updated on:2018-03-30 03:58 PM
മോഹൻലാൽ വീണ്ടും പാട്ട് പാടുന്നു

www.utharadesam.com 2018-03-30 03:58 PM,
മലയാളത്തിന്റെ പ്രിയ നടൻ മോഹൻലാൽ വീണ്ടും പാട്ട് പാടുന്നു. ജോഷി സംവിധാനം ചെയ്ത് 2012ൽ ഇറങ്ങിയ റൺ ബേബി റൺ എന്ന സിനിമയിലാണ് ഇതിന് മുന്പ് മോഹൻലാൽ പാടിയത്. ആറ്റുമണൽ പായയിൽ എന്ന ഗാനം ഏറെ ശ്രദ്ധിക്കപ്പെടുകയും ചെയ്തു. ഇപ്പോഴിതാ ബോളിവുഡ് സംവിധായകൻ അജോയ് വർമ സംവിധാനം ചെയ്യുന്ന നീരാളി എന്ന ചിത്രത്തിന് വേണ്ടി മോഹൻലാൽ ഒരിക്കൽ കൂടി പാടുകയാണ്. മോഹൻലാലിനൊപ്പം ശ്രേയാ ഘോഷാലിനൊപ്പമാണ് പാടുക. പ്രശസ്ത സംഗീതജ്ഞൻ സ്റ്റീഫൻ ദേവസിയാണ് ഈ ഗാനത്തിന് സംഗീതം പകരുന്നത്.
മൂന്ന് പതിറ്റാണ്ടുകൾക്ക് ശേഷം നാദിയാ മൊയ്തു മോഹൻലാലിനൊപ്പം അഭിനയിക്കുന്നുവെന്ന പ്രത്യേകതയും ഈ സിനിമയ്ക്കുണ്ട്. മോഹൻലാലിന്റെ ഭാര്യയായാണ് നാദിയ എത്തുന്നത്. മുംബയിലെ എല്ലോറാ സ്റ്റുഡിയോയിലാണ് നീരാളിയുടെ ചിത്രീകരണം നടക്കുന്നത്. ഫാസിലിന്റെ നോക്കെത്താ ദൂരത്ത് കണ്ണുംനട്ട് എന്ന സിനിമയായിരുന്നു മോഹൻലാലും നാദിയയും ഒന്നിച്ച ചിത്രം.
അജോയ് വർമ്മയുടെ ആദ്യ മലയാള ചിത്രമായ നീരാളിയുടെ തിരക്കഥ ഒരുക്കുന്നത് സാജു തോമസാണ്. മോഹൻലാലിനൊപ്പം സായികുമാർ, സുരാജ് വെഞ്ഞാറമൂട്, ദിലീഷ് പോത്തൻ, അനുശ്രീ, പാർവതി നായർ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. മൂൺഷോട്ട് എന്റർടെയിൻമെന്റിന്റെ ബാനറിൽ സന്തോഷ് ടി.കുരുവിള നിർമ്മിക്കുന്ന ചിത്രം മേയ് നാലിന് തീയേറ്ററുകളിലെത്തും.