പത്മശ്രീ അവാര്‍ഡ് ജേതാവ് സാലുമരദ തിമ്മക്ക അന്തരിച്ചു; മരണം 114ാം വയസ്സില്‍
വാര്‍ദ്ധക്യസഹചമായ അസുഖങ്ങളെ തുടര്‍ന്ന് ജയനഗറിലെ ഒരു സ്വകാര്യ ആശുപത്രിയില്‍ ചികിത്സയിലായിരുന്നു;
ബെംഗളൂരു: 'വൃക്ഷങ്ങളുടെ മാതാവ്' എന്നറിയപ്പെടുന്ന പത്മശ്രീ അവാര്‍ഡ് ജേതാവ് സാലുമരദ തിമ്മക്ക(114) അന്തരിച്ചു. വാര്‍ദ്ധക്യസഹചമായ അസുഖങ്ങളെ തുടര്‍ന്ന് ജയനഗറിലെ ഒരു സ്വകാര്യ ആശുപത്രിയില്‍ ചികിത്സയിലായിരുന്നു. ചികിത്സയ്ക്കിടെ വെള്ളിയാഴ്ച ഉച്ചയോടെ മരണം സംഭവിച്ചു.
തിമ്മക്കയ്ക്ക് ശ്വാസകോശ സംബന്ധമായ അസുഖങ്ങള്‍ ബാധിച്ചിരുന്നു. തുടര്‍ച്ചയായ വൈദ്യചികിത്സ ഉണ്ടായിരുന്നിട്ടും ഉച്ചയ്ക്ക് 12 മണിയോടെ മരണത്തിന് കീഴടങ്ങിയതായി ആശുപത്രി വൃത്തങ്ങള്‍ അറിയിച്ചു. 1911 ജൂണ്‍ 30 ന് തുമകുരു ജില്ലയിലെ ഗുബ്ബി താലൂക്കില്‍ ജനിച്ച തിമ്മക്ക ഹുലിക്കല്‍ ഗ്രാമത്തിലെ ചിക്കയ്യയെ വിവാഹം കഴിച്ചു. ദമ്പതികള്‍ക്ക് കുട്ടികളില്ലായിരുന്നു. ഇതിന്റെ ദുഃഖം മറികടക്കാന്‍, അവര്‍ വഴിയരികില്‍ ആല്‍മരത്തൈകള്‍ നട്ടുപിടിപ്പിക്കാന്‍ തുടങ്ങി. അവരെ സ്വന്തം മക്കളെപ്പോലെ വളര്‍ത്തി. ഈ നിസ്വാര്‍ത്ഥ പ്രവൃത്തി കാരണം അവര്‍ക്ക് സാലുമരദ തിമ്മക്ക എന്ന പേര് ലഭിക്കാനിടയായി.
പരിസ്ഥിതി സംരക്ഷണത്തിന് നല്‍കിയ ശ്രദ്ധേയമായ സംഭാവനകളെ മാനിച്ച് തിമ്മക്കയ്ക്ക് നിരവധി ദേശീയ, അന്തര്‍ദേശീയ ബഹുമതികള്‍ ലഭിച്ചു. നിരക്ഷരയായിരുന്നിട്ടും, അവരുടെ സമര്‍പ്പണത്തിന് അഭിമാനകരമായ രാജ്യോത്സവ അവാര്‍ഡ്, ആര്‍ട്ട് ഓഫ് ലിവിംഗ് ഫൗണ്ടേഷന്റെ വിശാലാക്ഷി അവാര്‍ഡ്, 2010 ലെ നടോജ അവാര്‍ഡ്, 2019 ല്‍ പത്മശ്രീ എന്നിവ ലഭിച്ചു. 2020 ല്‍ കര്‍ണാടക കേന്ദ്ര സര്‍വകലാശാല അവര്‍ക്ക് ഓണററി ഡോക്ടറേറ്റ് നല്‍കി ആദരിച്ചു.
പരിസ്ഥിതി സംരക്ഷണ ചാമ്പ്യന്‍ എന്ന നിലയില്‍ തിമ്മക്കയുടെ പാരമ്പര്യം തലമുറകളെ പ്രചോദിപ്പിക്കുന്നു. നിരവധി രാഷ്ട്രീയ നേതാക്കളും പ്രമുഖ വ്യക്തികളും അവരുടെ വിയോഗത്തില്‍ അനുശോചനം രേഖപ്പെടുത്തി.