആപ്പിള്‍ സ്റ്റോറില്‍ നിന്നായിരുന്നു കൂടുതലായും ഡൗണ്‍ലോഡ് ചെയ്തിരുന്നത്. പകുതിയോളം അമേരിക്കക്കാരും ഈ ആപ്പ് ഉപയോഗിച്ചിരുന്നു. എന്നാല്‍ ടിക് ടോക്കിനെതിരെ സുരക്ഷാ ആരോപണങ്ങള്‍ ഉയര്‍ത്തി യുഎസ് നിരോധന നടപടികളിലേക്ക് കടക്കുകയായിരുന്നു.
ഇക്കഴിഞ്ഞ ജനുവരി 19നാണ് ഈ ആപ്പിന് അമേരിക്കയില്‍ സമ്പൂര്‍ണ വിലക്ക് വരുന്നത്. ഇതിന് മുന്നോടിയായി തന്നെ ടിക് ടോക് ആപ്ലിക്കേഷന്‍ യുഎസിലെ ആപ്പ് സ്റ്റോറുകളില്‍ നിന്ന് നീക്കംചെയ്യപ്പെട്ടിരുന്നു. എന്നാല്‍ ഡോണാള്‍ഡ് ട്രംപ് അധികാരമേറ്റതോടെ ടിക് ടോക്കിന്റെ വിലക്ക് നടപ്പാക്കുന്നത് 75 ദിവസത്തേക്ക് നീട്ടിവച്ചു. ഇതോടെയാണ് ടിക് ടോക്കിന് അമേരിക്കയില്‍ താല്‍ക്കാലികമായി പ്രവര്‍ത്തിക്കാനുള്ള അവസരമൊരുങ്ങിയത്.
കഴിഞ്ഞദിവസം മുതല്‍ ഈ ആപ്പ് വീണ്ടും അമേരിക്കയില്‍ ഡൗണ്‍ലോഡ് ചെയ്യാന്‍ കഴിയുന്നുണ്ട്. ടിക് ടോക്കിന് പ്രവര്‍ത്തിക്കാന്‍ താല്‍ക്കാലിക അനുമതി ട്രംപ് നല്‍കിയിരുന്നെങ്കിലും ആപ്പ് സ്റ്റോറുകളില്‍ ഇത് ഗൂഗിളും ആപ്പിളും ലഭ്യമാക്കിയിരുന്നില്ല.