ഇന്ത്യന്‍ ഉല്‍പ്പന്നങ്ങളുടെ വിപുലമായ ശേഖരം; ഭാരത് മാര്‍ട്ട് 2026 ല്‍ യുഎഇയില്‍ പ്രവര്‍ത്തനം ആരംഭിക്കും
ജെബല്‍ അലി ഫ്രീ സോണില്‍ തന്ത്രപരമായി സ്ഥിതി ചെയ്യുന്ന ഈ കെട്ടിടത്തില്‍ 1,500 ഷോറൂമുകളും 700,000 ചതുരശ്ര അടിയില്‍ കൂടുതല്‍ അത്യാധുനിക വെയര്‍ഹൗസിംഗ് സംവിധാനങ്ങള്‍ അടക്കം ഉണ്ട്;
ദുബൈ: ഇന്ത്യന്‍ ഉല്‍പ്പന്നങ്ങളുടെ വിപുലമായ ശേഖരവുമായി ഭാരത് മാര്‍ട്ട് 2026 അവസാനത്തോടെ യുഎഇയില്‍ പ്രവര്‍ത്തനം ആരംഭിക്കും. ദുബൈയിലെ ജബല്‍ അലി ഫ്രീ സോണ്‍ ഏരിയയില്‍ 27 ലക്ഷം ചതുരശ്ര അടി വിസ്തീര്‍ണത്തില്‍, വിശാലമായ റീട്ടെയ്ല്‍, ഷോറൂമുകള്‍, വെയര്‍ഹൗസ് സ്‌പേസുകള്‍ എന്നിവയടക്കം വമ്പന്‍ സൗകര്യങ്ങളുമായാണ് ഭാരത് മാര്‍ട്ട് തുറക്കുക.
പ്രവാസി ഇന്ത്യക്കാരെ സംബന്ധിച്ചിടത്തോളം ഇത് സന്തോഷകരമായ കാര്യമാണ്. ഭാരത് മാര്‍ട്ട് പ്രവര്‍ത്തനം ആരംഭിക്കുന്നതോടെ ഇന്ത്യന്‍ ഉല്‍പ്പന്നങ്ങള്‍ ആഫ്രിക്ക, മിഡില്‍ ഈസ്റ്റ്, യൂറേഷ്യ എന്നിവിടങ്ങളിലെ വിപണി കീഴടക്കും. ഇന്ത്യന്‍ ഉല്‍പന്നങ്ങളുടെ വിപണന സംഭരണ കേന്ദ്രമായി വിഭാവനം ചെയ്ത ഭാരത് മാര്‍ട്ട്, ഇന്ത്യന്‍ വ്യവസായത്തിന് ആഫ്രിക്ക, മധ്യപൂര്‍വ രാജ്യങ്ങള്‍, യൂറോപ്പ് എന്നിവിടങ്ങളിലേക്ക് അതിവേഗം വ്യാപിക്കാനുള്ള പ്രവേശന കവാടം കൂടിയാണ്.
ദുബൈ കിരീടാവകാശി ശൈഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂമിന്റെ ആദ്യ ഇന്ത്യ സന്ദര്‍ശന വേളയിലാണ് ഭാരത് മാര്‍ട്ട് തുറക്കുന്നത് സംബന്ധിച്ച പ്രഖ്യാപനം ഉണ്ടായിരിക്കുന്നത്. ഇന്ത്യ-യുഎഇ ബന്ധം ശക്തമാക്കുന്നതിന്റെ ഭാഗമായാണിത്. ഭാരത് മാര്‍ട്ടിന്റെ രൂപരേഖ ശൈഖ് ഹംദാന്റെയും കേന്ദ്ര വാണിജ്യ വ്യവസായ മന്ത്രി പിയുഷ് ഗോയലിന്റെയും സാന്നിധ്യത്തില്‍ അവതരിപ്പിച്ചു.
ചൈനീസ് ഡ്രാഗണ്‍ മാര്‍ട്ടുമായി താരതമ്യം ചെയ്യുമ്പോള്‍, വ്യവസായങ്ങള്‍ക്ക് നേരിട്ടും (ബിസിനസ് ടു ബിസിനസ്), ഉപഭോക്താക്കളിലേക്കും (ബിസിനസ് ടു കണ്‍സ്യൂമര്‍) ആശ്രയിക്കാവുന്ന വ്യാപാര കേന്ദ്രമായിരിക്കും ഭാരത് മാര്‍ട്ട്. ഇത് ഇന്ത്യന്‍ വ്യവസായവും ആഗോള വിപണിയും തമ്മിലുള്ള വ്യാപാരം സുഗമമാക്കുന്നതിനായി രൂപീകരിച്ചിട്ടുള്ളതാണ്. ഇതിന്റെ നിര്‍മ്മാണ പ്രവര്‍ത്തനങ്ങള്‍ തുടങ്ങിയതായും ഡിപി വേള്‍ഡ് ഗ്രൂപ്പ് ചെയര്‍മാനും സിഇഒയുമായ സുല്‍ത്താന്‍ അഹ്‌മദ് ബിന്‍ സുലായേം പറഞ്ഞു.
'ഭാരത് മാര്‍ട്ട് ആഗോള ഉപഭോക്താക്കള്‍ക്ക്, പ്രത്യേകിച്ച് നമ്മുടെ പ്രദേശം, ജിസിസി, ആഫ്രിക്ക എന്നിവിടങ്ങളില്‍ നിന്നുള്ള ആവശ്യക്കാര്‍ക്ക് രാജ്യം സന്ദര്‍ശിക്കാനും അവരുടെ ആവശ്യങ്ങള്‍ നിറവേറ്റാനുമുള്ള ഒരു പ്രദര്‍ശന കേന്ദ്രമാണ്,' എന്നും അദ്ദേഹം പറഞ്ഞു. മാത്രമല്ല ഇതൊരു സര്‍ക്കാര്‍ സഹകരണ പ്രവര്‍ത്തനത്തിന്റെ ഉദാഹരണമാണെന്നും അദ്ദേഹം പറഞ്ഞു.
