കൊച്ചി: വിഴിഞ്ഞം തുറമുഖ പദ്ധതി പ്രദേശത്തെ സുരക്ഷ കേന്ദ്രസേനയെ ഏല്പ്പിക്കുന്നതില് വിരോധമില്ലെന്ന് സംസ്ഥാന സര്ക്കാര് ഹൈക്കോടതിയെ അറിയിച്ചു. വിഴിഞ്ഞത്തെ തുറമുഖ നിര്മ്മാണം തടസപ്പെടുന്നുവെന്നും നിര്മ്മാണ പ്രവര്ത്തനങ്ങളുമായി മുന്നോട്ട് പോകാന് സംസ്ഥാനത്ത് നിന്നും സുരക്ഷ ലഭിക്കുന്നില്ലെന്നും അതിനാല് കേന്ദ്ര സേനയെ നിയോഗിക്കണമെന്നും ആവശ്യപ്പെട്ട് അദാനി ഗ്രൂപ്പ് ഹൈക്കോടതിയില് ഹരജി നല്കിയിരുന്നു. ഈ സാഹചര്യത്തിലാണ് സര്ക്കാര് നിലപാട് ഹൈക്കോടതിയില് വ്യക്തമാക്കിയത്.
കോടതിയുത്തരവുണ്ടായിട്ടും വിഴിഞ്ഞത്ത് പൊലീസ് സംരക്ഷണം നല്കുന്നത് തങ്ങള്ക്കല്ലെന്നും പ്രതിഷേധക്കാര്ക്കാണെന്നുമാണ് അദാനി ഗ്രൂപ്പ് കോടതിയില് പരാതിപ്പെട്ടത്. പൊലീസ് സംരക്ഷണമൊരുക്കണമെന്ന കോടതിയുത്തരവിന്റെ ലംഘനമാണിതെന്നും അദാനി ഗ്രൂപ്പ് ആരോപിക്കുന്നു.
ഇതോടെ വിഴിഞ്ഞത്ത് പ്രശ്നമുണ്ടാക്കിയവര്ക്കെതിരെ എന്ത് നടപടി സ്വീകരിച്ചെന്ന് കോടതി സംസ്ഥാന സര്ക്കാരിനോട് ആരാഞ്ഞു. മറുപടി നല്കിയ സര്ക്കാര്, വിഴിഞ്ഞത്ത് സംഘര്ഷം ഒഴിവാക്കാന് വെടിവെപ്പ് ഒഴികെ എല്ലാ നടപടികളും സ്വീകരിച്ചെന്ന് കോടതിയെ അറിയിച്ചു. ബിഷപ്പ് അടക്കമുള്ള വൈദികരെയും പ്രതിയാക്കി കേസെടുത്തു. 5 പേരെ അറസ്റ്റ് ചെയ്തു. സംഘര്ഷത്തിന്റെ അന്വേഷണ ചുമതല ആര് നിശാന്തിനിക്ക് നല്കിയെന്നും സര്ക്കാര് കോടതിയെ അറിയിച്ചു. ഇതോടെ വിഷയത്തില് ഹൈക്കോടതി കേന്ദ്രത്തിന്റെ നിലപാട് തേടിയിരിക്കുകയാണ്.