ഷെഡില്‍ നിന്ന് 116 കിലോ കഞ്ചാവ് പിടികൂടിയ കേസ്; പ്രധാന വിതരണക്കാരന്‍ അറസ്റ്റില്‍
മീയാപ്പദവിലെ റഫീഖ് എന്ന മുണ്ടില റഫീഖിനെയാണ് കാസര്‍കോട് പൊലീസ് മേധാവിയുടെ കീഴിലുള്ള പ്രത്യേക സംഘം അറസ്റ്റ് ചെയ്തത്
മഞ്ചേശ്വരം : വോര്‍ക്കാടിയിലെ ഷെഡില്‍ നിന്ന് 116 കിലോ കഞ്ചാവ് പിടികൂടിയ കേസില്‍ പ്രധാന വിതരണക്കാരന്‍ അറസ്റ്റില്‍. മീയാപ്പദവിലെ റഫീഖ് എന്ന മുണ്ടില റഫീഖി(37)നെയാണ് കാസര്‍കോട് പൊലീസ് മേധാവിയുടെ കീഴിലുള്ള പ്രത്യേക സംഘം അറസ്റ്റ് ചെയ്തത്. റഫീഖ് കഞ്ചാവ് കടത്തിന്റെ പ്രധാന വിതരണക്കാരനാണെന്ന് പൊലീസ് പറഞ്ഞു.
ആന്ധ്രയില്‍ നിന്ന് കാസര്‍കോട് ജില്ലയുടെ വിവിധ ഭാഗങ്ങളില്‍ കഞ്ചാവും മയക്കു മരുന്നും എത്തിക്കുന്ന സംഘത്തിന്റെ തലവനാണ് റഫീഖ്. മൂന്ന് മാസം മുമ്പ് വോര്‍ക്കാടിയില്‍ വീടിന് സമീപത്ത് വെച്ച് ഷെഡില്‍ സൂക്ഷിച്ച 116 കിലോ കഞ്ചാവാണ് മഞ്ചേശ്വരം പൊലീസ് പിടികൂടിയത്. ഷെഡിന് സമീപത്ത് കഞ്ചാവ് കൊണ്ടുവന്ന ടെമ്പോയും കസ്റ്റഡിയിലെടുത്തിരുന്നു.
ആന്ധ്രയില്‍ നിന്ന് ഷെഡിലേക്ക് കഞ്ചാവ് എത്തിച്ച ടെമ്പോ ഡ്രൈവറായ കര്‍ണാടക സ്വദേശിയെയും മറ്റു രണ്ട് പേരെയും മഞ്ചേശ്വരം പൊലീസ് നേരത്തെ അറസ്റ്റ് ചെയ്തിരുന്നു. കോടതിയില്‍ ഹാജരാക്കിയ പ്രതിയെ റിമാണ്ട് ചെയ്തു. കൂടുതല്‍ അന്വേഷണത്തിന് വേണ്ടി റഫീഖിനെ കസ്റ്റഡിയില്‍ വാങ്ങുമെന്ന് പൊലീസ് പറഞ്ഞു.
