തിരുവനന്തപുരം: തെക്കന് കേരളം -തെക്കന് തമിഴ്നാട് തീരങ്ങള്ക്ക് കേന്ദ്ര കാലാവസ്ഥ വകുപ്പ് ചുഴലിക്കാറ്റ് സാധ്യത മുന്നറിയിപ്പ് (Cyclone Alert) പ്രഖ്യാപിച്ചു. തെക്ക് കിഴക്കന് ബംഗാള് ഉള്ക്കടലില് രൂപം കൊണ്ട ‘ബുറേവി’ ചുഴലിക്കാറ്റ് കഴിഞ്ഞ ആറ് മണിക്കൂറായി മണിക്കൂറില് 15 കിമീ വേഗതയില് പടിഞ്ഞാറ് ദിശയില് സഞ്ചരിച്ച് ഒടുവില് വിവരം ലഭിക്കുമ്പോള് 8.8° N അക്ഷാംശത്തിലും 82.2°E രേഖാംശത്തിലും എത്തിയിട്ടുണ്ട്. ഇത് ശ്രീലങ്കന് തീരത്ത് നിന്ന് ഏകദേശം 110 കിമീ ദൂരത്തിലും പാമ്പന് തീരത്ത് നിന്ന് 330 കിമീ ദൂരത്തിലും കന്യാകുമാരിയില് നിന്ന് ഏകദേശം 520 കി.മീ ദൂരത്തിലുമാണ്.
ഡിസംബര് രണ്ടിന് വൈകീട്ടോടെ ശ്രീലങ്കന് തീരം കടക്കുമെന്നും കേന്ദ്ര കാലാവസ്ഥ വകുപ്പ് പ്രവചിക്കുന്നു. ശ്രീലങ്കന് തീരത്തെത്തുമ്പോള് ചുഴലിക്കാറ്റിന് അകത്തെ കാറ്റിന്റെ പരമാവധി വേഗത മണിക്കൂറില് ഏകദേശം 80 മുതല് 90 കിമീ വരെ ആയിരിക്കുമെന്നാണ് പ്രതീക്ഷിക്കുന്നത്. ചുഴലിക്കാറ്റ് ഡിസംബര് മൂന്നിനോട് കൂടി ഗള്ഫ് ഓഫ് മാന്നാര് എത്തുകയും ഡിസംബര് 3ന് രാത്രിയിലും ഡിസംബര് 4ന് പുലര്ച്ചെയോടെയുമായി കന്യാകുമാരിയുടെയും പാമ്പന്റെയും ഇടയിലൂടെ തെക്കന് തമിഴ്നാട് തീരത്തേക്ക് പ്രവേശിക്കുകയും ചെയ്യാനുള്ള സാധ്യതയാണ് പ്രവചിക്കപ്പെട്ടിരിക്കുന്നത്.
ഇനിയൊരു അറിയിപ്പുണ്ടാകുന്നത് വരെ കേരള തീരത്ത് നിന്ന് കടലില് പോകുന്നത് പൂര്ണ്ണമായും നിരോധിച്ചിരിക്കുന്നു. വിലക്ക് എല്ലാതരം മല്സ്യബന്ധന യാനങ്ങള്ക്കും ബാധകമായിരിക്കും. നിലവില് മല്സ്യബന്ധനത്തിലേര്പ്പെട്ടിരിക്കുന്നവര് എത്രയും പെട്ടെന്ന് തന്നെ ഏറ്റവും അടുത്തുള്ള സുരക്ഷിത തീരത്ത് എത്തിച്ചേരേണ്ടതാണ്. ചുഴലിക്കാറ്റിന്റെ വികാസവും സഞ്ചാരപഥവും വിലയിരുത്തി സംസ്ഥാന ദുരന്ത നിവാരണ അതോറിറ്റി അനുമതി നല്കുന്നത് വരെ കേരള തീരത്ത് നിന്ന് കടലില് പോകാന് അനുവദിക്കുന്നതല്ല.
Cyclone warning in Kerala Tamilnadu sea shore