കുറ്റിക്കോല്‍ കയ്യിലാക്കാന്‍ പ്രമുഖരുടെ പോര്
കുറ്റിക്കോല്‍, പനത്തടി പഞ്ചായത്തുകള്‍ മുഴുവനായും ബേഡകം പഞ്ചായത്തിന്റെ 6 വാര്‍ഡുകളും ഉള്‍പ്പെടുന്നതാണ് കുറ്റിക്കോല്‍ ഡിവിഷന്‍;
കാസര്‍കോട്: കുറ്റിക്കോല്‍, പനത്തടി പഞ്ചായത്തുകള്‍ മുഴുവനായും ബേഡകം പഞ്ചായത്തിന്റെ 6 വാര്‍ഡുകളും ഉള്‍പ്പെടുന്നതാണ് കുറ്റിക്കോല്‍ ഡിവിഷന്‍. കാറഡുക്ക ബ്ലോക്ക് പഞ്ചായത്തിലെ കുറ്റിക്കോല്‍, മുന്നാട്, പടുപ്പ് ഡിവിഷനുകളും പരപ്പ ബ്ലോക്ക് പഞ്ചായത്തിലെ പാണത്തൂര്‍, പനത്തടി ഡിവിഷനുകളും ഉള്‍ക്കൊള്ളുന്ന ഈ ഡിവിഷനില്‍ 56,737 വോട്ടര്‍മാരാണുള്ളത്. കാലങ്ങളായി തങ്ങളെ തുണക്കുന്ന ബേഡകം ഡിവിഷന്‍ രൂപാന്തരപ്പെട്ട് കുറ്റിക്കോല്‍ ഡിവിഷനായി മാറിയ ഇത്തവണയും ഒരു കോട്ടവും തട്ടില്ലെന്ന് എല്‍.ഡി.എഫ് നേതാക്കള്‍ അവകാശപ്പെടുന്നു.
എന്നാല്‍ ഇത്തവണ ചിത്രം മാറുമെന്നാണ് യു.ഡി.എഫിന്റെ അവകാശവാദം. നാട്ടുകാരന്‍ കൂടിയായ ജില്ലാ ഭാരവാഹിയെ കളത്തിലിറക്കി ബി.ജെ.പിയും വിജയം അവകാശപ്പെടുന്നുണ്ട്. നേരത്തെ സി.പി.ഐക്ക് നല്‍കിയിരുന്ന സീറ്റ് ഇത്തവണ സി.പി.എം ഏറ്റെടുക്കുകയായിരുന്നു. പാര്‍ട്ടിയുടെ ജില്ലാ കമ്മിറ്റി അംഗവും സി.ഐ.ടി.യു ജില്ലാ ജനറല്‍ സെക്രട്ടറിയുമായ സാബു എബ്രഹാമാണ് എല്‍.ഡി.എഫ് സ്ഥാനാര്‍ത്ഥി.
സി.പി.എമ്മിന്റെ മുതിര്‍ന്ന അംഗം എന്ന നിലയില്‍ സാബുവിനെയാണ് ഇടത് മുന്നണി ജില്ലാ പഞ്ചായത്ത് പ്രസിഡണ്ടായി ചൂണ്ടിക്കാട്ടുന്നത് എന്ന് അറിയുന്നു. വിദ്യാര്‍ത്ഥി, യുവജന സംഘടന പ്രവര്‍ത്തനങ്ങളിലൂടെ സി.പി.എമ്മിന്റെ നേതൃനിരയിലെത്തിയ സാബു എബ്രഹാം ഡിവിഷനിലെ എല്ലാവര്‍ക്കും സുപരിചിതനാണ്. വിദ്യാര്‍ത്ഥി സംഘടന കാലയളവില്‍ തന്നെ ബ്ലോക്ക് പഞ്ചായത്ത് അംഗമായി കഴിവ് തെളിയിച്ച് അനുഭവ കരുത്ത് തുറന്നുകാട്ടിയാണ് സാബു വോട്ടര്‍മാര്‍ക്കിടയില്‍ എത്തുന്നത്. കേരള ബാങ്ക് ഡയറക്ടര്‍ സ്ഥാനം അടക്കമുള്ളവയും സാബുവിന്റെ മികവായി ഉയര്‍ത്തിക്കാട്ടുന്നു. നേരത്തെ തന്നെ സ്ഥാനാര്‍ത്ഥി പ്രഖ്യാപനം വന്നതിനാല്‍ ഡിവിഷന്‍ പരിധിയില്‍ ഇതിനോടകം നിരവധി തവണ പ്രചരണം നടത്തി.
യു.ഡി.എഫില്‍ ആദ്യമായി ആര്‍.എസ്.പിക്ക് നല്‍കിയ ഡിവിഷനില്‍ പ്രമുഖനായ നേതാവിനെയാണ് രംഗത്തിറക്കിയിട്ടുള്ളത്. ആര്‍.എസ്.പി ജില്ലാ എക്സിക്യൂട്ടീവ് അംഗവും വിവിധ സംഘടനയുടെ സാരഥിയുമായ കൂക്കള്‍ ബാലകൃഷ്ണനാണ് യു.ഡി.എഫ് സ്ഥാനാര്‍ത്ഥി. നേരത്തെ ഡി.വൈ.എഫ്.ഐ ജില്ലാ കമ്മിറ്റി അംഗമായും സി.പി.എം ലോക്കല്‍ കമ്മിറ്റി അംഗമായും ബീഡി ലേബര്‍ യൂണിയന്‍, ചെത്ത് തൊഴിലാളി സംഘടനകളിലും പ്രവര്‍ത്തിച്ച കൂക്കളിന്റെ സ്ഥാനാര്‍ത്ഥിത്വം ഇടത് കേന്ദ്രങ്ങളില്‍ ചലനമുണ്ടാക്കാനാകുമെന്നാണ് യു.ഡി.എഫിന്റെ വിലയിരുത്തല്‍.
ഡിവിഷന്‍ പരിധിയിലെ പനത്തടി സ്വദേശിയാണ് കൂക്കള്‍ ബാലകൃഷ്ണന്‍. ബി.ജെ.പി ജില്ലാ ജനറല്‍ സെക്രട്ടറി മനുലാല്‍ മേലത്താണ് എന്‍.ഡി.എയുടെ സ്ഥാനാര്‍ത്ഥി. എ.ബി.വി.പി, യുവമോര്‍ച്ച പ്രവര്‍ത്തന കാലയളവ് മുതല്‍ ഈ ഡിവിഷന്‍ പരിധിയിലെ വിവിധ കേന്ദ്രങ്ങളില്‍ പ്രവര്‍ത്തിച്ചത് വോട്ടായി മാറുമെന്ന് മനുലാല്‍ കണക്കുക്കൂട്ടുന്നു. കുറ്റിക്കോല്‍ സ്വദേശിയായ മനുലാല്‍ കേന്ദ്ര സര്‍ക്കാരിന്റെ നേട്ടങ്ങളടക്കം എണ്ണിപ്പറഞ്ഞാണ് പ്രചരണം നടത്തുന്നത്. ആംആദ്മി പാര്‍ട്ടിയുടെ സ്ഥാനാര്‍ത്ഥിയായി എം. മുസ്തഫയും ഈ ഡിവിഷനില്‍ മത്സരിക്കുന്നുണ്ട്.