updated on:2018-04-03 06:28 PM
ബഹുഭാഷാ സാംസ്‌കാരികോത്സവം: മന്ത്രിമാരും സാംസ്‌കാരിക നായകരും എത്തും

www.utharadesam.com 2018-04-03 06:28 PM,
കാസര്‍കോട്: ഭാരത് ഭവന്റെ ആഭിമുഖ്യത്തില്‍ ഏഴു മുതല്‍ പത്ത് വരെ ജില്ലയിലെ നാലു കേന്ദ്രങ്ങളില്‍ നടക്കുന്ന ബഹുഭാഷ സാംസ്‌കാരിക സര്‍ഗോത്സവത്തിനും ഷേണി ജന്മശതാബ്ദി ആഘോഷത്തിനും ഒരുക്കങ്ങള്‍ പൂര്‍ത്തിയായി.
ഏഴിന് കന്നഡ സാംസ്‌കാരിക വകുപ്പിന്റെയും ഷേണി രംഗരാജ ട്രസ്റ്റിന്റെയും സഹകരണത്തോടെ കാസര്‍കോട് മുനിസിപ്പല്‍ കോണ്‍ഫറന്‍സ് ഹാളില്‍ ഉദ്ഘാടന പരിപാടി നടക്കും. 9.30ന് ബംഗളൂരുവിലെ യക്ഷഗാന പണ്ഡിതന്‍ ഡോ. പ്രഭാകര്‍ ജോഷിയുടെ അധ്യക്ഷതയില്‍ കൈതപ്രം ദാമോദരന്‍ നമ്പൂതിരി, ഉളിയത്തായ വിഷ്ണു ആസ്ര എന്നിവര്‍ ചേര്‍ന്ന് ഉദ്ഘാടനം നിര്‍വ്വഹിക്കും. കന്നഡ സാംസ്‌കാരിക വകുപ്പ് ജോയിന്റ് ഡയറക്ടര്‍ ബല്‍വന്തറാവു പാട്ടില്‍ ആമുഖ പ്രഭാഷണം നടത്തും. രാവിലെ 10.30ന് ഷേണി ദശമുഖ ദര്‍ശനം സെമിനാറില്‍ ഉജിരെ അശോക ഭട്ട് വിഷയം അവതരിപ്പിക്കും. 12.30ന് യക്ഷഗാന താളമദ്ദള. 2 മണിക്ക് സാംസ്‌കാരിക അന്വോന്യം, ഭാഷാവിനിമയ സൗഹൃദം സംഘടിപ്പിക്കും. പയ്യന്നൂര്‍ കുഞ്ഞിരാമന്‍ അധ്യക്ഷത വഹിക്കും. മൂന്ന് മണിക്ക് ബഹുഭാഷാ കാവ്യോത്സവം പി.എസ് ഹമീദിന്റെ അധ്യക്ഷതയില്‍ ശ്രീധരനുണ്ണി പി.പി ഉദ്ഘാടനം ചെയ്യും. 5 മണിക്ക് പ്രാദേശിക പത്രഭാഷയെ സംബന്ധിച്ച് സംവാദം നടക്കും. റഹ്മാന്‍ തായലങ്ങാടി അധ്യക്ഷത വഹിക്കും. 6 മണിക്ക് സാംസ്‌കാരിക സമ്മേളനം എന്‍.എ നെല്ലിക്കുന്ന് എം.എല്‍.എ.യുടെ അധ്യക്ഷതയില്‍ മന്ത്രി കടന്നപ്പള്ളി രാമചന്ദ്രന്‍ ഉദ്ഘാടനം ചെയ്യും. ചിന്തകന്‍ വിവേക് ഷാന്‍ബോഗ്, പ്രശസ്ത എഴുത്തുകാരന്‍ യു.എ ഖാദര്‍, കഥാകൃത്ത് ഷിഹാബുദ്ദീന്‍ പൊയ്തുംകടവ്, ജില്ലാ കലക്ടര്‍ കെ. ജീവന്‍ബാബു തുടങ്ങിയവര്‍ സംബന്ധിക്കും. പ്രമുഖരെ ആദരിക്കും.
8ന് ബദിയടുക്കയിലും 9ന് കാഞ്ഞങ്ങാട്ടും പത്തിന് മഞ്ചേശ്വരത്തും പരിപാടികള്‍ അരങ്ങേറും.



Recent News