തിരുവനന്തപുരം: വിവിധ വകുപ്പുകളില് ശമ്പള പരിഷ്കരണത്തിന് സംസ്ഥാന സര്ക്കാര് തീരുമാനിച്ചു. ട്രാക്കോ കേബിള് കമ്പനിയിലെ മാനേജീരിയല് ഉദ്യോഗസ്ഥരുടെ ശമ്പളം പരിഷ്കരിക്കും. സംസ്ഥാന വികലാംഗ ക്ഷേമകോര്പ്പറേഷനില് ശമ്പള പരിഷ്കരണം നടപ്പാക്കാന് തീരുമാനിച്ചു. കെ.എസ്.എഫ്.ഇ ജീവനക്കാരുടെ ശമ്പളപരിഷ്കരണം നടപ്പാക്കും. 2017 ആഗസ്റ്റ് ഒന്നു മുതല് ഇതിന് പ്രാബല്യമുണ്ടാകും.
1939 ലെ മദ്രാസ് പബ്ലിക് ഹെല്ത്ത് ആക്ടും 1955ലെ ട്രാവന്കൂര് കൊച്ചിന് പബ്ലിക് ഹെല്ത്ത് ആക്ടും ഏകീകരിച്ചുകൊണ്ട് കേരള പൊതുജനാരോഗ്യ നിയമം നടപ്പിലാക്കുന്നതിന് ഓര്ഡിനന്സ് പുറപ്പെടുവിക്കാന് ഗവര്ണറോട് ശുപാര്ശ ചെയ്യാന് തീരുമാനിച്ചു. 1953ലെ ട്രാവന്കൂര് കൊച്ചിന് മെഡിക്കല് പ്രാക്റ്റീഷ്ണേഴ്സ് ആക്ടും 1914ലെ മദ്രാസ് മെഡിക്കല് രജിസ്ട്രേഷന് ആക്ടും ഏകീകരിച്ചുകൊണ്ട് കേരള മെഡിക്കല് പ്രാക്റ്റീഷ്ണേഴ്സ് ആക്ട് നടപ്പാക്കുന്നതിന് ഓര്ഡിനന്സ് പുറപ്പെടുവിക്കാന് ഗവര്ണറോട് ശുപാര്ശ ചെയ്യാന് തീരുമാനിച്ചു. ദുരന്താഘാത സാധ്യത സംബന്ധിച്ച വ്യവസ്ഥകള് കൂടി ഉള്പ്പെടുത്തി 2016ലെ നഗര-ഗ്രാമാസൂത്രണ ആക്ട് ഭേദഗതി ചെയ്യുന്നതിന് ഓര്ഡിനന്സ് പുറപ്പെടുവിക്കാന് ഗവര്ണറോട് ശുപാര്ശ ചെയ്യാന് തീരുമാനിച്ചു.
കേരള അഡ്വക്കേറ്റ് ക്ലാര്ക്ക് ക്ഷേമനിധിയില് അംഗമായ അഭിഭാഷക ക്ലാര്ക്കുമാരുടെ പ്രതിമാസ പെന്ഷന് 600 രൂപയില് നിന്ന് 2000 രൂപയായി വര്ധിപ്പിക്കുന്നതിന് ക്ഷേമനിധി ചട്ടങ്ങളില് ഭേദഗതിവരുത്താന് തീരുമാനിച്ചു. വിരമിക്കല് ആനുകൂല്യം മൂന്നു ലക്ഷം രൂപയില് നിന്ന് നാല് ലക്ഷം രൂപയായി ഉയര്ത്തും. കേരളത്തില് കാര്ഷിക സംസ്കാരത്തിന്റെ ഭാഗമായ കാളപൂട്ട്, കന്നുപൂട്ട്, മരമടി, ഉഴവ് മത്സരങ്ങള് തുടര്ന്ന് നടത്തുന്നതിന് കേന്ദ്രനിയമമായ പ്രിവന്ഷന് ഓഫ് ക്രൂവല്റ്റി ടു ആനിമല്സ് ആക്ടില് ഭേദഗതി വരുത്തിയ പ്രിവന്ഷന് ഓഫ് ക്രൂവല്റ്റി ടു ആനിമല്സ് (കേരള ഭേദഗതി) ബില് മന്ത്രിസഭ അംഗീകരിച്ചു. ഇത് ഓര്ഡിനന്സായി വിളംബരം ചെയ്യാന് ഗവര്ണറോട് ശുപാര്ശ ചെയ്യാന് തീരുമാനിച്ചു.
കേരള മത്സ്യത്തൊഴിലാളി കടാശ്വാസ കമ്മീഷന്റെ കാലാവധി 2021 മാര്ച്ച് 28 മുതല് ആറു മാസത്തേക്ക് ദീര്ഘിപ്പിക്കാന് തീരുമാനിച്ചു. പുനരൂപയോഗ ഊര്ജം സംബന്ധിച്ച ദേശീയ-സംസ്ഥാന നയങ്ങള്ക്കനുസൃതമായി അനര്ട്ട് പുനഃസംഘടിപ്പിക്കാനുള്ള നിര്ദേശം മന്ത്രിസഭ അംഗീകരിച്ചു. ഇതിനാവശ്യമായ തസ്തികകള് സൃഷ്ടിക്കും. വനിതാവികസന കോര്പ്പറേഷനില് ജീവനക്കാരുടെ വിരമിക്കല് പ്രായം 58 ആയി ഉയര്ത്താന് തീരുമാനിച്ചു.