നെല്ലിക്കട്ടയില്‍ ലീഗിലെ പടലപ്പിണക്കം തീര്‍ന്നില്ല; ഭാരവാഹികള്‍ രാജിവെച്ചു
മുസ്ലിം ലീഗ്, യൂത്ത് ലീഗ്, എം.എസ്.എഫ് ഭാരവാഹികളാണ് രാജിവെച്ചത്
ചെര്‍ക്കള: മുസ്ലിം ലീഗിന് ഏറെ സ്വാധീനമുള്ളതും കാലങ്ങളായി മത്സരിക്കുന്നതുമായ ചെങ്കള പഞ്ചായത്ത് നെല്ലിക്കട്ട വാര്‍ഡ് കോണ്‍ഗ്രസിന് നല്‍കിയതില്‍ പ്രതിഷേധിച്ച് നെല്ലിക്കട്ട ടൗണ്‍ മുസ്ലിം ലീഗ്, യൂത്ത് ലീഗ്, എം.എസ്.എഫ് ഭാരവാഹികള്‍ രാജിവെച്ചു.
മുസ്ലിം ലീഗ് ടൗണ്‍ കമ്മിറ്റി പ്രസിഡണ്ട് കെ.ഡി. അഷ്റഫ്, സെക്രട്ടറി കെ.എം. ജാബിര്‍, യൂത്ത് ലീഗ് പ്രസിഡണ്ട് പി.എം. അജ്മല്‍, സെക്രട്ടറി ഷാനിഫ് നെല്ലിക്കട്ട, എം.എസ്.എഫ് പ്രസിഡണ്ട് താഹ, സെക്രട്ടറി താഹിര്‍ തുടങ്ങിയവരുടെ നേതൃത്വത്തിലുള്ള കമ്മിറ്റിയാണ് രാജിവെച്ചത്. 2015ലെ തിരഞ്ഞെടുപ്പില്‍ മുസ്ലിം ലീഗിന്റെ വാര്‍ഡ് ജനറല്‍ സെക്രട്ടറിയായിരുന്നു യു.ഡി.എഫ് സ്ഥാനാര്‍ത്ഥിയായി മത്സരിച്ചിരുന്നത്.
കേണ്‍ഗ്രസ് നേതാവ് നാസര്‍ കാട്ടുകൊച്ചി ലീഗ് സ്ഥാനാര്‍ത്ഥിക്കെതിരെ മത്സരിച്ച് വിജയിച്ചിരുന്നു. കഴിഞ്ഞ തിരഞ്ഞെടുപ്പില്‍ റിബലായി നിന്നവരെ അനുകൂലിക്കുന്നവരില്‍ നിന്ന് സ്ഥാനാര്‍ത്ഥിയാക്കരുതെന്ന് പ്രവര്‍ത്തകര്‍ ആവശ്യപ്പെട്ടിട്ടും കഴിഞ്ഞ റിബല്‍ സ്ഥാനാര്‍ത്ഥിയുടെ ഭാര്യയെ തന്നെ സ്ഥാനാര്‍ത്ഥിയാക്കുകയായിരുന്നു.
മുസ്ലിം ലീഗ് നെല്ലിക്കട്ട ടൗണ്‍ കമ്മിറ്റിയുടെ പ്രസിഡണ്ടായിരുന്ന കെ.ഡി. അഷ്റഫിന്റെ ഭാര്യ ഫാത്തിമത്ത് റംസീനയെ സ്വാതന്ത്ര സ്ഥാനാര്‍ത്ഥിയായി മത്സരിപ്പിക്കുമെന്നും നേതാക്കള്‍ പറഞ്ഞു. മൂന്നാം വാര്‍ഡില്‍ സി.പി.എം സ്ഥാനാര്‍ത്ഥിയായി പത്രിക നല്‍കിയിരുന്ന എ. ബേബി അവസാനനിമിഷം മത്സരരംഗത്തുനിന്ന് പിന്മാറുകയും സ്വതന്ത്ര സ്ഥാനാര്‍ത്ഥിയായി മത്സരരംഗത്തുള്ള ഫാത്തിമത്ത് റംസീനക്ക് എല്‍.ഡി.എഫ് പിന്തുണ പ്രഖ്യാപിക്കുകയുമായിരുന്നു.
