കരള്‍ മാറ്റാന്‍ നാട് കാരുണ്യ ഹസ്തം നീട്ടുന്നതിനിടെ കരളലിയിപ്പിച്ച് ഫൈസല്‍ യാത്രയായി
കരള്‍ നല്‍കാന്‍ ഉപ്പയും മൂത്ത സഹോദരന്‍ സവാദും മുന്നോട്ടുവന്നിരുന്നു
കുമ്പള: മഞ്ഞപ്പിത്തം ബാധിച്ച് ഗുരുതരാവസ്ഥയില്‍ ചികിത്സയിലായിരുന്ന മൊഗ്രാല്‍ നടുപ്പള്ളം ഹൈദ്രോസ് ജുമാമസ്ജിദിന് സമീപത്തെ ഹംസയുടെയും ഫാത്തിമയുടെയും മകനും മൊഗ്രാല്‍ ജി.വി.എച്ച്.എസ്.എസിലെ പ്ലസ്ടു വിദ്യാര്‍ത്ഥിയുമായ ഫൈസല്‍ യാത്രയായി. ശനിയാഴ്ച പുലര്‍ച്ചെ എറണാകുളത്തെ സ്വകാര്യാസ്പത്രിയിലായിരുന്നു അന്ത്യം. കരള്‍ മാറ്റിവെക്കല്‍ ശസ്ത്രക്രിയക്ക് ഒരുക്കങ്ങള്‍ നടക്കുന്നതിനിടെയായായിരുന്നു മരണം.
ചികിത്സക്കായി നാട്ടുകാര്‍ കൈകോര്‍ത്ത് ഫണ്ട് സ്വരൂപിക്കുന്നതിനിടയിലായിരുന്നു ഫൈസല്‍ യാത്രയായത്. മകന് കരള്‍ നല്‍കാന്‍ ഉപ്പയും മൂത്ത സഹോദരന്‍ സവാദും തയ്യാറായി. ഇതിനായുള്ള പരിശോധനകളും മറ്റും നടന്നുവരികയായിരുന്നു. ഫൈസല്‍ മോന്റെ മരണം ഇശല്‍ ഗ്രാമത്തെ കണ്ണീരിലാഴ്ത്തി. സവാദ്, ശബാന തസ്നി, ഷാജി, ശംസു, ഷാഹി എന്നിവര്‍ സഹോദരങ്ങളാണ്.
ഫൈസലിന്റെ നിര്യാണത്തില്‍ മൊഗ്രാല്‍ ടൗണ്‍ ഷാഫി ജുമാ മസ്ജിദ് കമ്മിറ്റി, ചളിയങ്കോട് ജുമാ മസ്ജിദ് കമ്മിറ്റി, മൊഗ്രാല്‍ ജി.വി.എച്ച്.എസ്.എസ് പി.ടി.എ കമ്മിറ്റി, ദീനാര്‍ യുവജന സംഘം, മൊഗ്രാല്‍ ദേശീയവേദി, ഫ്രണ്ട്സ് ക്ലബ്ബ് മൊഗ്രാല്‍, റെഡ് സ്റ്റാര്‍ ക്ലബ്ബ് തുടങ്ങിയവര്‍ അനുശോചിച്ചു.
