മൂസാ ഷരീഫ് - കര്‍ണ കദൂര്‍ സഖ്യത്തിന് ഇരട്ട നേട്ടം; ഏഷ്യന്‍ പസഫിക് റാലിയിലും ദേശീയ കാര്‍ റാലിയിലും ഓവറോള്‍ വിജയം
ഒമ്പതാം കിരീടം ലക്ഷ്യമിട്ടാണ് ഇന്ത്യയിലെ തന്നെ നമ്പര്‍ വണ്‍ കോ-ഡ്രൈവര്‍ ആയ മൂസാ ഷരീഫ് മത്സരത്തിനിറങ്ങുന്നത്.;
കാസര്‍കോട്: ചെന്നൈയില്‍ നടന്ന 2025-ദേശീയ കാര്‍ റാലി ചാമ്പ്യന്‍ഷിപ്പിന്റെ ഒന്നാം റൗണ്ടായ സൗത്ത് ഇന്ത്യന്‍ റാലിയില്‍ മൂസാ ഷരീഫ്- കര്‍ണ കദൂര്‍ സഖ്യത്തിന് ഓവറോള്‍ ജയം. പരുപരുക്കന്‍ പാതയിലൂടെയുള്ള ദൈര്‍ഘ്യമേറിയ റാലി 2 മണിക്കൂര്‍ 3 മിനുറ്റ് 44 സെക്കന്റ് കൊണ്ടാണ് ഈ സഖ്യം ഫിനിഷ് ചെയ്ത് നേട്ടം കൊയ്തത്.
കഴിഞ്ഞ രണ്ട് ദിവസങ്ങളിലായിട്ടാണ് ഫെഡറേഷന്‍ ഓഫ് മോട്ടോര്‍ സ്‌പോര്‍ട്‌സ് ക്ലബ് ഇന്ത്യ, ദേശീയ കാര്‍ റാലി ചാമ്പ്യന്‍ഷിപ്പിന്റെ ആദ്യ റൗണ്ട് ചെന്നൈയില്‍ സംഘടിപ്പിച്ചത്. ഒമ്പതാം കിരീടം ലക്ഷ്യമിട്ടാണ് ഇന്ത്യയിലെ തന്നെ നമ്പര്‍ വണ്‍ കോ-ഡ്രൈവര്‍ ആയ മൂസാ ഷരീഫ് മത്സരത്തിനിറങ്ങുന്നത്. ആദ്യ റൗണ്ടിലെ ഓവറോള്‍ ജയം ആത്മവിശ്വാസം വര്‍ദ്ധിപ്പിച്ചതായി ഷരീഫ് പറഞ്ഞു.
മൊത്തം ആറ് റൗണ്ടുകള്‍ അടങ്ങിയതാണ് ഈ വര്‍ഷത്തെ ദേശീയ കാര്‍ റാലി ചാമ്പ്യന്‍ഷിപ്പ്. എം ആര്‍ എഫിന്റെ പിന്തുണയോടെ ടീം അര്‍കാ മോട്ടോര്‍ സ്‌പോര്‍ട്ടിന് വേണ്ടി വോള്‍ക്‌സ് വാഗന്‍ പോളോ കാര്‍ ഉപയോഗിച്ചാണ് മൊഗ്രാല്‍ പെര്‍വാഡ് സ്വദേശിയായ ഷരീഫും കര്‍ണാടക സ്വദേശിയായ കര്‍ണാ കദൂറും ആദ്യ റൗണ്ടില്‍ അനായാസ വിജയം നേടിയത്.
ഈ കിരീടത്തില്‍ കൂടി മുത്തമിട്ടാല്‍ ഒമ്പത് തവണ ദേശീയ കിരീടം നേടുന്ന ആദ്യ ഇന്ത്യന്‍ നാവിഗേറ്റര്‍ എന്ന ബഹുമതി കൂടി മൂസാ ഷരീഫിന് സ്വന്തം പേരിലാക്കാം. ഇതോടൊപ്പം ചെന്നൈയില്‍ നടന്ന ഏഷ്യന്‍ പസഫിക് കാര്‍ റാലി ചാമ്പ്യന്‍ഷിപ്പിന്റെ രണ്ടാം റൗണ്ടിലും മൂസാ ഷരീഫ്- കര്‍ണ കദൂര്‍ സഖ്യം ഓവറോള്‍ വിജയം കരസ്ഥമാക്കിയിട്ടുണ്ട്.