'ഇന്ത്യ ആഗോള വ്യാപാരം വികസിപ്പിക്കുമ്പോള്‍ ദുബായിയുടെ ലോകോത്തര അടിസ്ഥാന സൗകര്യങ്ങളും കണക്റ്റിവിറ്റിയും അതിനെ ഒരു സുപ്രധാന പങ്കാളിയാക്കുന്നു,' എന്ന് ഷെയ്ഖ് ഹംദാന്‍ പറഞ്ഞു. 'എണ്ണ ഇതര ഉഭയകക്ഷി വ്യാപാരം വര്‍ദ്ധിക്കുകയും 2,300-ലധികം ഇന്ത്യന്‍ കമ്പനികള്‍ ജഫ് സയില്‍ അഭിവൃദ്ധി പ്രാപിക്കുകയും ചെയ്യുന്നതോടെ, ആഗോള വിപണികളിലേക്ക് ഇന്ത്യന്‍ ഉല്‍പ്പന്നങ്ങള്‍ക്ക് വേഗത്തില്‍ പ്രവേശനം നല്‍കുന്നതിലൂടെ ഭാരത് മാര്‍ട്ട് യുഎഇ-ഇന്ത്യ പങ്കാളിത്തത്തെ കൂടുതല്‍ ശക്തിപ്പെടുത്തും.'
ഭാരത് മാര്‍ട്ടിനെ പീയൂഷ് ഗോയല്‍ ഒരു 'പരിവര്‍ത്തന പദ്ധതി' എന്നാണ് വിശേഷിപ്പിച്ചത്. ഇന്ത്യന്‍ ബിസിനസുകള്‍ ആഫ്രിക്കന്‍ വിപണികളില്‍ എത്താന്‍ പ്രാപ്തമാക്കുന്നതിന് പുതിയ അവസരങ്ങള്‍ സൃഷ്ടിക്കുന്നതില്‍ ഡിപി വേള്‍ഡിന്റെ ശ്രമങ്ങളെ അഭിനന്ദിക്കുകയും ചെയ്തു.
2.7 ദശലക്ഷം ചതുരശ്ര അടി വിസ്തീര്‍ണ്ണമുള്ള ഭാരത് മാര്‍ട്ട്, പ്രാരംഭ ഘട്ടത്തില്‍ 1.3 ദശലക്ഷം ചതുരശ്ര അടി വിസ്തീര്‍ണ്ണമുള്ള, ഇന്ത്യന്‍ സൂക്ഷ്മ, ചെറുകിട, ഇടത്തരം സംരംഭങ്ങളുടെ (എംഎസ്എംഇ) ഒരു പ്രധാന വ്യാപാര കേന്ദ്രമായി പ്രവര്‍ത്തിക്കും.
ജെബല്‍ അലി ഫ്രീ സോണില്‍ (JAFZA) തന്ത്രപരമായി സ്ഥിതി ചെയ്യുന്ന ഈ കെട്ടിടത്തില്‍ 1,500 ഷോറൂമുകളും 700,000 ചതുരശ്ര അടിയില്‍ കൂടുതല്‍ അത്യാധുനിക വെയര്‍ഹൗസിംഗ്, ലൈറ്റ് ഇന്‍ഡസ്ട്രിയല്‍ യൂണിറ്റുകള്‍, ഓഫീസ് സ്ഥലങ്ങള്‍, മീറ്റിംഗ് സൗകര്യങ്ങള്‍ എന്നിവയും ഉണ്ടായിരിക്കും. സ്ത്രീകള്‍ നയിക്കുന്ന ബിസിനസുകള്‍ക്കായി ഒരു പ്രത്യേക സ്ഥലവും ഭാരത് മാര്‍ട്ടിനുണ്ടാകും.
ജെബല്‍ അലി തുറമുഖത്ത് നിന്ന് വെറും 11 കിലോമീറ്റര്‍ അകലെയും അല്‍ മക്തൂം അന്താരാഷ്ട്ര വിമാനത്താവളത്തില്‍ നിന്ന് 15 കിലോമീറ്റര്‍ അകലെയും എത്തിഹാദ് റെയിലിലേക്ക് സൗകര്യപ്രദമായ പ്രവേശനവുമുള്ള ഭാരത് മാര്‍ട്ട്, ഇന്ത്യന്‍ ബിസിനസുകള്‍ക്ക് മള്‍ട്ടിമോഡല്‍ ലോജിസ്റ്റിക്‌സ് ശൃംഖലയിലേക്ക് പ്രവേശനം വാഗ്ദാനം ചെയ്യുമെന്ന് ഉറപ്പ് നല്‍കുന്നു.
ജെബല്‍ അലിയുടെ ആവാസവ്യവസ്ഥയിലൂടെ, കയറ്റുമതിക്കാര്‍ 150 സമുദ്ര ലക്ഷ്യസ്ഥാനങ്ങളുമായി ബന്ധിപ്പിക്കും, വ്യോമ കണക്റ്റിവിറ്റിക്ക് പുറമേ, ലോകമെമ്പാടുമുള്ള 300 ലധികം നഗരങ്ങളുമായി കെട്ടിടത്തെ ബന്ധിപ്പിക്കുകയും വിപണി വ്യാപ്തിയും കാര്യക്ഷമതയും വര്‍ദ്ധിപ്പിക്കുകയും ചെയ്യും.