ഡബ്ല്യു.ഡബ്ല്യു.ഇ പ്രചോദനവുമായി 'ചത്ത പച്ച': മെയ് മാസത്തില്‍ ചിത്രീകരണം ആരംഭിക്കും
ഡബ്ല്യു.ഡബ്ല്യു.ഇ (WWE)യില്‍ നിന്ന് പ്രചോദനമുള്‍ക്കൊണ്ട് മലയാളത്തില്‍ ഒരുങ്ങുന്ന പാന്‍ ഇന്ത്യന്‍ റെസ്ലിങ് ആക്ഷന്‍ കോമഡി എന്റര്‍ടെയ് നര്‍ 'ചത്ത പച്ച- റിങ് ഓഫ് റൗഡീസ്' ചിത്രത്തിന്റെ ചിത്രീകരണം മെയ് മാസത്തില്‍ ആരംഭിക്കുമെന്ന് അണിയറ പ്രവര്‍ത്തകര്‍.
ഫോര്‍ട്ട് കൊച്ചിയിലുള്ള ഒരു അണ്ടര്‍ ഗ്രൗണ്ട് ഡബ്ല്യു.ഡബ്ല്യു.ഇ സ്‌റ്റൈല്‍ റെസ്ലിങ് ക്ലബും അവിടെയെത്തുന്ന കഥാപാത്രങ്ങളെയും അടിസ്ഥാനമാക്കിയുള്ള ബിഗ് ബഡ്ജറ്റ് ചിത്രമാണ് ഇത്. പാന്‍ ഇന്ത്യന്‍ താരനിരയാണ് ചിത്രത്തില്‍ അണിനിരക്കുന്നത്.
അര്‍ജുന്‍ അശോകന്‍ നായകനായി എത്തുന്ന ചിത്രത്തില്‍ റോഷന്‍ മാത്യു, മാര്‍ക്കോ എന്ന സിനിമയില്‍ വിക്ടര്‍ എന്ന അന്ധ കഥാപാത്രത്തെ അവതരിപ്പിച്ച ഇഷാന്‍ ഷൗക്കത്, വിശാഖ് നായര്‍, പൂജ മോഹന്‍ദാസ് എന്നിവരും പ്രധാന വേഷങ്ങളില്‍ എത്തുന്നുണ്ട്. പ്രീ പ്രൊഡക്ഷന്‍ ജോലികള്‍ പുരോഗമിക്കുന്ന ചിത്രത്തിന്റെ ചിത്രീകരണം 2025 മെയ് മാസത്തില്‍ ആരംഭിക്കും. ഈ വര്‍ഷം അവസാനത്തോടെ ചിത്രം റിലീസിനെത്തിക്കാനാണ് അണിയറ പ്രവര്‍ത്തകരുടെ നീക്കം.
റീല്‍ വേള്‍ഡ് എന്റര്‍ടൈന്‍മെന്റ് ആണ് ചിത്രം നിര്‍മ്മിക്കുന്നത്. ട്രാന്‍സ് വേള്‍ഡ് ഗ്രൂപ്, ലെന്‍സ്മാന്‍ ഗ്രൂപ്പ് എന്നിവര്‍ കൂടി ചേര്‍ന്നാണ് റീല്‍ വേള്‍ഡ് എന്റര്‍ടൈന്‍മെന്റ് രൂപപ്പെടുത്തിയിരിക്കുന്നത്. ട്രാന്‍സ് വേള്‍ഡ് ഗ്രൂപ്പിന്റെ രമേഷ്, റിതേഷ് രാമകൃഷ്ണന്‍, ലെന്‍സ്മാന്‍ ഗ്രൂപ്പിന്റെ ഷിഹാന്‍ ഷൗക്കത്ത് എന്നിവര്‍ക്കൊപ്പം ഈ ചിത്രത്തിന്റെ നിര്‍മ്മാണ പ്രക്രിയയില്‍, മമ്മൂട്ടി കമ്പനിയുടെ നേതൃനിരയിലുള്ള എസ് ജോര്‍ജ്, സുനില്‍ സിങ് എന്നിവരും പങ്കാളികളാകുന്നുണ്ട്. ചിത്രം സംവിധാനം ചെയ്യുന്നത് മോഹന്‍ലാലിന്റെ അനന്തരവനും ജീത്തു ജോസഫ്, രാജീവ് രവി, മോഹന്‍ലാല്‍ എന്നിവര്‍ക്കൊപ്പം സംവിധാന സഹായിയായി പ്രവര്‍ത്തിച്ചിട്ടുള്ള അദ്വൈത് നായര്‍ ആണ്.
പ്രശസ്ത ബോളിവുഡ് സംഗീത സംവിധായകരായ ശങ്കര്‍- ഇഹ്സാന്‍- ലോയ് ടീം മലയാളത്തില്‍ സംഗീത സംവിധായകരായി അരങ്ങേറ്റം കുറിക്കുന്ന ചിത്രം കൂടിയാണ് ഇത്. ഗാനങ്ങള്‍ക്ക് വരികള്‍ രചിച്ചിരിക്കുന്നത് വിനായക് ശശികുമാറാണ്.
2022ല്‍ കാന്‍ ഫിലിം ഫെസ്റ്റിവലില്‍ അവാര്‍ഡ് നേടിയ 'ഡെഡ് ലൈന്‍' എന്ന ചിത്രത്തിന്റെ വിജയത്തിന് ശേഷം തന്റെ അടുത്ത പ്രധാന സംരംഭത്തിലേക്ക് ചുവടുവെക്കുകയാണ് 'ചത്ത പച്ചാ- റിംഗ് ഓഫ് റൗഡീസ് എന്ന ചിത്രത്തിലൂടെ ഷിഹാന്‍ ഷൗകത്ത്. മലയാള സിനിമയുടെ കഥപറച്ചിലിന്റെ മികവിനെ, ഗുസ്തി വിനോദത്തില്‍ സംയോജിപ്പിക്കുക എന്നതാണ് 'ചത്ത പച്ചാ- റിംഗ് ഓഫ് റൗഡീസി'ലൂടെ അദ്ദേഹത്തിന്റെ ലക്ഷ്യം. ചിത്രത്തിലെ അഭിനേതാക്കളെ തേടി കാസ്റ്റിംഗ് നടത്തുന്നത് പുരോഗമിക്കുന്നു. ചിത്രത്തിലെ അഭിനേതാക്കളെ തിരഞ്ഞെടുക്കാനായി ഈ മാസം ഒരു ഓപ്പണ്‍ കാസ്റ്റിംഗ് കോള്‍ നടക്കുന്നുണ്ട്.
മാര്‍ക്കോ ഛായാഗ്രാഹകന്‍ ചന്ദ്രു സെല്‍വരാജ്, ആക്ഷന്‍- കലൈ കിങ്സണ്‍, എഡിറ്റിംഗ്- പ്രവീണ്‍ പ്രഭാകര്‍, മേക്കപ്പ്- റോണക്‌സ് സേവ്യര്‍, വസ്ത്രാലങ്കാരം- മെല്‍വി, പിആര്‍ഒ- വൈശാഖ് സി വടക്കേവീട്, ജിനു അനില്‍ കുമാര്‍ എന്നിവരാണ് മറ്റ് അണിയറ പ്രവര്‍ത്തകര്‍.