ജീവിതത്തില്‍ ഏറ്റവും വിലപ്പെട്ട സമ്പത്ത് സമയം തന്നെയാണ്. ഒരിക്കല്‍ പോയ സമയം തിരികെ കൊണ്ടുവരാന്‍ ആരാലും കഴിയില്ല. പണം നഷ്ടപ്പെട്ടാല്‍ വീണ്ടും സമ്പാദിക്കാം, ആരോഗ്യം നഷ്ടപ്പെട്ടാലും ചിലപ്പോള്‍ മരുന്നുകളും വിശ്രമവും കൊണ്ട് വീണ്ടെടുക്കാം. എന്നാല്‍ സമയം ഒരിക്കല്‍ നഷ്ടപ്പെട്ടാല്‍ അത് ശാശ്വതമായി നഷ്ടമാണ്. അതിനാല്‍ സമയത്തെ വിലമതിച്ച് വിനിയോഗിക്കുക എന്നത് മനുഷ്യന്റെ പ്രധാന ഉത്തരവാദിത്വമാണ്.
സമയം ആരെയും കാത്തുനില്‍ക്കുന്നില്ല. രാജാവും കര്‍ഷകനും ശാസ്ത്രജ്ഞനും വിദ്യാര്‍ത്ഥിയും എല്ലാവര്‍ക്കും ദിവസവും 24 മണിക്കൂര്‍ മാത്രമെ ലഭിക്കൂ. എന്നാല്‍, അതിനെ ഉചിതമായി വിനിയോഗിക്കുന്നവര്‍ ജീവിതത്തില്‍ മുന്നേറുമ്പോള്‍, സമയം കളയുന്നവര്‍ പിന്നിലാകുന്നു. വിജയിച്ച മഹാന്മാര്‍ എല്ലാവരും സമയത്തിന്റെ മൂല്യം മനസിലാക്കിയവരാണ്. സമയം ശരിയായി ഉപയോഗിക്കാന്‍ പദ്ധതിപൂര്‍വ്വമായ ജീവിതരീതിയാണ് വേണ്ടത്. ദിവസവും ചെയ്യേണ്ട കാര്യങ്ങളുടെ പട്ടിക തയ്യാറാക്കുകയും മുന്‍ഗണനാക്രമത്തില്‍ അത് പൂര്‍ത്തിയാക്കുകയും വേണം. ചെറിയ കാര്യങ്ങള്‍ പോലും സമയം പാലിച്ച് ചെയ്യുന്നത്, വലിയ നേട്ടങ്ങള്‍ നേടാനുള്ള അടിത്തറയാകും.
വിദ്യാഭ്യാസരംഗത്ത് സമയത്തിന്റെ പ്രാധാന്യം വലുതാണ്. വിദ്യാര്‍ത്ഥികള്‍ പരീക്ഷക്ക് മുന്നേ പാഠം പൂര്‍ത്തിയാക്കാന്‍ കഴിയാത്തത് സമയക്രമം പാലിക്കാത്തതുകൊണ്ടാണ്. 'ഇന്ന് ചെയ്യാനുള്ളത് നാളെക്കായി മാറ്റിവെക്കരുത്' എന്ന പഴമൊഴി നമ്മെ സമയം നഷ്ടപ്പെടുത്താതെ പ്രവര്‍ത്തിക്കാന്‍ പ്രേരിപ്പിക്കുന്നു.
തൊഴില്‍ മേഖലയില്‍ സമയനിയന്ത്രണം നേരിട്ട് വിജയവുമായി ബന്ധപ്പെട്ട് കിടക്കുന്നു. സമയബന്ധിതമായി ജോലികള്‍ പൂര്‍ത്തിയാക്കുന്നവര്‍ക്കാണ് വിശ്വാസ്യതയും വളര്‍ച്ചയും ലഭിക്കുന്നത്. സമയം പാലിക്കാത്തവര്‍ക്ക് അവസരങ്ങള്‍ നഷ്ടപ്പെടുകയും വിശ്വാസ്യത കുറയുകയും ചെയ്യും.
സമയം മനുഷ്യജീവിതത്തിന്റെ കണ്ണാടി പോലെയാണ്. അതിനെ മാനിക്കുന്നവര്‍ക്ക് വിജയം, സന്തോഷം, സമാധാനം എന്നിവ സമയം തിരിച്ചു നല്‍കി അനുഗ്രഹിക്കും. സമയം കളയുന്നവര്‍ക്ക്, അതിന്റെ വില പിന്നീട് മാത്രം മനസിലാകും. പക്ഷേ അപ്പോഴേക്കും വൈകിയിരിക്കും.
സമയത്തെ പാഴാക്കുന്ന പല കാരണങ്ങളുണ്ട്. അനാവശ്യ സംഭാഷണങ്ങള്‍, സോഷ്യല്‍ മീഡിയയുടെ അമിത ഉപയോഗം, പദ്ധതിയില്ലാത്ത പ്രവര്‍ത്തനം തുടങ്ങിയവ. ഇത്തരം ശീലങ്ങള്‍ ഒഴിവാക്കുമ്പോഴേ സമയം ശരിയായ വഴിയില്‍ വിനിയോഗിക്കാന്‍ സാധിക്കൂ.
സമയം കൈകാര്യം ചെയ്യാന്‍ അറിയുന്നവര്‍ക്ക് ജീവിതം സ്വര്‍ണമയമാകും. ഓരോ നിമിഷവും മഹത്തരമായ ലക്ഷ്യങ്ങളിലേക്ക് വിനിയോഗിക്കുക. സമയം തന്നെ ജീവിതത്തിന്റെ സ്വര്‍ണം. നമുക്ക് നഷ്ടപ്പെടുത്താതെ സൂക്ഷിക്കാം.