അതിര്‍ത്തിയിലെ രൂപമാറ്റം ആരെ തുണക്കും? വൊര്‍ക്കാടിയില്‍ വീറുറ്റ പോര്

മഞ്ചേശ്വരം: കഴിഞ്ഞ തവണത്തേത് പോലല്ല. അതിര്‍ത്തികളില്‍ വന്ന രൂപമാറ്റം വൊര്‍ക്കാടി ഡിവിഷനില്‍ ബലാബല പോരിനാണ് കളമൊരുങ്ങിയിരിക്കുന്നത്. ജില്ലാ പഞ്ചായത്ത് ഡിവിഷനുകളില്‍ കാലങ്ങളായി യു.ഡി.എഫിന്റെ ഉറച്ച ഡിവിഷനാണ് വൊര്‍ക്കാടി.

പക്ഷെ, രൂപമാറ്റം വന്നതോടെ ഇവിടത്തെ കാര്യം പ്രവചനാതീതം. നേരത്തെയുണ്ടായിരുന്ന രണ്ട് ബ്ലോക്ക് ഡിവിഷനുകള്‍ മറ്റൊരിടത്തേക്ക് മാറ്റി, പകരം കൂട്ടിച്ചേര്‍ത്തത് ഒരെണ്ണം മാത്രം. യു.ഡി.എഫിന് നല്ല മേല്‍ക്കോയ്മയുള്ള കടമ്പാര്‍, ബഡാജെ ഡിവിഷനുകളെയാണ് മഞ്ചേശ്വരം ഡിവിഷനിലേക്ക് മാറ്റിയിരിക്കുന്നത്. പകരം പുത്തിഗെ ഡിവിഷനിലെ മുളിഗദ്ദെയെ കൂട്ടിച്ചേര്‍ത്തു.

ഇത് കോണ്‍ഗ്രസിനും ബി.ജെ.പിക്കും ഒരുപോലെ സ്വാധീനമുള്ളതാണ്. 67,025 വോട്ടര്‍മാരുള്ള ഡിവിഷനില്‍ കണക്കുകൂട്ടി വിജയസാധ്യത പറയുകയാണ് മുന്നണികള്‍. പുതിയ രൂപമാറ്റം തങ്ങളെ തുണക്കുമെന്ന് ബി.ജെ.പി അവകാശപ്പെടുമ്പോള്‍ കോട്ടയില്‍ ഇളക്കം തട്ടില്ലെന്ന ഉറച്ച പ്രതീക്ഷയിലാണ് യു.ഡി.എഫ്. വിജയ പ്രതീക്ഷ തന്നെയാണ് എല്‍.ഡി.എഫിനും പറയാനുള്ളത്. നാട്ടുകാരായ സ്ഥാനാര്‍ത്ഥികളാണ് മൂവരുമെന്ന പ്രത്യേകതയുമുണ്ട്. നാലായിരത്തോളം വോട്ടുകള്‍ക്കാണ് നേരത്തെ യു.ഡി.എഫ് വിജയിച്ചത്.

കോണ്‍ഗ്രസ് നേതാവും മുന്‍ ജില്ലാ പഞ്ചായത്ത് അംഗവുമായ ഹര്‍ഷാദ് വൊര്‍ക്കാടിയാണ് യു.ഡി.എഫ് സ്ഥാനാര്‍ത്ഥി. 2015-20 കാലയളവില്‍ ജില്ലാ പഞ്ചായത്തംഗമായും 2010-15 കാലയളവില്‍ മഞ്ചേശ്വരം ബ്ലോക്ക് പഞ്ചായത്ത് വൈസ് പ്രസിഡണ്ടുമായിരുന്നു. ഈ അനുഭവ സമ്പത്തും നേരത്തെ നടത്തിയ വികസന പ്രവര്‍ത്തനങ്ങളും പറഞ്ഞാണ് ഹര്‍ഷാദ് വോട്ടര്‍മാരെ സമീപിക്കുന്നത്. വിജയം ഉറപ്പാണെന്ന് യു.ഡി.എഫ് വൃത്തങ്ങള്‍ ആവര്‍ത്തിച്ച് പറയുന്നു.

വിജയ പ്രതീക്ഷയുള്ള ഡിവിഷനില്‍ ജില്ലാ ജനറല്‍ സെക്രട്ടറി എം. വിജയ്കുമാര്‍ റൈയെയാണ് ബി.ജെ.പി കളത്തിലിറക്കിയിരിക്കുന്നത്. മംഗല്‍പാടി പഞ്ചായത്തംഗമെന്ന നിലയില്‍ അനുഭവക്കരുത്തുമുണ്ട്. സംഘടനാ പ്രവര്‍ത്തനത്തില്‍ സജീവമായതിനാല്‍ സ്ഥാനാര്‍ത്ഥിക്ക് വിവിധ പ്രദേശങ്ങളിലുള്ള ബന്ധം ഗുണം ചെയ്യുമെന്നാണ് പാര്‍ട്ടിയുടെ കണക്ക് കൂട്ടല്‍.

എല്‍.ഡി.എഫില്‍ സി.പി.ഐക്ക് അനുവദിച്ച സീറ്റില്‍ പ്രാദേശിക നേതാവ് അശ്വത് പൂജാരിയെന്ന യുവ മുഖത്തെയാണ് ഇറക്കിയിട്ടുള്ളത്. സി.പി.ഐ പൈവളിഗെ ലോക്കല്‍ കമ്മിറ്റി അംഗമാണ്. സഹകാരി എന്ന നിലയിലും കലാ, കായിക, സാംസ്‌കാരിക പ്രവര്‍ത്തകനെന്ന നിലയിലും നാട്ടുകാര്‍ക്ക് പരിചിതനാണ്. പൈവളിഗെ സര്‍വീസ് സഹകരണ ബാങ്ക് പ്രസിഡണ്ട്, ഡയറക്ടര്‍ എന്നീ നിലകളില്‍ പ്രവര്‍ത്തിച്ചിരുന്നു. പി.ഡി.പി സ്ഥാനാര്‍ത്ഥിയായി ഇബ്രാഹിം തോഖ, സ്വതന്ത്ര സ്ഥാനാര്‍ത്ഥി ഐ. അബ്ദുല്‍ ലത്തീഫ് എന്നിവരും മത്സരരംഗത്തുണ്ട്.