പ്രമുഖ സാഹിത്യകാരന്‍മാരും ചരിത്രകാരനും ഒരേ വേദിയില്‍; പുസ്തക പ്രകാശനം ശ്രദ്ധേയമായി
കെ.വി. കുമാരന്‍ വിവര്‍ത്തനം ചെയ്ത പുസ്തകങ്ങളുടെ പ്രകാശന ചടങ്ങില്‍ പ്രശസ്ത കന്നഡ സാഹിത്യകാരന്‍ ഡോ. പ്രഭാകര്‍ ശിശില സംസാരിക്കുന്നു
കാസര്‍കോട്: കാസര്‍കോട്ട് ഇന്നലെ നടന്ന പുസ്തക പ്രകാശന ചടങ്ങ് മലയാളത്തിലെയും കന്നഡയിലെയും രണ്ട് പ്രമുഖ സാഹിത്യകാരന്‍മാരുടെ സാന്നിധ്യംകൊണ്ട് ശ്രദ്ധേയമായി. പ്രശസ്ത കന്നഡ സാഹിത്യ കാരന്‍ ഡോ. ബി. പ്രഭാകര ശിശിലയും വിവര്‍ത്തനത്തിന് കേന്ദ്ര സാഹിത്യ അവാര്‍ഡ് നേടിയ കെ.വി. കുമാരന്‍ മാസ്റ്ററും ചരിത്രകാരന്‍ ഡോ. സി. ബാലന്‍ ഒരേ വേദിയില്‍ അണിനിരന്നപ്പോള്‍ കാസര്‍കോടിനത് നൂറ്റാണ്ടുകളുടെ ചരിത്രത്തിലേക്കുള്ള വാതില്‍ തുറന്നുവെക്കുന്നതായി. ഡോ. ബി. പ്രഭാകര ശിശില എഴുതി കെ.വി. കുമാരന്‍ മലയാളത്തിലേക്ക് വിവര്‍ത്തനം ചെയ്ത ചിന്താഗ്‌നി(നോവല്‍), കര്‍ണാടകത്തിലെ കര്‍ഷക പോരാട്ടങ്ങള്‍(ചരിത്രം) എന്നീ പുസ്തകങ്ങളുടെ പ്രകാശനമാണ് ഇന്നലെ കാസര്‍കോട് ജില്ലാ ലൈബ്രറി ഹാളില്‍ നടന്നത്. ലൈബ്രറി കൗണ്‍സില്‍ താലൂക്ക് സെക്രട്ടറി പി.ദാമോദരന്‍ അധ്യക്ഷത വഹിച്ചു. ചരിത്രകാരന്‍ ഡോ. സി. ബാലന്‍, ഡോ. രാധാകൃഷ്ണ ബെള്ളൂറു എന്നിവര്‍ യഥാക്രമം രവീന്ദ്രന്‍ പാടി, രാധാകൃഷ്ണ കെ.ഉളിയത്തടുക്ക എന്നിവര്‍ക്ക് നല്‍കിയാണ് പ്രകാശനം നിര്‍വഹിച്ചത്.
ഗ്രന്ഥകര്‍ത്താവിനെ കാര്‍ത്തിക് പഡ്രെ പരിചയപ്പെടുത്തി. എണ്ണമറ്റ കൃതികള്‍ രചിച്ചിട്ടുള്ള ഡോ. പ്രഭാകര ശിശില എഴുത്തനുഭവങ്ങള്‍ പങ്കുവെച്ചപ്പോള്‍ നിറഞ്ഞ സദസ് കാതുകൂര്‍പ്പിച്ച് കേട്ടിരിക്കുകയായിരുന്നു. പ്രകാശനം കര്‍മ്മം നിര്‍വ്വഹിച്ച് സംസാരിച്ച ഡോ. സി. ബാലന്‍ കാസര്‍കോടന്‍ ചരിത്രങ്ങളുടെ ഉള്ളറ തുറന്നുവെച്ചു. കെ.വി. കുമാരന്‍ സ്വാഗതവും ബാലകൃഷ്ണന്‍ ചെര്‍ക്കള നന്ദിയും പറഞ്ഞു.