ജില്ലയില്‍ യു.ഡി.എഫ് ഉജ്ജ്വല വിജയം നേടുമെന്ന് എ. ഗോവിന്ദന്‍ നായര്‍
കാഞ്ഞങ്ങാട് പ്രസ് ഫോറത്തിന്റെ തിരഞ്ഞെടുപ്പ് മുഖാമുഖം തദ്ദേശപ്പോര് 2025ല്‍ സംസാരിക്കുകയായിരുന്നു അദ്ദേഹം
കാഞ്ഞങ്ങാട്: കഴിഞ്ഞ തവണ നഷ്ടപ്പെട്ട ജില്ലാ പഞ്ചായത്ത് ഭരണം ഉള്‍പ്പെടെ ജില്ലയിലെ ഭൂരിപക്ഷം തദ്ദേശ സ്ഥാപനങ്ങളിലും യു.ഡി.എഫ് മികച്ച വിജയം നേടുമെന്ന് ജില്ലാ കണ്‍വീനര്‍ എ. ഗോവിന്ദന്‍ നായര്‍. കാഞ്ഞങ്ങാട് പ്രസ് ഫോറത്തിന്റെ തിരഞ്ഞെടുപ്പ് മുഖാമുഖം തദ്ദേശപ്പോര് 2025ല്‍ സംസാരിക്കുകയായിരുന്നു അദ്ദേഹം. കോണ്‍ഗ്രസും യു.പി.എയും വിഭാവനം ചെയ്ത പഞ്ചായത്തീരാജ് നഗരപാലിക ബില്ലുകളെ ലോക്സഭയിലും രാജ്യസഭയിലും എതിര്‍ത്ത കമ്മ്യൂണിസ്റ്റ് പാര്‍ട്ടികള്‍ക്ക് ത്രിതല പഞ്ചായത്ത് തിരഞ്ഞെടുപ്പില്‍ വോട്ട് ചോദിക്കാന്‍ അര്‍ഹതയില്ലെന്ന് അദ്ദേഹം പറഞ്ഞു.
പഞ്ചായത്തുകളുടെ അതിര്‍ത്തി നിര്‍ണയത്തില്‍ മാനദണ്ഡങ്ങള്‍ പാലിക്കാതെ ഇടതുമുന്നണിക്ക് വേണ്ടി വാര്‍ഡുകള്‍ വികൃതമാക്കി മുറിച്ചുവെന്ന് ഗോവിന്ദന്‍ നായര്‍ ആരോപിച്ചു. ചുരുങ്ങിയത് 1000 വോട്ടര്‍മാര്‍ എന്ന മാനദണ്ഡം കാറ്റില്‍ പറത്തിയതായി അദ്ദേഹം ആരോപിച്ചു. ഈ കൃത്രിമങ്ങളെയെല്ലാം അതിജീവിച്ച് യു.ഡി.എഫ് വന്‍ മുന്നേറ്റം നടത്തുമെന്നും അദ്ദേഹം പറഞ്ഞു.
തിളക്കമാര്‍ന്ന സ്ഥാനാര്‍ത്ഥികളെയാണ് യു.ഡി.എഫ് ഇത്തവണ രംഗത്തിറക്കിയത്. മുന്‍ വര്‍ഷങ്ങളില്‍ ഉണ്ടായതുപോലെ റിബല്‍ ശല്യം എവിടെയുമില്ലെന്നും അദ്ദേഹം പറഞ്ഞു. ഫസലുറഹ്‌മാന്‍ അധ്യക്ഷത വഹിച്ചു. ബാബു കോട്ടപ്പാറ, കെ.എസ്. ഹരി എന്നിവര്‍ പ്രസംഗിച്ചു.
