പഴംതീനി വവ്വാലുകളില്‍ നിന്ന് മനുഷ്യരിലേക്ക് പകരുന്ന ഒരു മാരക വൈറസാണ് നിപ. വവ്വാലുകള്‍ ഭക്ഷിച്ച പഴങ്ങളിലൂടെയോ അവയുടെ സ്രവങ്ങള്‍ കലര്‍ന്ന കള്ള് പോലുള്ള പാനീയങ്ങളിലൂടെയോ ആണ് ഇത് മനുഷ്യരിലെത്തുന്നത്.
കേരളത്തില്‍ വീണ്ടും നിപ വൈറസിന്റെ സാന്നിധ്യം സ്ഥിരീകരിക്കപ്പെടുമ്പോള്‍, ഓരോ മലയാളിയുടെയും മനസ്സില്‍ 2018ലെ ഭീതിയുടെ നാളുകള്‍ ഓര്‍മ്മവരും. അന്ന് നാം അനുഭവിച്ച ആശങ്കകളും വേദനകളും ചെറുതല്ല. എന്നാല്‍, ആ അനുഭവത്തില്‍ നിന്ന് പാഠങ്ങള്‍ ഉള്‍ക്കൊണ്ട്, കൂടുതല്‍ കരുത്തോടെയും തയ്യാറെടുപ്പോടെയുമാണ് കേരളം ഇത്തവണ നിപയെ നേരിടുന്നത്. അതിനാല്‍, ഭയമല്ല, ശാസ്ത്രീയമായ ജാഗ്രതയാണ് ഈ ഘട്ടത്തില്‍ നമുക്ക് വേണ്ടത്.
എന്താണ് നിപ? എന്തുകൊണ്ട് ഇത്രയധികം ഭയക്കണം?
പഴംതീനി വവ്വാലുകളില്‍ നിന്ന് മനുഷ്യരിലേക്ക് പകരുന്ന ഒരു മാരക വൈറസാണ് നിപ. വവ്വാലുകള്‍ ഭക്ഷിച്ച പഴങ്ങളിലൂടെയോ അവയുടെ സ്രവങ്ങള്‍ കലര്‍ന്ന കള്ള് പോലുള്ള പാനീയങ്ങളിലൂടെയോ ആണ് ഇത് മനുഷ്യരിലെത്തുന്നത്. രോഗബാധിതനായ വ്യക്തിയുമായുള്ള അടുത്ത സമ്പര്‍ക്കത്തിലൂടെ, അയാളുടെ ശരീരസ്രവങ്ങള്‍ വഴി (തുമ്മല്‍, ചുമ, തുപ്പല്‍) മറ്റൊരാളിലേക്ക് അതിവേഗം പകരാനും സാധ്യതയുണ്ട്.
പനി, തലവേദന, പേശീവേദന, ഛര്‍ദ്ദി എന്നിവയാണ് പ്രാരംഭ ലക്ഷണങ്ങള്‍. എന്നാല്‍, രോഗം മൂര്‍ച്ഛിക്കുന്നതോടെ തലച്ചോറിനെ ബാധിക്കുന്ന മസ്തിഷ്‌കജ്വരത്തിലേക്ക് എത്തുകയും ഇത് രോഗിയുടെ നില അതീവ ഗുരുതരമാക്കുകയും ചെയ്യുന്നു. ഉയര്‍ന്ന മരണനിരക്കാണ് നിപയെ ഏറ്റവും അപകടകാരിയാക്കുന്നത്. കൃത്യമായ ചികിത്സയോ വാക്‌സിനോ ലഭ്യമല്ലാത്തതിനാല്‍, പ്രതിരോധം മാത്രമാണ് ഏക പോംവഴി.
കേരളത്തില്‍ ആദ്യമായി രോഗം റിപ്പോര്‍ട്ട് ചെയ്ത 2018ല്‍ മരണനിരക്ക് ആഗോള ശരാശരിയേക്കാള്‍ വളരെ കൂടുതലായിരുന്നു(94.4%). ഇതിന് കാരണം, രോഗം എന്താണെന്ന് തിരിച്ചറിയാനുണ്ടായ കാലതാമസവും അതുവരെ പരിചയമില്ലാത്ത ഒരു വൈറസിനെ നേരിടാനുണ്ടായ പ്രായോഗിക ബുദ്ധിമുട്ടുകളുമായിരുന്നു.
2018ലെ 94.4 ശതമാനം എന്ന ഭയാനകമായ കണക്കില്‍ നിന്ന് 2023ല്‍ 33.3 ശതമാനം ആയി മരണനിരക്ക് കുറയ്ക്കാന്‍ സാധിച്ചത് കേരളത്തിന്റെ ആരോഗ്യമേഖലയുടെ വലിയ നേട്ടമാണ്.
കേരളത്തിന്റെ കരുത്തുറ്റ പ്രതിരോധം
2018ലെ നിപ വ്യാപനത്തെ ലോകത്തിന് തന്നെ മാതൃകയാകുന്ന രീതിയില്‍ പിടിച്ചുകെട്ടിയ ചരിത്രം നമുക്കുണ്ട്. ആ അനുഭവസമ്പത്ത് ഇത്തവണ നമുക്ക് മുതല്‍ക്കൂട്ടാണ്. രോഗം സ്ഥിരീകരിച്ച ഉടന്‍ തന്നെ കേരളത്തിന്റെ ആരോഗ്യസംവിധാനം യുദ്ധകാലാടിസ്ഥാനത്തില്‍ പ്രവര്‍ത്തിച്ചു തുടങ്ങി.
