തിരുവനന്തപുരം: സംസ്ഥാനത്ത് കോവിഡ് വ്യാപനം രൂക്ഷമായി തുടരുന്ന സാഹചര്യത്തില് പ്രതിരോധ നടപടികളും പരിശോധനാ നടപടികളുമെല്ലാം വേഗത്തിലാക്കാന് സര്ക്കാര് തീരുമാനം. ആര്.ടി.പി.സി.ആര് പരിശോധനാ ഫലം 12 മണിക്കൂറിനുള്ളില് നല്കിയിരിക്കണമെന്നും ലഭ്യമാക്കിയില്ലെങ്കില് അത്തരം ലാബുകളുടെ ലൈസന്സ് റദ്ദാക്കുമെന്നും മുഖ്യമന്ത്രി പിണറായി വിജയന് അറിയിച്ചു. ഫലം നെഗറ്റീവ് ആണെങ്കിലും പോസിറ്റീവ് ആണെങ്കിലും 12 മണിക്കൂറിനുള്ളില് ലഭ്യമാക്കിയിരിക്കണം.
ഓരോ ലാബിലും ഉപയോഗിക്കുന്ന ആന്റിജന്, ആര്.ടി.പി.സി.ആര് ടെസ്റ്റ് കിറ്റുകള് ജില്ല അതോറിറ്റികള് പരിശോധിക്കും. നിലവാരമില്ലാത്ത കിറ്റുകള് ഉപയോഗിക്കുന്ന ലബോറട്ടറികളുടെ ലൈസന്സും റദ്ദാക്കുമെന്ന് മുഖ്യമന്ത്രി പറഞ്ഞു. സംസ്ഥാനത്ത് കോവിഡ് വ്യാപിക്കുന്ന സാഹചര്യത്തില് രോഗലക്ഷണം കാണിക്കുന്ന എല്ലാവരേയും ആര്.ടി.പി.സി.ആര് ടെസ്റ്റുകള്ക്ക് വിധേയമാക്കാനാണ് നിര്ദേശം.
18 വയസ്സിനു മുകളിലുള്ളവരില് 80 ശതമാനത്തിലധികം പേര്ക്ക് ആദ്യത്തെ ഡോസ് വാക്സിനേഷന് ലഭിച്ച ജില്ലകളില് സെന്റിനെല് സര്വൈലന്സിന്റെ ഭാഗമായി 1000 സാമ്പിളുകളില് ടെസ്റ്റ് നടത്തും. 80 ശതമാനത്തിനു താഴെ ആദ്യത്തെ ഡോസ് ലഭിച്ച ജില്ലകളില് 1500 സാമ്പിളുകളിലായിരിക്കും ടെസ്റ്റ് നടത്തുക. രണ്ട് ഡോസ് വാക്സിന് എടുത്തവരില് രോഗലക്ഷണങ്ങള് കാണിക്കാത്തവര്ക്കും ഒരു മാസത്തിനുള്ളില് കോവിഡ് പോസിറ്റീവായവര്ക്കും ടെസ്റ്റുകള് ആവശ്യമില്ലെന്നും മുഖ്യമന്ത്രി പറഞ്ഞു.
അനുബന്ധ രോഗങ്ങളുള്ളവര്ക്കും പ്രായം കൂടിയവര്ക്കും കോവിഡ് ബാധയുണ്ടായാല് അതിവേഗം ചികിത്സ ലഭ്യമാക്കാന് നടപടി സ്വീകരിക്കും. അവര്ക്ക് ഏറ്റവും മികച്ച ചികിത്സ ലഭ്യമാക്കുന്നതിന് ഊന്നല് നല്കും. അനുബന്ധ രോഗമുള്ളവര് ആശുപത്രിയിലെത്തുന്നില്ലെങ്കില് രോഗം അതിവേഗം വഷളാകാനും മരണം സംഭവിക്കാനും സാധ്യത വളരെ കൂടുതലാണെന്നും ആ വിപത്ത് ഒഴിവാക്കാനുള്ള എല്ലാ ഇടപെടലുമുണ്ടാകുമെന്നും അദ്ദേഹം പറഞ്ഞു. അനുബന്ധ രോഗികളുടെ കാര്യത്തില് ആദ്യത്തെ ദിവസങ്ങള് വളരെ നിര്ണായകമാണ്. ആശുപത്രിയില് എത്തിക്കാന് വൈകിയാല് ഗുരുതരമാകുന്ന അവസ്ഥയിലേക്ക് നീങ്ങി പോകുന്ന സ്ഥിതി പല കേസുകളിലും ഉണ്ടെന്നും മുഖ്യമന്ത്രി പറഞ്ഞു.
ഇന്നത്തെ സ്ഥിതിയും അതിന്റെ സവിഷേതകളും വിലയിരുത്തി മുന്നോട്ടു പോകാനുള്ള തന്ത്രം ആവിഷ്കരിക്കാന് ഈ രംഗത്തെ വിദഗ്ധരെ പങ്കെടുപ്പിച്ചു യോഗം ചേരും. എല്ലാ മെഡിക്കല് കോളേജുകളിലെയും കോവിഡ് ചികിത്സാനുഭവമുള്ള പ്രധാന ഡോക്ടര്മാര്, ചികിത്സാ പരിചയം ഉള്ള സ്വകാര്യ ആശുപത്രി ഡോക്ടര്മാര്, രാജ്യത്തെ പ്രമുഖ വൈറോളജിസ്റ്റുകള്, ആരോഗ്യ വിദഗ്ദ്ധര് എന്നിവരെ ആ യോഗത്തില് പങ്കെടുപ്പിക്കും. സെപ്തംബര് ഒന്നിന് ഈ യോഗം ചേരും
തദ്ദേശ സ്വയം സ്ഥാപനങ്ങളിലെ പ്രസിഡന്റ്, സെക്രട്ടറിമാരുടെ യോഗവും ഇതിന് ശേഷം സെപ്തംബര് മൂന്നിന് ചേരും. ആരോഗ്യ മന്ത്രിക്ക് പുറമെ റവന്യു, തദ്ദേശ സ്വയംഭരണ വകുപ്പ് മന്ത്രിമാരും ഈ യോഗത്തില് പങ്കെടുക്കും. ഓരോ തദ്ദേശസ്ഥാപനത്തിന്റെ കയ്യിലും വാക്സിന് നല്കിയതിന്റെ കണക്ക് വേണം എന്നും അത് വിലയിരുത്തി കുറവ് പരിഹരിക്കണം എന്നും നിര്ദേശം നല്കിയിട്ടുണ്ട്. ഐ ടി ഐ പരീക്ഷ എഴുതേണ്ടവര്ക്ക് മാത്രം പ്രാക്ടിക്കല് ക്ലാസിന് അനുമതി നല്കുമെന്നും മുഖ്യമന്ത്രി അറിയിച്ചു.