മൊഗ്രാല്‍ സ്‌കൂളിലെ ഓട് പാകിയ കെട്ടിടത്തിന്റെ ഫിറ്റ്‌നസ് റദ്ദ് ചെയ്തു
മൊഗ്രാല്‍ സ്‌കൂളിലെ ഓട് പാകിയ കെട്ടിടം
മൊഗ്രാല്‍: ശക്തമായ കാലവര്‍ഷത്തെ മുന്‍നിര്‍ത്തി സ്‌കൂളുകളില്‍ സുരക്ഷാ സംവിധാനം ഒരുക്കുന്നതിന്റെ ഭാഗമായി മൊഗ്രാല്‍ ജി.വി.എച്ച്.എസ്.എസില്‍ ഏഴ് ക്ലാസ് റൂമുകള്‍ പ്രവര്‍ത്തിച്ചുവരുന്ന ഓട് പാകിയ കെട്ടിടത്തില്‍ നിന്ന് വിദ്യാര്‍ത്ഥികളെ സ്‌കൂള്‍ അധികൃതര്‍ ഒഴിപ്പിച്ചതിന് പിന്നാലെ പരിശോധന നടത്തിയ കുമ്പള പഞ്ചായത്ത് അസി. എഞ്ചിനീയര്‍ സ്‌കൂള്‍ കെട്ടിടത്തിനുള്ള ഫിറ്റ്‌നസ് സര്‍ട്ടിഫിക്കറ്റ് റദ്ദ് ചെയ്തു. കാലപ്പഴക്കം ചെന്ന ഓട് പാകിയ കെട്ടിടത്തിന്റെ മേല്‍ക്കൂരയില്‍ സുരക്ഷാ ഭീഷണി നിലനില്‍ക്കുന്നതായും ക്ലാസ് മുറികളില്‍ ചോര്‍ച്ച കണ്ടെത്തിയതിനെയും തുടര്‍ന്നാണ് കെട്ടിടത്തിന് അണ്‍ഫിറ്റ് സര്‍ട്ടിഫിക്കറ്റ് നല്‍കിയിരിക്കുന്നത്. സ്‌കൂള്‍ അധികൃതര്‍ നേരത്തെ താല്‍ക്കാലികമായായിരുന്നു ക്ലാസില്‍ നിന്ന് കുട്ടികളെ മാറ്റിയിരുന്നത്. കെട്ടിടം അണ്‍ഫിറ്റായതോടെ ഇനി ഓട് പാകിയ കെട്ടിടത്തിന് പകരം പുതിയ കെട്ടിടമോ, ഇതേ കെട്ടിടത്തില്‍ അറ്റകുറ്റപ്പണിയോ നടത്തി ഫിറ്റ്‌നസ് സര്‍ട്ടിഫിക്കറ്റ് വാങ്ങേണ്ടിവരും. സ്‌കൂളില്‍ ഇപ്പോള്‍ തന്നെ ക്ലാസ് റൂമുകളുടെ കുറവുണ്ട്. സ്‌കൂളില്‍ 2500ലേറെ വിദ്യാര്‍ത്ഥികള്‍ പഠിക്കുന്നുണ്ട്. എന്നാല്‍ ഇതിന് ആവശ്യമായ കെട്ടിട സൗകര്യം ഇപ്പോള്‍ ഇല്ല. സ്‌കൂള്‍ കെട്ടിടത്തിനായി പി.ടി.എ-എസ്.എം.സി കമ്മിറ്റികള്‍ നിരന്തരമായി ബന്ധപ്പെട്ടവരെ സമീപിപിച്ചുവരികയാണ്.