1. ഉറവിടം കണ്ടെത്തല്‍: രോഗബാധയുടെ ഉറവിടം കണ്ടെത്താനും കൂടുതല്‍ ആളുകളിലേക്ക് പകരുന്നത് തടയാനുമുള്ള ശ്രമങ്ങള്‍ ഊര്‍ജ്ജിതമായി നടക്കുന്നു.
2. സമ്പര്‍ക്ക പട്ടിക തയ്യാറാക്കല്‍: രോഗികളുമായി സമ്പര്‍ക്കത്തില്‍ വന്നവരെ എത്രയും പെട്ടെന്ന് കണ്ടെത്തി ഐസൊലേഷനിലാക്കി നിരീക്ഷിക്കുന്നത് രോഗവ്യാപനം തടയാന്‍ അത്യന്താപേക്ഷിതമാണ്.
3. കണ്ടെയ്ന്‍മെന്റ് സോണുകള്‍: രോഗം റിപ്പോര്‍ട്ട് ചെയ്ത പ്രദേശങ്ങള്‍ കണ്ടെയ്ന്‍മെന്റ് സോണുകളായി പ്രഖ്യാപിച്ച് യാത്രകള്‍ക്കും മറ്റും നിയന്ത്രണം ഏര്‍പ്പെടുത്തുന്നത് രോഗം മറ്റു സ്ഥലങ്ങളിലേക്ക് പടരാതിരിക്കാന്‍ സഹായിക്കുന്നു.
4. ചികിത്സാ സൗകര്യങ്ങള്‍: രോഗികളെ ചികിത്സിക്കാന്‍ പ്രത്യേക ഐസൊലേഷന്‍ വാര്‍ഡുകളും വിദഗ്ധ ഡോക്ടര്‍മാരുടെ സംഘത്തെയും സജ്ജമാക്കിയിട്ടുണ്ട്. പൂനെ വൈറോളജി ഇന്‍സ്റ്റിറ്റ്യൂട്ടിന്റെ സഹായത്തോടെ പരിശോധനകള്‍ വേഗത്തിലാക്കുന്നു.
5. ബോധവല്‍ക്കരണം: ജനങ്ങളിലേക്ക് ശരിയായ വിവരങ്ങള്‍ എത്തിക്കാനും വ്യാജവാര്‍ത്തകള്‍ തടയാനും സര്‍ക്കാര്‍ സംവിധാനങ്ങള്‍ കാര്യക്ഷമമായി പ്രവര്‍ത്തിക്കുന്നു. പൊതുജനങ്ങളുടെ പങ്ക് അതിനിര്‍ണ്ണായകം. സര്‍ക്കാര്‍ സംവിധാനങ്ങള്‍ മാത്രം വിചാരിച്ചാല്‍ ഒരു മഹാമാരിയെയും പൂര്‍ണ്ണമായി തടയാനാവില്ല. ഈ പോരാട്ടത്തില്‍ ഓരോ പൗരന്റെയും സഹകരണം അനിവാര്യമാണ്. മാസ്‌ക് ധരിക്കുക: രോഗബാധിതരുമായി സമ്പര്‍ക്കത്തില്‍ വരാന്‍ സാധ്യതയുള്ള ആസ്പത്രികളിലും മറ്റ് പൊതു ഇടങ്ങളിലും പോകുമ്പോള്‍ നിര്‍ബന്ധമായും മാസ്‌ക് ധരിക്കണം.
കൈകള്‍ ശുചിയാക്കുക: സോപ്പും വെള്ളവും ഉപയോഗിച്ചോ സാനിറ്റൈസര്‍ ഉപയോഗിച്ചോ കൈകള്‍ എപ്പോഴും വൃത്തിയായി സൂക്ഷിക്കുക.
പഴങ്ങള്‍ കഴിക്കുമ്പോള്‍ ശ്രദ്ധിക്കുക: പക്ഷികള്‍ കൊത്തിയതോ നിലത്തു വീണു കിടക്കുന്നതോ ആയ പഴങ്ങള്‍ കഴിക്കുന്നത് ഒഴിവാക്കുക. പഴങ്ങള്‍ നന്നായി കഴുകിയ ശേഷം മാത്രം ഉപയോഗിക്കുക.
രോഗലക്ഷണങ്ങള്‍ അവഗണിക്കരുത്: പനി, ചുമ, തലവേദന തുടങ്ങിയ ലക്ഷണങ്ങള്‍ കണ്ടാല്‍ സ്വയം ചികിത്സിക്കാതെ ഉടന്‍ തന്നെ അടുത്തുള്ള ആരോഗ്യ കേന്ദ്രത്തില്‍ വിവരം അറിയിക്കുക. സര്‍ക്കാരിന്റെ നിര്‍ദ്ദേശങ്ങള്‍ പൂര്‍ണ്ണമായി പാലിച്ച്, ഓരോ വ്യക്തിയും ഉത്തരവാദിത്തത്തോടെ പെരുമാറിയാല്‍ ഈ പ്രതിസന്ധിയെയും നമുക്ക് മറികടക്കാന്‍ സാധിക്കും. ഭയമല്ല, ജാഗ്രതയുടെ കരുതലാണ് നമ്മെ വിജയത്തിലേക്ക് നയിക്കുക. നമുക്ക് ഒരുമിച്ച് നില്‍ക്കാം, നിപയെ അതിജീവിക്കാം.