updated on:2018-10-10 01:54 PM
ക്രമക്കേടെന്ന് ആരോപണം; നാട്ടുകാര്‍ റോഡ് പ്രവൃത്തി തടഞ്ഞു

www.utharadesam.com 2018-10-10 01:54 PM,
ബദിയടുക്ക: അശാസ്ത്രീയമായ രീതിയിലും പ്രവൃത്തിയിലെ ക്രമക്കേട് മൂലവും റോഡ് തകര്‍ന്നു. പ്രവൃത്തി നാട്ടുകാര്‍ തടഞ്ഞു. ബദിയടുക്ക പഞ്ചായത്തിലെ നാലാം വാര്‍ഡിലെ ഉപ്ലേരി മുതല്‍ ബൈക്കുഞ്ച വരെയുള്ള റോഡാണ് തകര്‍ന്നത്. എന്‍.എ. നെല്ലിക്കുന്ന് എം.എല്‍.എ യുടെ ആസ്തി വികസന ഫണ്ടില്‍ നിന്ന് 726 മീറ്റര്‍ ദൈര്‍ഘ്യമുള്ള റോഡ് അറ്റ കുറ്റ പ്രവര്‍ത്തനം നടത്തുന്നതിന് 25 ലക്ഷം രൂപ അനുവദിച്ചിരുന്നു. പ്രവൃത്തിയുടെ തുടക്കത്തില്‍ നല്ല നിലയില്‍ നിര്‍മ്മാണം നടന്നെങ്കിലും പിന്നീടുള്ള ദിവസങ്ങളില്‍ എസ്റ്റിമേറ്റിന് വിരുദ്ധമായി നിര്‍മ്മാണ പ്രവര്‍ത്തനം നടത്തുകയും കോണ്‍ക്രീറ്റിന് പകരം മെറ്റല്‍ മാത്രം പാകി സിമന്റിന്റെ മിശ്രണം ചെയ്ത വെള്ളം ഒഴിച്ച് പ്രവൃത്തി പൂര്‍ത്തികരിക്കാന്‍ കരാറുകാരന്‍ ശ്രമിച്ചുവെന്നുമാണ് പ്രദേശവാസികളുടെ ആരോപണം. ഇതേ തുടര്‍ന്ന് കഴിഞ്ഞ ദിവസം പ്രവൃത്തി നാട്ടുകാര്‍ തടസ്സപെടുത്തിയിരുന്നു. വര്‍ഷങ്ങളോളമായി തകര്‍ന്ന് തരിപ്പണമായി ഗതാഗത തടസ്സം നേരിട്ടിരുന്ന റോഡ് അറ്റകുറ്റ പ്രവര്‍ത്തനം നടത്തി സഞ്ചാര യോഗ്യമാക്കണമെന്ന നിരന്തരമായ ആവശ്യത്തെ തുടര്‍ന്നാണ് എം.എല്‍.എ യുടെ ആസ്തി വികസന ഫണ്ടില്‍ നിന്നും തുക അനുവദിച്ചത്. എസ്റ്റിമേറ്റില്‍ പറയും പ്രകാരം പ്രവൃത്തി പൂര്‍ത്തീകരിക്കണമെന്നാണ് നാട്ടുകാരുടെ ആവശ്യം.